1Samuɛl 22

David le kplɔ̀ àmèha ɖe

1Ekèa yomè a, David si jo lè Gat, eye be yì bè ɖo Adulàm be àkpãdoa mè. Ekè fòfoawo ku ètɔa be àxomètɔwo sè a, woa kpata, wo jè e yomè, yì e gbɔ, lè funua. 2So gà ŋua mèa, àmè kèwo lè tùkaɖa ku tagbã mèa, kèwo ɖù èfɛ̃a, kèwo àdɔ̀mè le vea, woawo keŋu va bɔ̀ ɖo David ŋuti. Woabe hɛ̃hlɛ̃ mè sù àgbètɔ èkà èwo (400), eye David trɔ zũ woabe kplɔ̀tɔ.

3Ekè David jo lè Adulàm be èdùa mèa, e yì Mispà, lè Mòab-nyigbã ji. David gblɔ̃ na Mòab be èfìɔa be: “Tɔ̀ wò jɔ̀, na ne ètɔ nyè ku ènɔ̀ nyè, wo ne va nɔ̀ gbɔ wò, kaka na gà kè mè mù la nya ènu kè Mawu la wɔ̀ na mù a.” 4Eye David kplɔ̀ yebe àjìtɔwo yì Mòab be èfìɔa be àxomè, eye wo ci funua, wàlɛbɛ kè kpata David nɔ̀ wawla mèa. 5Gbè ɖèkaa, Mawu be gblɔ̃ɖɛtɔ Gad gblɔ̃ na David be: “Mù gbà ci bèbèpe kèa ò. Jo yì Yudà-nyigbã ji. David jo, eye be yì Hɛrɛt be àvea mè.

Saolò na wo wù Nɔb be hũbonɔwo

6Saolò sè David ku yebe ŋutimewo be nyikɔ. E va bɔ̀bɔ̀ nɔ̀ ànyi ɖo banìti kè lè Gibeaa be ètoa jia gɔ̃mè. E le yebe èhuã ɖo àsi, eye yebe sumɔ̃viwo keŋu trɔ do è, lè ètènu. 7Saolò gblɔ̃ na sumɔ̃vi kèwo ye nɔ̀tè ɖo e gbɔawo be: “Mìa, Bɛnyamìn be jìjimèviwo, mì ɖo èto, ne mìa sè: Jesè be èvia cã la teŋu na mìa keŋu-keŋu vɛ̃-gblewoa? E la teŋu ɖo mìa keŋu-keŋu, àhùaŋùkɔ̀nɔ̀tɔwo, na gbãdãgbã èkà èwìvɔ àtɔ̃ (1000) ku na gbãdãgbã èkà èvè takpowoa (100)? Gbèɖe! 8Eye, nukɛ ŋuti ye mìa kpata, mì le bla èse ɖo ŋuti nyè ɖo ò? Àmè ɖekpe mu na, mù nya be èvi nyè ɖùzò ku Jesè be èvia ò. Àmè ɖekpe mu xà fĩ ètofĩ na mù be èvi nyèa trɔ ètamè na sumɔ̃vi nyè ɖo ŋuti nyè, ne bèa tre èmɔ̀ na mù, sìgbè lekè be nyi egbèa nène ò.”

9Edɔ̀mvi Doɛg lètè lè Saolò be sumɔ̃viwo dòmè. E gblɔ̃ be: “Gbè ɖèkaa, mù kpɔ Jesè be èvia va Ahitub be èvi, Ahimèlɛk gbɔ lè Nɔb. 10Ahimèlɛk biɔ ènu gɔ̃mè sè na ɛ̀, lè Tɔhonɔ̀ gbɔ. E yomè a, Ahimèlɛk do ènu ɖùɖu be àgbã na ɛ̀, eye be sɔ Gòliat, Filistì ŋusùa be èwuia na David.”

11Ekèa yomè a, èfìɔa na wo yɔ hũbonɔ Ahitub be èvi, Ahimèlɛk ku yebe xòmètɔ kèwo keŋu nyi Nɔb be hũbonɔwoa va. Woa kpata, wo va èfìɔa be ŋùkɔ̀. 12Saolò gblɔ̃ be: “Ahitub be èvi, ɖo èto mù!” E gblɔ̃ be: “Àpetɔ, sumɔ̃vi wò le ɖo èto.” 13Saolò gblɔ̃ na ɛ̀ be: “Nukɛ ŋuti ye wò ku Jesè be èvia, mì bla èse ɖo ŋuti nyè ɖo ò? Wò na ɛ̀ kpɔ̃nɔ ku èwui. Wò biɔ ènu gɔ̃mè Mawu sè na ɛ̀, ne bèa sitè ɖo ŋuti nyè, ne bèa tre èmɔ̀ na mù, sìgbè lekè be nyi egbèa nène.” 14Ahimèlɛk ɖo e ŋuti na èfìɔa be: “Vɔ̀a, èfìɔ bùbùtɔ, àmè ɖe lè sumɔ̃vi wòwo keŋu dòmè kè wɔ̀nà ànùkua na wɔ̀ wu David, Jesè be èvia? E nyi èfìɔ be ètoyɔvi, e ye lè ŋùkɔ̀ na gbãdãgbã kèwo ye ɖiana èfìɔ bùbùtɔa. Bùbume be nyi lè èfìɔ be àxuea mè. 15Mu nyi cucugbãa ye mù le biɔ Mawu ènu gɔ̃mè sè na David ò. Èsebla be susu ŋua mu va ètamè na mù ŋutɔ cã ò. Èfìɔ bùbùtɔ mu gbà sɔ ènyà ɖo yebe sumɔ̃vi ku xòmètɔ nyè ɖekpe ŋuti ò. Nyàwo ye be nyi be ènyà kèa mu va ètamè na mù, fli ŋutɔ cã ò.” 16Èfìɔa gblɔ̃ be: “Ku kpò mì la ku, èwò, Ahimèlɛk ku xòmètɔ wòwo keŋu!”

17Eye, èfìɔa ɖè ègbè na gbãdãgbã kèwo ye ɖiana ɛ̀, eye wo nɔ̀tè ɖo e gbɔawo be: “Mì trɔ, ne mìa wù Tɔhonɔ̀ be hũbonɔ kèawo, ɖoa, woawo cã, wo do àlɔ̀ David. Wo nya be David le si, gãkea, wo mu to na mù ò.” Vɔ̀a, Saolò be gbãdãgbãwo dòmètɔ ɖekpe mu jro be yèa tɔ àlɔ̀ Tɔhonɔ̀ be hũbonɔawo ò. 18Eye èfìɔa gblɔ̃ na Doɛg, Edɔ̀m ŋusùa be: “Wò ya, trɔ, ne wòa wù hũbonɔ kèawo!” Doɛg trɔ, eye be sɔ ye ŋutɔ be àlɔ̀ wù hũbonɔawo. Gbè ŋua gbèa, e wù àgbètɔ èkà èvè ci àtɔ̃ (85) kèwo dona èkɔ̀nu ku vɔsa be àwùawo. 19Lè Nɔb, hũbonɔawo be èdùa mèa, Saolò na wo wù ŋusùwo, nyɔ̃nùwo, ɖèviwo, vifɛ̃ hũkɔ̃ɛwo, ku ènyìwo, èsɔ-àkɛtɛwo, àlɛ̃wo kudo ègbɔwo. 20Abiatàr kè nyi Ahitub be tɔgbeyɔvi ɖèka kpò, ye nyi Ahimèlɛk be èvi kè teŋu sia. Kè e sia, e yì kpɔ David. 21Abiatàr gblɔ̃ lekè Saolò wù Tɔhonɔ̀ be hũbonɔwo ɖoa na David. 22David ɖo e ŋuti na Abiatàr be: “Gbè ŋua gbèa, mù kpɔ Doɛg, Edɔ̀m ŋusùa cã lè Nɔb. Mù nya be e la gblɔ̃ ènyà sia ènyà na Saolò. Eŋuã, ènyè ŋuti ye wo wù xòmètɔ wòwo keŋu ɖo. 23Fifìa, nɔ̀ ku mù, eye mù gbà vɔ̃ ke ò. Àmè kè la jro be yèa wù wòa, ɖo la wù mù gbɔ̀xue. Ne wò lè gbɔ nyèa, vɔ̃vɔ̃ mu gbà lè ò. Wò lè gãgã be tèpe.

Currently Selected:

1Samuɛl 22: GEN

Highlight

Copy

Compare