1Samuɛl 14

Yonatàn ɖù Filistìtɔ ɖewo ji

1Gbè ɖèkaa, Yonatàn, Saolò be èvia gblɔ̃ na ɖèkajɛ kè nyi yebe àdèkplɔ̀vi a be: “Va mia gogo Filistìtɔwo be èmɔjikpɔtɔ kèwo ye jè ŋùkɔ̀ mi, lè àgo ɖèa jiawo.” Vɔ̀a, Yonatàn mu sìa ètɔa Saolò ò. 2Saolò ya nɔ̀ ànyi ɖo yòvobòɖa-ti gɔ̃mè, lè Migrɔ̀n, lè Gibea be lipòa ji. Gbãdãgbã kèwo ye lè e ŋutiawo sù àgbètɔ àlɔ̀ àdɛ̃. 3Hũbonɔ kè do dàbla, eye be hɛ̃ ènu kɔ̀kɔ̀ɛawoa ye nyi Ahiyà, kè le nyi Tɔhonɔ̀ be hũbonɔ, Eli kè nɔ̀ Silòa be èvi Pineas be èvi Ahitub be nɔ̀vi kè nyi Ikavɔd be èvi. Dùkɔ̃a mu nya be Yonatàn jo ò.

4Ekpe cɔ̃kui èvè lè àkpa ɖe sia ɖe na ètomè be èmɔ̃ kè Yonatàn jro be yèa to yì jè Filistìtɔwo be èmɔjikpɔtɔwo jia be èmɔa nu. Wo yɔna èkpe cɔ̃kuiawo dòmètɔ ɖèka be Bosɛz, eye wo yɔna èvègɔ̃a be Senè. 5Èkpe cɔ̃kui kèawo dòmètɔ ɖèka lè àvego, jè ŋùkɔ̀ Mikmas be èdùa, eye èvègɔ̃a lè àpùgo, jè ŋùkɔ̀ Gebà. 6Yonatàn gblɔ̃ na yebe àdèkplɔ̀vi a be: “Va mia yì kaka àtɔ̀tɔ̀nɔ̀ ŋuawo be èmɔ ji kpɔpea. Èta mu nyɔ òa, Tɔhonɔ̀ la dɔ̃ mia ji. Ɖoa, ènu ɖekpe mu teŋu xe èmɔ na Tɔhonɔ̀, ne bèa na mia ɖùji, ne mi sùgbɔ, àlo, ne mi mu sùgbɔ òa. 7Àdèkplɔ̀via ɖo e ŋuti be: “Gbe wɔ̀ ènu kè gbe lè èjì mè na wò kpòa! Àlekè wò jro ɖoa, jè ŋùkɔ̀, mù la nɔ̀ yo wò mè!” 8Eye Yonatàn gblɔ̃ be: “E nyɔ! Mi la tùtà àmè kèawo gbɔ, ne woa kpɔ mi. 9Ne wo gblɔ̃ na mi be: 'Mì nɔ̀tè kaka mia va mìa gbɔa!' Mi la nɔ̀tè, eye mi mu la gogo wo ò. 10Vɔ̀a, ne wo gblɔ̃ na mi be: 'Mì va èji lè àfi kèa!' Eŋuã, mi la yì, ɖoa, e la nyi jèsìdo na mi be Tɔhonɔ̀ sɔ wo do àsi na mi.”

11Nène a, Yonatàn ku yebe àdèkplɔ̀vi a na Filistìtɔwo be èmɔjikpɔtɔwo kpɔ wo àmè èvèawo. Filistìtɔwo gblɔ̃ be: “Ãhã! Hebrùviwo ye nyi ekèawo le to so èdo kèwo mè wo bè ɖoa!” 12Èmɔjikpɔtɔawo gblɔ̃ na Yonatàn ku yebe àdèkplɔ̀vi a be: “Mì va èji lè àfi kèa, mia fiɔ mì, mìa kpɔ!” Yonatàn gblɔ̃ na yebe àdèkplɔ̀vi a be: “Kplɔ̀ mù do, va èjia; Tɔhonɔ̀ sɔ wo do àsi na Izràɛlviwo.” 13Yonatàn sɔ àfɔ̀ ku àlɔ̀wo lia èjia, eye, yebe àdèkplɔ̀vi a kplɔ̀ ɛ̀ do. Yonatàn le pò Filistìtɔwo pu ànyi, eye yebe àdèkplɔ̀vi a le wù wo, lè e yomè. 14Cucugbɔ̃a kèa, kè Yonatàn ku yebe àdèkplɔ̀vi a yì jè Filistìtɔwo ji, lè tèpe ɖe kè mu kèkè ŋutɔ cã òa, wo wù àgbètɔ sìgbè èwì nène, lè Filistìtɔwo dòmè. 15Vɔ̃vɔ̃ ɖɔ àsàɖa keŋu mè, vɔ̃vɔ̃ ɖɔ àgblèa ji keŋu pòxla, vɔ̃vɔ̃ ɖɔ Filistìtɔwo be dùkɔ̃ bliboa. Vɔ̃vɔ̃ ku àdìka sò àmè bla èmɔjikpɔtɔawo ku ènugbã-hùakɔ̃a, eye wo le pò tìtìtì. Ànyigbã a hũhũ, eye Mawu be vɔ̃vɔ̃ jè àmè sia àmè ji.

16Lè Gibea, lè Bɛnyamìn-nyigbã jia, Saolò be èmɔjikpɔtɔwo le kpɔ ènu kè le jɔ̀ a. Wo kpɔ àmèha a lè èdù ji, kãkã ètɔ bu, ènɔ̀ bu. 17Saolò gblɔ̃ na yebe gbãdãgbãwo be: “Mì hlɛ̃ àmèha a, ne mìa kpɔ be àmè kɛ ye jo lè mia dòmè mà.” Gbãdãgbãawo hlɛ̃ àmèhaa, eye wo kpɔ be Yonatàn ku yebe àdèkplɔ̀vi a ye mu lè ò. 18Saolò gblɔ̃ na Ahiyà, hũbonɔa be: “Sɔ Tɔhonɔ̀ be àɖakà kɔ̀kɔ̀ɛa va.” Gbè ŋua gbèa, Tɔhonɔ̀ be àɖakà kɔ̀kɔ̀ɛa lè Izràɛlviwo dòmè. 19Vɔ̀a, wàlɛbɛ kè Saolò le pò nupo na hũbonɔa, zigìdi a gbà le yì e ji kpe è lè Filistìtɔwo be àsàɖaa mè. Ekèa na be Saolò gblɔ̃ na hũbonɔa be: “Ɖè àsi gbɔ̀xue”.

20Saolò bɔ̀ yebe àhùakɔ̃a eye wo yì kɔ̀ ɖo àhùa gbea ji. Vɔ̀a kpɔɖa, àhùa gbea ji lè hũnyà-hũnyà, eye Filistìtɔwo ŋutɔ ɖè èwui ɖo woa nɔ̀nɔwo dòmè, le wù woa nɔ̀nɔwo. 21Hebrùvi kèwo ye wɔ̀nà èdɔ lè Filistìtɔwo gɔ̃mè, eye wo lè Filistìtɔwo ji sãawo trɔ va Izràɛlviwo ji, lè Saolò ku Yonatàn yomè. 22Ekè Izràɛl be ŋusù kèwo keŋu bè ɖo Efràyim be ètowo mèawo sè be Filistìtɔwo le si lè àhùa nua, wo to va, jè Filistìtɔwo yomè ku èwui. 23Tɔhonɔ̀ na Izràɛlviwo ɖùji gbè ŋua gbè, eye àhùaa yì e ji kaka va gbã to Bɛt-Avɛn be èdùa ŋuti.

Gbàdagbãwo hlùɛ̃ Yonatàn gã

24Izràɛl ŋusùwo ɖù àyà gbè ŋua gbè, ɖoa, Saolò kã àtãŋu be: “Hèlu na ŋusù kè la ɖùnu, gbɔ̀xue èzã ne do, gbɔ̀xue ma biɔhlɔ̃ kɛ̃tɔ nyèwo!” Ekèa ŋutia, ŋusù ɖekpe mu ɖùnu gbè ŋua gbè ò. 25Gbè ŋua gbèa, Izràɛlviwo be gbãdãgbãwo va ɖo àve ɖe kè mè ànyisi lè kaka va kɔ̀ ɖo ànyigbãa. 26Kè àhùakɔ̃a va ɖo àvea mèa, e kpɔ ànyisi kè le kɔ̀ ɖo ànyigbãa, vɔ̀a, àmè ɖekpe mu tɔ ɛ̀ àsi, sɔ yì ènu gbɔ ò, ɖoa, dùkɔ̃a le vɔ̃ Saolò be kpɛ̃sɛ̃a. 27Vɔ̀a, Yonatàn mu sè be ye tɔ sɔ kpɛ̃sɛ̃ ɖo àjɔ̀gbè ènu na dùkɔ̃a ò. Yonatàn drɛ̃ àlɔ̀, sɔ àtikplɔ kè lè àlɔ̀ mè na ɛ̀a tɔ ànyisia mè, sɔ ɛ̀ yì ènu gbɔ, eye yebe ŋùkuvi ji kɔ̀ zè ɖèka. 28Àmè kèwo lè funuawo dòmètɔ ɖèka to na ɛ̀ be: “Ètɔ wò ɖo àjɔ̀gbè ènu na dùkɔ̃a be: 'Hèlu na ŋusù kè la ɖùnu egbèa.' Ekèa na be dùkɔ̃a gbɔjɔ.” 29Yonatàn ɖo e ŋuti be: “Ètɔ nyè do jɔ̀gbèvuɛ̃ àsi na dùkɔ̃a. Mì kpɔ lekè ŋùmè kɔ̀ na mù, kè mù sɔ ànyisi vi kèa kpò do ènu mè ɖa! 30Eye, ne ɖe ye egbèa, àhùakɔ̃a ɖù lè ènu kè wo xɔ̀ lè kɛ̃tɔwo sia mèa, mi mu la crɔ̃ kɛ̃tɔwo wu leke òa?”

31Gbè ŋua gbèa, Izràɛlviwo ɖù Filistìtɔwo ji so Mikmas, kaka va ɖo Ayalɔ̀n, àleke be ènu tìkɔ̀ na gbãdãgbãwo. 32Ekèa na be wo zrò jè ènu kèwo wo xɔ̀ lè àhùagbe jiawo ji. Wo le àlɛ̃wo, ènyìwo ku ènyìviwo. Wo wù wo, eye àhùakɔ̃a ɖù èlãa lè àfi kè wo kɔ̀ èhũ ɖɛ lèa. 33Ènyà kèa ɖo Saolò be ètowo mè. Àmèwo gblɔ̃ na ɛ̀ be: “Àhùakɔ̃a le wɔ̀ ènuvuɛ̃ ɖo Tɔhonɔ̀ ŋuti, wàlɛbɛ kè be le ɖùnu lè àfi kè wo kɔ̀ èlãwo be èhũ ɖɛ lèa!” Saolò ɖo e ŋuti be: “Àmè sàtɔwo ye mì nyi! Mì mlì èkpe gã ɖe va na mù fifìjɛ̃!” 34Saolò gbà glɔ̃ be: “Fifìa, mì kãkã ɖo dùkɔ̃a dòmè, ne mìa gblɔ̃ na àmèawo be: 'Àmè sia àmè ne sɔ yebe ènyì, àlo yebe ègbɔ va na mù. Mì la wù wo, eye mì la ɖù èlãawo lè fikèa. Nène a, mì mu la jè àgɔ̀ do Tɔhonɔ̀, ne mì ɖù èlãa lè àfi kè wo kɔ̀ èhũa ɖɛ lèa ò. Èzã ŋua mèa, lè àhùakɔ̃ bliboa mèa, àmè sia àmè sɔ èlã kè be lea va, eye wo wù wo lè funua. 35Nène a ye Saolò tù vɔsakpe na Tɔhonɔ̀. Ekè ye nyi vɔsakpe cucugbã kè be tù na Tɔhonɔ̀a.

36Ekèa yomè a, Saolò ɖè ègbè be: “Mì va mia hɔ̃, kplɔ̀ Filistìtɔwo do, lè èzã kèa mè, ne mia xɔ̀ woabe ènuwo keŋu lè woa si, àleke be, kaka èŋù ne kèa, mi mu gbà gble Filistìtɔ ɖèka tigɔ̃ ɖo àgbè ò.” Saolò be gbãdãgbãwo ɖo e ŋuti be: “Wɔ̀ ènu kè wò kpɔ be e nyɔa.” Gãkea, hũbonɔa gblɔ̃ be: “Mia sɔ ɛ̀ ɖo Mawu be ŋùmè gbɔ̀xue.” 37Saolò biɔ Mawu be: “Ɖe ye mù teŋu hɔ̃ jè Filistìtɔwo yomè a? Wò la sɔ wo do àsi na mia?” Gbè ŋua gbèa, Mawu mu ɖo ènyàa ŋuti na Saolò ò.

38E yomè a, Saolò gblɔ̃ be: “Mìa, dùkɔ̃a be ŋùkɔ̀nɔ̀tɔwo keŋu, mì va bɔ̀ ɖo fikèa. Mì jrò mìa ɖokoewo dòmè nyuɛ̃ ɖe kpɔ, be ènu vuɛ̃ kɛ ye mì wɔ̀ egbèa màa. 39Ɛ̃ɛ, mù tà Tɔhonɔ̀, Mawu àgbèagbè, Izràɛl be hlùɛ̃tɔa na mì be, àmè kè jè àgɔ̀a, ne e nyi èvi nyè Yonatàn ŋutɔ cã a, èku kpò be la ku!” Eye, lè àhùakɔ̃ bliboa, mèa, àmè ɖekpe mu kè ènu, ɖo ènyàa ŋuti ò. 40Saolò gbà gblɔ̃ na Izràɛl dùkɔ̃a be: “Mìa kpata mì yì àkpa ɖèka, eye ènyè ku èvi nyè Yonatàn cã, mi la yì àkpa bu.” Àhùakɔ̃a ɖo e ŋuti na Saolò be: “Wɔ̀ ènu kè wò kpɔ be e nyɔa.” 41Saolò fãkue, yɔ Tɔhonɔ̀ be:#14.41 Lè ŋɔ̀ŋlɔ̃ ɖewo mèa, wo gblɔ̃ be: “Izràɛl be Mawu, nukɛ ŋuti ye wò mu ɖo ènyàa ŋuti na mi egbèa ò? Tɔhonɔ̀, ɖo ènyàa ŋuti na mi. Ne àgɔ̀jèjea so èvi nyè Yonatàn gbɔ, àlo nyè ŋutɔ gbɔ nyèa, Tɔhonɔ̀ ɖè è fiɔ, to ènu mè kùku kɔ̀kɔ̀ɛ mè. “Izràɛl be Mawu, ɖo ènyàa ŋuti na mù keŋu-keŋu, zè ɖèka.” Ekèa yomè a, ɖoŋutia#14.41 Lè ŋɔ̀ŋlɔ̃ buwo mèa, wo gblɔ̃ àkàdodo be ènyà. fiɔ àsi Saolò ku èvia Yonatàn be woawo ye jè àgɔ̀a. Ènu mè kùkua ɖè àhùakɔ̃a keŋu to lè e mè.

42Saolò gbà gblɔ̃ be: “Mì do àkàa na nyè ku èvi nyè Yonatàn, sɔ biɔ àgɔ̀jèjea gɔ̃mè sè.” Kè wo do àkàa, àkàa fiɔ àsi Yonatàn. 43Saolò gblɔ̃ na èvia Yonatàn be: “Gblɔ̃ ènu kè wò wɔ̀a na mù, ma sè.” Yonatàn ɖo e ŋuti na Saolò be: “Ɛ̃ɛ, mù sɔ àtikplɔ kè lè àlɔ̀ mè na mù a be ènugbɔ tɔ ànyisi mè, sɔ ɖɔ kpɔ, kpɔɖa, fifìa, mù sɔ̀gbè ne ma ku.” 44Eye Saolò gblɔ̃ be: “Tɔhonɔ̀ ne na mù ètodɔ̃ kè sɛ̃ŋu wu ètodɔ̃wo kpataa, ne wò mu ku òa, Yonatàn. 45Vɔ̀a àhùakɔ̃a gblɔ̃ na Saolò be: “Yonatàn kè na àhùakɔ̃a kpɔ jiɖùɖu gã kèa la jo kua? Gbèɖe! Kaka kè Tɔhonɔ̀ lè àgbèa, mi mu la lɔ̃ Yonatàn be èɖà kui ɖèka la gɛ̃ jè ànyigbã ò, ɖoa, Mawu be ŋusɛ̃ ye be sɔ ɖùji egbèa! Lekea ye àhùakɔ̃a hlùɛ̃ Yonatàn be àgbè gã. 46Saolò trɔ gbɔ̀ va èto a ji, so Filistìtɔwo yomè eye Filistìtɔwo cã trɔ yì woa de.

Saolò be èjiɖùɖuwo

47So gà kè mè Saolò trɔ zũ èfìɔ lè Izràɛlviwo nua, e wɔ̀ àhùa ku yebe kɛ̃tɔ kèwo ye trɔ do èa. E wɔ̀ àhùa ku Mòab be dùkɔ̃a, Amɔ̀n be dùkɔ̃a, Edɔ̀mtɔwo, Sobà be èfìɔ ku Filistìtɔwo, eye, àfi si àfi kè Saolò trɔ ɖoɖaa, èji kpò be ɖùnà. 48Saolò gbà ɖè yebe kãlìwɔ̀wɔ fiɔ, wàlɛbɛ kè be ɖù Àmàlɛktɔwo jia. Lekea ye be hlùɛ̃ Izràɛlviwo gã so àmè kèwo ye fĩnà woabe ènu-nɔ̀amèsiawo si mè.

49Saolò be ŋusùviwo ye nyi: Yonatàn, Yisvì, ku Malki-Sùa. Nyɔ̃nùvi èvèawo be nyikɔwo ye nyi: Merav àmègãxoa, eye Mikàl jɔ̀ ɖo e yomè. 50Saolò be èsrɔ̃ be nyikɔ ye nyi Ahinɔ̀am. E nyi Ahimas be èvi. Ner kè nyi Saolò be àtàvia be èvi Abnɛ̀r ye nyi yebe àhùaŋùkɔ̀nɔ̀tɔ. 51Kis kè nyi Saolò be ètɔa ku Ner kè nyi Abnɛ̀r be ètɔa, wo nyi ètɔ ɖèka be èviwo, eye woa tɔ ye nyi Abiɛl.

52Wàlɛbɛ kè Saolò le ɖùfìɔa, e wɔ̀ àhùa ku Filistìtɔwo ŋutɔ. Ekèa ŋuti ye, ne Saolò kpɔ be àmè ɖe lè kè nyi kãlìwɔ̀tɔ, àlo e trì àgbà kpòa, e xɔ̀nà àmèa ɖo yebe àhùakɔ̃a mè.

Currently Selected:

1Samuɛl 14: GEN

Highlight

Copy

Compare