1Samuɛl 15

Mawu gbe Saolò

1Samuɛl gblɔ̃ na Saolò be: “Ènyè ye Tɔhonɔ̀ dɔ̃, mù do àmì èta na wò, sɔ ɖo wò èfìɔ ɖo Tɔhonɔ̀ be dùkɔ̃, Izràɛl nu. Fifìa, ɖo èto ègbè kè Tɔhonɔ̀ do àsi nyè na wòa. 2Tɔhonɔ̀, Ŋusɛ̃kpatatɔa gblɔ̃ be: “Mù la ɖo ènu kè Àmàlɛktɔwo wɔ̀, ekè wo xe èmɔ na Izràɛl be dùkɔ̃a, wàlɛbɛ kè Izràɛlviwo to so Ejiptè be ànyigbã jia tèpe na wo. 3Fifìa, wò la yì kpe àhùa ku Àmàlɛktɔwo. Wò la gbã ènu kèwo nyi Àmàlɛkviwo tɔ̀awo keŋu gudu-gudu, ŋuzĩzĩ màku. Wò la wù ènu àgbèagbèwo kpata: ŋusù ku nyɔ̃nù, ɖèvi ku vifɛ̃, ènyì ku àlɛ̃, èsɔ-kpotɔnɔ̀ ku èsɔ-àkɛtɛ.”

4Saolò yɔ àhùakɔ̃a bɔ̀, eye be hlɛ̃ àmèawo lè Telɛ̀m. Àfɔ̀zɔ̃tɔwo lè àmè hotu àlɔ̀ ɖèka (200000). Àmè hotu àtɔ̃ (10000) so Yudà be ànyigbã ji. 5Ekè Izràɛl be àhùakɔ̃a ɖo Àmàlɛk be èdùa gbɔa, Saolò doxa ɖo èsì wɔ̀adã be bàlìa mè. 6E yomè a, Saolò gblɔ̃ na Kenìtɔwo be: “Mì jo, mì to, lè Àmàlɛktɔwo dòmè, ne mì mu gbà crɔ̃ ku wo ò, ɖoa, mìa ya, mì wɔ̀ àdɔ̀mè nyuɛ̃ na Izràɛlviwo kpata, wàlɛbɛ kè wo to so Ejiptè be ànyigbã jia.” Eye Kenìtɔwo to jo lè Àmàlɛktɔwo dòmè. 7E yomè a, Saolò kpe àhùa ku Àmàlɛktɔwo, eye be ɖù woa ji, so Havilà kaka va Sur, lè Ejiptè be ànyigbã a be èwèzɛ̃pe. 8Saolò le Agag, Àmàlɛktɔwo be èfìɔa, àgbèagbè, eye be sɔ èwui crɔ̃ dùkɔ̃a keŋu-keŋu. 9Vɔ̀a, Saolò ku yebe gbãdãgbãwo gble Agag ku èlã kèwo ye nyɔ wu lè èlãhawo dòmèawo, ènyì, àlɛ̃, èlã kèwo keŋu lè sɛ̃sɛ̃ɖeawo kudo àlɛ̃vi gbàkudo èlã kèwo keŋu gbe nyɔ kpòa ɖo àgbè. Èlã kèwo mu ɖì ènu ɖe òa kpò Saolò ku yebe gbãdãgbãwo crɔ̃. 10Ekèa yomè a, Tɔhonɔ̀ pò nupo na Samuɛl gblɔ̃ be: 11“E ve mù be mù sɔ Saolò ɖofìɔ, ɖoa, e trɔ lè yo nyè mè, eye mu wɔ̀ ɖo àpe ɖoɖo nu ò.” Samuɛl titɔ eye be fã yɔ Tɔhonɔ̀, èzã bliboa keŋu.

12Samuɛl fɔ̃-zã be yèa yì kpɔ Saolò. Vɔ̀a, wo to na Samuɛl be: “Kè Saolò va ɖo Karmèl be èdùa mèa, e wɔ̀ ŋùkuɖojikpe ɖe na ye ɖokoe. E yomè a, e yì yebe èmɔzɔ̃zɔ̃a ji, va yì Gilgàl. 13Ekè Samuɛl yì Saolò gbɔa, Saolò gblɔ̃ na Samuɛl be: “Tɔhonɔ̀ tu sì na wò! Mù wɔ̀ ɖo Tɔhonɔ̀ be ènyàa ji.” 14Samuɛl biɔ Saolò be: “Àlɛ̃ ku ègbɔ be àpa ku ènyì be fãfã kɛwo ye mù le sè, wo le ɖì ɖo èto mè na mù ŋua ò?” 15Saolò ɖo e ŋuti be: “Gbãdãgbãwo ye kplɔ̀ wo so Àmàlɛktɔwo gbɔ va. Gbãdãgbãwo gble èlã kèwo ye nyɔawo ɖo àgbè, ne woa sɔ savɔ na Tɔhonɔ̀, Mawu wòa. Vɔ̀a, èlã kpɔ̀tɛawo ya, mi crɔ̃ wo keŋu-keŋu. 16Samuɛl sò ènyàa lè e nu be: “E sù! Ma ɖo ègbè kè Tɔhonɔ̀ do àsi na mù, egbè èzã mèa na wò.” Saolò ɖo e ŋuti na be Samuɛl be: “Pò nupo.”

17Samuɛl gblɔ̃ na Saolò be: “Togbɔ be wò mu bùnà ɖokoe wò be wò nyi ènu ɖe òa, mu nyi èwò ye lè Izràɛlviwo be kɔ̀tawo keŋu be ŋùkɔ̀a? Tɔhonɔ̀ ye do àmì èta na wò, sɔ wò, sɔ ɖo èfìɔ ɖo Izràɛlviwo nu. 18Tɔhonɔ̀ dɔ̃ wò ɖoɖa àhùagbe ji, eye be gblɔ̃ na wò be: “Yì, wò la crɔ̃ Àmàlɛktɔ, èvuɛ̃wɔ̀tɔ kèawo. Wɔ̀ àhùa ku wo, ne wòa crɔ̃ wo keŋu-keŋu. 19Nukɛ ŋuti wò mu ɖo èto Tɔhonɔ̀ be ègbè ò? Nukɛ ŋuti ye wò zrò jè ènu kèwo wo hlà so àhùagbe jiawo ji ɖo, eye wò wɔ̀ ènu kè mu nyɔ ò, lè Tɔhonɔ̀ be ŋùmè ɖo ò?” 20Saolò ɖo e ŋuti na Samuɛl be: “Mù zɔ̃ ɖo Tɔhonɔ̀ be ègbè ji e. Mù yì àhùagbe ji, lè àfi kè Tɔhonɔ̀ ɖo mù ɖoɖaa. Mù crɔ̃ Àmàlɛktɔwo keŋu eye mù le woabe èfìɔ Agag gbɔ̀. 21Gbãdãgbã nyèwo sɔ lè èlã kèwo ye nyɔ wu lè ekèwo mi ɖo la crɔ̃awo dòmè, ne woa sɔ savɔ na Tɔhonɔ̀, Mawu wòa, lè Gilgàl. 22Eye Samuɛl biɔ Saolò be: “Ɖe ye ènumème vɔsa ku àkpedo vɔ̀sawo jènà Tɔhonɔ̀ be ŋùmè wu ètoɖoɖo Tɔhonɔ̀ be ègbèa? Gbèɖe! Ètoɖoɖo nyɔ wu vɔsa, eye ènusèse nyɔ wu àgbò be àmì. 23Ɖoa, ètonu màsè sɔ̀ ku nuvuɛ̃ kè nyi àfãkãkã, eye àglajèje sɔ̀ ku àze. Ekèa ŋutia, kè wò gbe Tɔhonɔ̀ be ɖoɖowoa, Tɔhonɔ̀ cã gbe wò. Wò mu la gbà nyi Tɔhonɔ̀ be dùkɔ̃a be èfìɔ ò.” 24Saolò ɖo e ŋuti na Samuɛl be: “Mù wɔ̀ èvuɛ̃. Mù dà Tɔhonɔ̀ be ègbèɖèɖe ku àpo ènyà ji. Lè nyàwototo mèa, mù vɔ̃ gbãdãgbãwo, eye mù wɔ̀ ènu kè wo jro a. 25Tɔ̀wò jɔ̀, sɔ èvuɛ̃ nyèa kè mù, eye trɔ va ku mù, ne ma teŋu yì sɛ̃ Tɔhonɔ̀.” 26Samuɛl ɖo e ŋuti na Saolò be: “Nyè mu la trɔ va ku wò ò, ɖoa, wò gbe Tɔhonɔ̀ be ègbè. Tɔhonɔ̀ cã gbe wò, eye wò mu gbà nyi Izràɛlviwo be èfìɔ ke ò.”

27Kè Samuɛl trɔ la joa, Saolò le yebe àwù vlàyàa be ètomè, eye àwùa zɛ̃, ci àlɔ̀ mè na ɛ̀. 28Samuɛl gblɔ̃ na Saolò be: “Lekea ye Tɔhonɔ̀ zɛ̃ èfìɔɖùɖu wòa lè àsi wò egbèa, sɔ le na àmè bu kè nyɔ wu wòa. 29Tɔhonɔ̀, Izràɛl be gogoa mu ɖànà àjè ò, eye mu trɔna ènyà ò, ɖoa, mu nyi àgbètɔ, ne bèa nɔ trɔ ò.” 30Saolò gbà gblɔ̃ be: “Mù jè àgɔ̀! Gãkea, mù ɖè kuku na wò, do bùbu ŋuti nyè, lè Izràɛl dùkɔ̃a be àmè sĩsĩwo ku dùkɔ̃a be ŋùmè. Gbìgbɔ̀ trɔ va, ne mia yì sɛ̃ Tɔhonɔ̀, Mawu wòa. 31Samuɛl kplɔ̀ Saolò, eye Saolò yì sɛ̃ Tɔhonɔ̀.

32Ekèa yomè a, Samuɛl gblɔ̃ be: “Mì kplɔ̀ Agag, Àmàlɛktɔwo be èfìɔa va na mù.” Agag zɔ̃ ku kãkã ɖo ji, va Samuɛl gbɔ. Agag le gblɔ̃ lè ye ɖokoe mè be: “Kãkã ɖo ji va be èku be vevesèse ya to lè e mè.” 33Samuɛl gblɔ̃ be: “Sìgbè lekè èwui wò ɖè èviwo be àgbè lè àjìnɔ̀wo si nènea, nènea ke ye ènɔ̀ wòa cã, lè nyɔ̃nùwo dòmèa, la bu èvia be àgbè!” Eye, Samuɛl wù Agag lè Tɔhonɔ̀ be ŋùmè, lè Gilgàl.

34Samuɛl jo yì Ramà, eye Saolò trɔ yì àxue, lè Gibea. 35Samuɛl mu gbà kpɔ Saolò kpɔ kaka ku ò. Samuɛl sè veve ɖo Saolò ŋuti, eye be ve Tɔhonɔ̀ be yè sɔ Saolò ɖofìɔ ɖo Izràɛl nu.

Currently Selected:

1Samuɛl 15: GEN

Highlight

Copy

Compare