1Samuɛl 19

Yonatàn xɔ̀ ènyà ɖo David ta

1Saolò na èvia Yonatàn ku yebe àgbònùglawo keŋu nya be yè jro la wù David. Vɔ̀a, Saolò be èvi, Yonatàn ya lɔ̃ David ŋutɔ. 2Ekèa na be Yonatàn sìa David be: “Ètɔ nyè Saolò jro la wù wò. Èsɔ̀ ŋùdekɛ̃nyɛ mèa, wòa nɔ̀ àyè ji, ne wòa ji bèbèpe ɖe, ne wòa wla ɖo. 3Mù la to ku ètɔ nyè, mù la nɔ̀ ku ì, lè ègbe kè ji wò la nɔ̀a. Mù la gblɔ̃ ènyà wò na ɛ̀, ne ma kpɔ ènyà kè be la gblɔ̃a, ne ma va gblɔ̃ ɛ̀ na wò.”

4Eye Yonatàn kafu David na Saolò, ètɔa, eye be gbà gblɔ̃ na ɛ̀ be: “Èfìɔ bùbùtɔ mu gbà wɔ̀ ènu vuɛ̃ ɖo yebe sumɔ̃vi David ŋuti ò, ɖo David mu wɔ̀ ènu vuɛ̃ ɖekpe ɖo ŋuti wò ò. Bòhũa, yebe wɔ̀na gãwoa, ènyuɛ̃ ye wo nyi na wò. 5David sɔ yebe àgbè do àfɔ̀ku mè, wàlɛbɛ kè be ɖù Filistì ŋusùa ji, eye be wù ìa. Gbè ŋua gbèa, Tɔhonɔ̀ na jiɖùɖu gã ɖe Izràɛl dùkɔ̃a. Èfìɔ bùbùtɔ, wò ŋutɔ wò kpɔ ɛ̀, eye wò jɔ̀jì. Nukɛ ŋuti èfìɔ bùbùtɔ la wɔ̀ èvuɛ̃, la kɔ̀ àmè kè mu jè àgɔ̀ ɖe òa be èhũ ɖɛ, ne wò wù David gbaloa ɖo ò?” 6Saolò ɖo èto ènyà kè Yonatàn to na ɛ̀a, eye be ɖo e ŋuti be: “Mù tà Tɔhonɔ̀ be àgbè na wò be wo mu la wù David ò!” 7Yonatàn yɔ David, eye be ɖè ènyà kèawo keŋu na ɛ̀. E yomè a, Yonatàn kplɔ̀ David yì Saolò gbɔ, eye David gbà le sumɔ Saolò sìgbè sãa nène.

Saolò gbà glì David do

8Ekè àhùa gbà jɔ̀ a, David yì kpe àhùa ku Filistìtɔwo. E wù woabe gbãdãgbã sùgbɔ, àleke be Filistìtɔwo si lè ŋùkɔ̀ na ɛ̀.

9Gbè ɖèkaa, Saolò nɔ̀ ànyi lè àxomè, le èhuã do àsi, wàlɛbɛ kè gbɔ̃gbɔ̃ vuɛ̃ kè Tɔhonɔ̀ ɖo na ɛ̀a jè e ji. David ya le pò èkà sãŋùgu na ɛ̀. 10Zè ɖèkaa, Saolò dà èhuãa, jro la trɔ̃ David ɖo èglì ŋuti. Vɔ̀a, David zɛ̃ na èhuã kè Saolò dà a, eye èhuãa yì trɔ̃ ɖo èglìa mè. Èzã ŋua mèa, David si jo, ekè ènu ɖekpe mu wɔ̀ ɛ̀ òa.

Mikàl hlùɛ̃ David gã

11Saolò dɔ̃ àmèwo yì le ɖia David be àxue, ne woa wù ì fɔ̃fɔ̃mè. Mikàl, David be èsrɔ̃a ɖo àfɔ̀ àfɔ̀ ji na David be: “Ne wò mu si èzã kèa mè òa, wo la wù wò, èsɔ̀ ŋùdekɛ̃nyɛ mè.” 12Mikàl na David ɖì to flɛsɛ̀ nu, eye be si jo, sɔ hlùɛ̃ yebe àgbè gã. 13Ekèa yomè a, Mikàl sɔ xòmèa be àtikpàkpa mlɔ̃ David be àbàti a ji, sɔ ègbɔfu wɔ̀ èɖà ɖo èta na ɛ̀, eye be cɔ̃ àvɔ na àtikpàkpaa. 14Kè Saolò dɔ̃ àmè ɖoɖa be wo ne le David vaa, Mikàl gblɔ̃ na wo be: “E le èdɔ̀.” 15Vɔ̀a, Saolò gbà dɔ̃ àmè ɖoɖa be wo ne yì kpɔ David. E gblɔ̃ na wo be: “Mì kɔkɔ ɛ̀ ku yebe àbàti a va, ne ma wù ì!”

16Ekè àmè dɔ̃dɔ̃awo ɖo èxɔ̀a mèa, àtikpàkpaa kpò wo kpɔ lè àbàti a ji, eye ègbɔfu lè èta na ɛ̀. 17Saolò biɔ Mikàl be: “Nukɛ ŋuti ye wò blè mù nènea ɖo ò? Nukɛ ŋuti wò ɖè àsi lè kɛ̃tɔ nyè ŋuti, be si jo ɖo ò?” Mikàl ɖo e ŋuti na Saolò be: 'David ye gblɔ̃ na mù be: ɖè àsi lè ŋuti nyè, ne ma jo! Ne mu nyi nène òa, mù la wù wò!'

Saolò ku David lè Ramà

18Kè David sia, e va ɖo Samuɛl gbɔ lè Ramà. David gblɔ̃ ènu kèwo keŋu Saolò wɔ̀ ku ìa na Samuɛl. David ku Samuɛl, wo yì ci Nayɔt. 19Àmèwo va to na Saolò be: “Kpɔɖa, David lè Nayɔt, lè Ramà-nyigbã ji.” 20Saolò gbà dɔ̃ àmèwo be wo ne yì le David. Ekè àmèawo kpɔ gblɔ̃ɖɛtɔwo be èha kè Samuel le kplɔ̀a, gbɔ̃gbɔ̃ le pò woa, Mawu be gbɔ̃gbɔ̃a jè Saolò be àmèdɔ̃dɔ̃awo cã ji. 21Ekè àmèwo yì gblɔ̃ ɛ̀ na Saolòa, Saolò dɔ̃ àmè buwo ɖoɖa, vɔ̀a gbɔ̃gbɔ̃a tɔ àmè kèawo cã pòpo. Saolò gbà dɔ̃ àmè, zè ètɔ̃gɔ̃a ɖoɖa, eye gbɔ̃gbɔ̃a gbà pò woawo cã. 22E yomè a, Saolò ŋutɔ yì Ramà. Kè be ɖo èsìdo kè lè Sekua toa, e biɔ be: “Fikɛ ye Samuɛl ku David lè ò?” Àmèwo ɖo e ŋuti na ɛ̀ be: “Wo lè Nayɔt, lè Ramà.” 23Saolò yì funua. Wàlɛbɛ kè be lè èmɔa ji, le yìa, Mawu be gbɔ̃gbɔ̃a jè e cã ji. Eye wàlɛbɛ kè be gbà le zɔ̃ èmɔa, gbɔ̃gbɔ̃a le pò è kaka be ɖo Nayɔt, lè Ramà. 24Saolò cã ɖè àwù sìgbè gblɔ̃ɖɛtɔ kpɔ̀tɛawo nène, eye gbɔ̃gbɔ̃ le pò è, lè Samuɛl be ŋùmè, eye be le gblɔ̃ ènyà ɖɛ. E lè àma nènea, eye be jè ànyi, nɔ̀ funua ŋùkèkè bliboa, ku èzã bliboa keŋu-keŋu. Ekèa ŋuti ye àmèwo gblɔ̃nà be: “Saolò cã lè gblɔ̃ɖɛtɔwo dòmèa?”

Currently Selected:

1Samuɛl 19: GEN

Highlight

Copy

Compare