1Samuɛl 25

Nabal gbe yebe àlɔ̀do wɔ̀wɔ na David

1Samuɛl ku, eye Izràɛlviwo bɔ̀, wɔ̀ ècɔ be èkɔ̀nuawo. Wo ɖì Samuɛl ɖo yebe èdù mè, lè Ramà. Ekèa yomè a, David trɔ yì Paràn be zògbè ji.

2Ŋusù ɖe lè Maɔ̀n be àgowo ji kè ɖo èlãnyìpe ɖo Karmèl nyigbãa ji. E nyi àdɔ̀kùnɔ̀ gã ɖe, eye be ɖo àlɛ̃ hotu ɖèka èkà èwì vɔ àtɔ̃ (3000), ku ègbɔ èkà èwì vɔ àtɔ̃ (1000). E va Karmèl be èdùa mè, ne bèa na, woa kpà èfu#25.2 Èfu kpàkpa na èlãwo nyina àzãɖùɖu gã ɖe, lè Izràɛl-nyigbã ji. na yebe àlɛ̃haa. 3Ŋusùa be nyikɔ ye nyi Nabal, eye wo yɔna èsrɔ̃a be Àbìgaɛl. Nyɔ̃nùa nyana ènu, eye be jè tùgbɛ̀jɛ. Ŋusùa ya sɛ̃na èta mè, eye e gbà nyrãku. E so Kàlɛb be hɛ̃nu mè.

4Kè David sè, lè zògbèa ji be Nabal le kpà èfu na yebe àlɛ̃woa, 5David dɔ̃ ɖèkajɛvi èwo ɖoɖa, ku àŋɛ̀do kèa be: “Mì yì Karmèl, lè Nabal gbɔ. Mìa do ègbè na ɛ̀, na mù. 6Mì to na ɛ̀ be: 'Mù le biɔ èpèa be jɔ̀gbè nyuɛ̃ na wò! Ŋuti fàfa na wò! Ŋuti fàfa na àpo àxuedoa! Ŋuti fàfa na tɔ̀ wòwo keŋu! 7Mù sè be wo le kpà èfu na èlãwo lè gbɔ wò. Vɔ̀a, wàlɛbɛ kè àpo àlɛ̃kplɔ̀tɔwo nɔ̀ ku mi lè Karmèl nyigbã jia, mi mu wɔ̀ èvuɛ̃ ɖe ku wo ò, eye woabe èlã ɖekpe mu ku, wàlɛbɛ kè kpata wo nɔ̀ Karmèl ku mi ò. 8Wò teŋu biɔ sumɔ̃vi wòwo sè, wo la ɖo èkpe e ji na wò. Tɔ̀ wò jɔ̀, xɔ̀ àmèdɔ̃dɔ̃ nyèawo ku àdɔ̀mè nyuɛ̃, ɖoa, egbè, àzã gbè ye mi le va gbɔ wò. Mù ɖè kuku na wò, ènu kè wò la teŋu na mi, sumɔ̃vi wò ku David, èvi wòa, sɔ ɛ̀ do àsi na mi.”

9Kè David be àmèdɔ̃dɔ̃awo va Nabal gbɔa, wo gbìgbɔ̀ gblɔ̃ ènyà kèawo keŋu na Nabal, lè David be nyikɔ mè, eye wo nɔ̀tè. 10Vɔ̀a, Nabal ɖo e ŋuti na wo be: “Àmè kɛ ye nyi David ò? Àmè kɛ ye nyi Jesè be èvia ò? Egbè mèa, kluvi sùgbɔ le si jo lè woabe àpetɔwo gbɔ. 11Eye nyè ya, mù la va sɔ àpe kpɔ̃nɔ, la kù àpe èsì, la ɖè lè èlã kè mù wù na àlɛ̃-fu kpàkpa nyèa ŋuti, la sɔ na àmè kèwo be sope nyè mu nya ŋutɔ cã òa!” 12David be àmèdɔ̃dɔ̃awo trɔ gbɔ̀, va ɖè ɖoŋuti kè wo xɔ̀ so Nabal gbɔ vaa, na David. 13David ɖè ègbè na wo be: “Àmè sia àmè ne sɔ yebe èwui!” Eye àmè sia àmè sɔ yebe èwui bla àkpà, eye David cã sɔ yebe èwui bla àkpà. Àgbètɔ sìgbè èkà èwo (400) nène bla àkpà, jè David yomè. Wàlɛbɛ ŋua, àgbètɔ èkà àtɔ̃ (200) ci ànyi, le ɖia woabe àgbãwo.

14Nabal be sumɔ̃viwo dòmètɔ ɖèka va kpɔ Nabal be èsrɔ̃, Àbìgaɛl. E gblɔ̃ na ɛ̀ be: “Kpɔɖa, David dɔ̃ àmè so kaka zògbè ji, va do ègbè na mia àpetɔ, vɔ̀a, mia àpetɔ mu xɔ̀ wo nyuɛ̃ ɖe ò. 15Vɔ̀a, àmè ŋuawo wɔ̀ àdɔ̀mè nyuɛ̃ na mi, wo mu wɔ̀ èvuɛ̃ ɖekpe ku mi ò, eye mi mu bu ènu ɖekpe, wàlɛbɛ kè kpata mi nɔ̀ ku wo ò, ekè mi nɔ̀ ègbe jia ò. 16Wo ɖia mi, èzã ku kedè, wàlɛbɛ kè kpata mi nyì miabe èlãwo lè ègbea jia. 17Fifìa, bù ènu kè wò la wɔ̀a ŋuti kpɔ, ɖoa, e wɔ̀ na mù be wo ɖo èvuɛ̃ ɖo mia àpetɔ ku yebe àxuedoa ŋuti vɔ̀. Ye ŋutɔ ɖo èdɛ̃ bàɖà ɖe, àleke be wo mu la teŋu gblɔ̃ ènyà ɖekpe na ɛ̀ ò.” 18Àbìgaɛl ɖèbla, sɔ kpɔ̃nɔ èkà àtɔ̃ (200), vɛ̃ ègò èvè, àlɛ̃ kè wo mè vɔ̀a àtɔ̃, èbli koloe jijenu àtɔ̃, vɛ̃ku sia sia èkpò àlɔ̀ ɖèka (100), ku èvò-kusɛ̃sɛ̃ klàko èkà àtɔ̃ (200). Àbìgaɛl sɔ ènu kèawo keŋu ɖo èsɔ-àkɛtɛwo ji. 19E ɖè ègbè na sumɔ̃viwo be: “Mì jè ŋùkɔ̀, ma jè mìa yomè.”

Vɔ̀a, Àbìgaɛl mu gblɔ̃ ènyà ɖekpe na èsrɔ̃a Nabal ò. 20Wàlɛbɛ kè Àbìgaɛl le ɖì àbù a, so ètoa godo, gbãnà lè èsɔ-àkɛtɛ ɖe jia, David ku yebe àmèawo cã le ɖì àbù a gbãnà, la va dogò wo. Nène a, e va dogò wo lè àvò mè. 21Keŋu gbɔ̀xue David ne dogò nyɔ̃nùa, David gblɔ̃ be: “Eŋuã, mù lebè na ŋusù kèa be ènuɖoɖowo keŋu lè zògbè ji gbalo, be ɖekpe mu gbà gu lè e mè ò! Àlɔ̀ ŋùgbe ye be sɔ le do àkpe na mù! 22Eŋuã, Mawu ne dɔ̃ èto na David veve ɖe, àlo, na yebe kɛ̃tɔwo, ne kaka na èsɔ̀ ŋùdekɛ̃nyɛ mèa, ma gble ŋusù ɖèka tigɔ̃ ɖo àgbè, lè Nabal be àxomè!”

23Ekè e kpɔ David gbãnàa, Àbìgaɛl ɖèbla, ɖì lè èsɔ-àkɛtɛa ji. E cɔ̃ ŋùmè ànyi, eye be jèɖɛ̀ na David. 24E va jè èklò ɖo David be àfɔ̀nu, eye be gblɔ̃ be: “Ènyè ye! Ènyè ye jè àgɔ̀a, àpetɔ! Tɔ̀ wò jɔ̀, ɖo èto ènyà kè sumɔ̃vi wò nyɔ̃nùa ji la gblɔ̃ na wòa jro! Mù ɖè kuku! 25Mù ɖè kuku na àpetɔ nyè be mu gbà sɔ èɖe lè e mè na Nabal, àmè gbalo ŋua ò. Nyikɔa#25.25 Nabal: Nabal gɔ̃mè ye nyi 'àɖàhùatɔ' sɔ̀ ku ì; yebe nyikɔ gɔ̃mè ye nyi 'Yàkàme', eye yàkàme nyinyia tɛ ɖo e ŋuti. Vɔ̀a, ènyè, sumɔ̃vi wòa, ya, nyè mu kpɔ àpetɔ nyè be àmèdɔ̃dɔ̃awo ò. 26Gãke, mù tà Tɔhonɔ̀ àgbèagbèa ku wò ŋutɔ, na àpetɔ nyè be àgbè be Tɔhonɔ̀ ye xe èmɔ na wò be wò mu gbà wù àmè ò, ne wòa ɖù kɛ̃tɔ wò ji ku wò ŋutɔ àpo àlɔ̀. Fifìa, àpetɔ bùbùtɔ, kɛ̃tɔ wòwo, àmè kèwo le ji èvuɛ̃ na àpetɔ nyèawo ku Nabal ne ɖo sòso ɖèka. 27Àpetɔ nyè ne lɔ̃ bùbu jèsìdo kè kluvi nyɔ̃nù wò hɛ̃ vaa, ne wòa sɔ na àpo ŋutimewo. 28Mù gbà le ɖè kuku na wò be wòa sɔ àgɔ̀jèje nyè kè ènyè, sumɔ̃vi wò nyɔ̃nùa. Mù kã ɖo e ji be Tɔhonɔ̀ la sɔ èfìɔɖùɖu do àsi na xòmè wò, kaka sɔ yì, ɖoa, àpetɔ nyè kplɔ̀nà Tɔhonɔ̀ be àhùawo, eye wo mu la teŋu kpɔ èvuɛ̃ ɖe lè èwò mè, lè àpo àgbèa keŋu mè ò. 29Àgbètɔ sitè, le tĩ àpetɔ nyè yomè, le ji la wù wò, vɔ̀a, Tɔhonɔ̀ butu àpetɔ nyè be àgbè ɖo àgbèagbèwo dòmè, lè Tɔhonɔ̀ Mawu wò gbɔ, eye be la sɔ kɛ̃tɔ wòwo be àgbè dãŋùgbe boo, ku Tɔhonɔ̀ be rɔbàtu. 30Wàlɛbɛ kè Tɔhonɔ̀ la wɔ̀ ɖo nyɔna be àjɔ̀gbè kè be fìã na àpetɔ nyèa ji vɔ̀a, e la ɖo èwò, àpetɔ nyè, èga ɖo Izràɛlviwo nu. 31Mu jè be àpetɔ nyè ne klɛ̃ àfɔ̀, sɔ kɔ̀ èhũ ɖɛ ò. Mu jè be àpetɔ nyè ne jè ànyi, sɔ biɔ èhlɔ̃ lè ɖokoe wò sinu ò. Ne Tɔhonɔ̀ wɔ̀ ènyuɛ̃ na àpetɔ nyèa, tɔ̀ wò jɔ̀, ɖo ŋùku sumɔ̃vi wò nyɔ̃nùa ji.” 32David ɖo e ŋuti na Àbìgaɛl be: “Mù do àkpe na Tɔhonɔ̀, Izràɛlviwo be Mawu kè dɔ̃ wò va dogò mù egbèa! 33Tɔhonɔ̀ ne tu sì na àpo ènunya, eye, ne tu sì na wò ŋutɔ, be wò na egbè be nyè mu wù àmè, ne ma sɔ ɖùji lè ɖokoe nyè sinu ò! 34Lè nyàwototo mèa, mù tà Tɔhonɔ̀ Izràɛl be Mawu àgbèagbè kè na be nyè mu wɔ̀ èvuɛ̃ ɖo ŋuti wò ò a, na wò be, ne wò mu kè va dogò mù kaba òa, kaka na èsɔ̀ fɔ̃fɔ̃ mèa, ŋusù ɖekpe mu la gbà ci àgbè lè Nabal be àxomè ò!

35David xɔ̀ ènu kè Àbìgaɛl hɛ̃ va na ɛ̀a lè nyɔ̃nùa si, eye be gblɔ̃ na ɛ̀ be: “Trɔ yì àxue lè ŋuti fàfa mè. Wò ŋutɔ wò kpɔ be mù ɖo èto àpo kuefã, eye mù xɔ̀ àlenana wòa ku àdɔ̀mè nyuɛ̃.”

36Ekè Àbìgaɛl gbɔ̀ va àxomè a, e kpɔ Naval le ɖù àzã gã ɖe, sìgbè lekè èfìɔ ɖùnà àzãa nène. Nabal lè jìjɔɛ mè, eye be mu àhà, àleke be Àbìgaɛl mu gblɔ̃ ènyà ɖekpe na ɛ̀, kaka na fɔ̃fɔ̃ mè ò. 37Kè èŋù kè a, ekè àhà a kɔ̀ na Nabal vɔ̀ a, èsrɔ̃a Àbìgaɛl gblɔ̃ ènu kèwo keŋu jɔ̀ a na ɛ̀. Ènyà a sò èji na Nabal zè ɖèka, àleke be e ci tèpe ɖèka. 38Lè ŋùkèkè èwo yomè a, Tɔhonɔ̀ gbà na ènu jè Nabal ji, eye be ku.

39Ekè David sè be Nabal kua, e gblɔ̃ be: “Kafu na Tɔhonɔ̀ kè xɔ̀ ènyà ɖo èta nyè, ɖè ŋùkpɛ̃ kè Nabal do mù a jo. Mù le do àkpe na Tɔhonɔ̀ be e na be yebe sumɔ̃via mu wɔ̀ èvuɛ̃ ò. Tɔhonɔ̀ na be Nabal be èvuɛ̃ wɔ̀wɔa jè èta ji na Nabal ŋutɔ.” Ekèa yomè a, David dɔ̃, wo yì biɔ Àbìgaɛl ta, ne bèa ɖè è. 40David be àmèdɔ̃dɔ̃awo va Àbìgaɛl gbɔ lè Karmèl, eye wo gblɔ̃ na Àbìgaɛl be: “David dɔ̃ mi ɖoɖa gbɔ wò, be wòa va trɔ zũ yè srɔ̃.” 41Àbìgaɛl sitè, cɔ̃ ŋùmè ànyi, eye be gblɔ̃ be: “Àpetɔ nyè be kluvi-nyɔnu sɔ̀gbè, la klɔ àfɔ̀ na àpetɔ nyè be sumɔ̃viwo” 42Àbìgaɛl ɖèbla, lia yebe èsɔ-àkɛtɛ ji, eye be kplɔ̀ David be àmèdɔ̃dɔ̃awo do ku yebe sumɔ̃vi nyɔ̃nùwo dòmètɔ àtɔ̃. Nène a ye Àbìgaɛl trɔ zũ David be èsrɔ̃.

43David gbà ɖè Ahinɔ̀am, kè so Izreɛl be èdù mèa. Nyɔ̃nù èvèawo nyi David be èsrɔ̃wo. 44Èfìɔ Saolò sɔ Mikàl, David be èsrɔ̃ cucugbã tɔ̀a na Paltì kè nyi Laìs, Gàlim be èdùmètɔa be èvia, be ɖè.

Currently Selected:

1Samuɛl 25: GEN

Highlight

Copy

Compare