1Samuɛl 13

Saolò be àhùawɔ̀wɔwo

Àgla jèje ɖo Filistìtɔwo ŋuti

1Saolò ɖo èpè ègbã #13.1 Lè ŋɔ̀ŋlɔ̃ buwo mèa, èpè èkà ye wo ŋlɔ̀. Lè èbuwo mèa, wo mu ŋlɔ̀ èpè ɖekpe ò, ɖoa, lè Hebrùgbe be ŋɔ̀ŋlɔ̃ xoxoa mèa, ŋɔ̀ŋlɔ̃ a mu ze nyuɛ̃ ɖe ò. Gà kè mè wo ɖo è èfìɔa, eye be ɖùfìɔ èpè ègbã vɔ èvè. Lè ŋɔ̀ŋlɔ̃ ɖewo mèa, wo gblɔ̃ be e ɖùfìɔ èpè èvè lè Izràɛlviwo nu, eye lè àfi buwoa, wo gblɔ̃ be èpè ɖèka. lè Izràɛlviwo nu. 2Saolò cã gbãdãgbã hotu ɖèka èkàwì vɔ àtɔ̃ (3000) lè Izràɛlviwo dòmè. Hotu ɖèka (2000) nɔ̀ ku ye ŋutɔ, lè Mikmas, ku Betɛ̀l be ètoawo tamè. Àmè èkà wìvɔ àtɔ̃ (1000) nɔ̀ ku Yonatàn, Saolò be èvia, lè Gibea, lè Bɛnyamìn-nyigbã ji. Saolò ɖo Izràɛlvi kpɔ̀tɛawo ɖoɖa àxomè.

3Gbè ɖèkaa, Yonatàn wù Filistìtɔwo be èdùjikpɔtɔ kè lè Gebàa, eye Filistìtɔwo sè è. Saolò na wo ku èzè lè ànyigbã bliboa kpata ji, eye be gblɔ̃ be: “Hebrùviwo ne sè è!” 4Izràɛlviwo kpata sè ènyàa be Saolò wù Filistìtɔwo be èdùjikpɔtɔa, eye Filistìtɔwo do àdɔ̀mèze gã ɖe do Izràɛlviwo. Ekèa ŋutia, Izràɛlviwo be àhùakɔ̃a sitè lè Saolò yomè, eye wo va bɔ̀ lè Gilgàl. 5Filistìtɔwo cã bla àkpà ɖo Izràɛlviwo ŋuti. Woabe àhùakɔ̃a ɖo àhùakèke hotu woeàtɔ̃, èsɔdotɔ hotu ètɔ̃ eye woabe gbãdãgbãwo sùgbɔ sìgbè èkɔkuiwo nène. Wo va do àsàɖa ɖo Mikmas, lè èwèzɛ̃pe na Bɛt-Avɛn. 6Kè Izràɛl be gbãdãgbãwo kpɔ be yèwo be kɛ̃tɔwo sùgbɔ, eye wo ɖo àhùawɔ̀nu sùgbɔ wu yèwoa, wo si yì bè ɖo àkpãdowo, èdowo, àkpã fɛ̃fɛ̃wo, ègũ mèdowo ku èsìdowo mè. 7Woa dòmètɔ ɖewo sò Yɔrdàn be ètɔ̀a, va yì bè ɖo Gad ku Gilead-nyigbãwo ji. Wàlɛbɛ ŋua, Saolò gbà kpɔ̀tɔ̀ lè Gilgàl, eye yebe àhùakɔ̃a le pò tìtìtì ku vɔ̃vɔ̃. 8Saolò nɔ̀tè kpɔ Samuɛl ŋùkèkè adrɛ̃ kè Samuɛl ɖoa, vɔ̀a, Samuɛl mu va Gilgàl ò. Ekèa na be gbãdãgbãwo trɔ lè Saolò yomè eye wo tɔ kãkãa. 9Saolò gblɔ̃ be: “Mì sɔ èlãwo va, ne mia wɔ̀ vɔsa mème ku àvũlele vɔsa.” Eye Saolò ŋutɔ wɔ̀ vɔsa bliboa. 10Wàlɛbɛ kè Saolò le wu vɔsa mèmea nua, Samuɛl va ɖo. Saolò to va yì dogò è, ne bèa dogbè na ɛ̀. 11Samuɛl gblɔ̃ na Saolò be: “Nukɛ wò wɔ̀ ŋua ò?” Saolò ɖo e ŋuti be: “Ekè mù kpɔ be dùkɔ̃a le trɔ lè yomè na mù, jo le kãkã, eye wò ŋutɔ cã, wò mu le va ɖo lekè mi gblɔ̃ ɛ̀a ji ò, eye veve tɔa, kè Filistìtɔwo va bɔ̀ ɖo Mikmas be èdùa mèa, 12Mù gblɔ̃ be “Fifìa, Filistìtɔwo la sɔ àhùa va kɔ̀ ɖo mia ji, lè Gilgàl, vɔ̀a, mi mu kpɔ sɔ mia ɖokoewo do Tɔhonɔ̀ si mè ò. Ekèa ŋuti ye mù sɔ ɛ̀ ɖo ɖokoe nyè ji, eye mù wɔ̀ vɔsa mèmea.” 13Samuɛl gblɔ̃ na Saolò be: “Ènu fùflu ye wò wɔ̀ ŋua ɛ̀! Wò mu zɔ̃ ɖo ɖoɖo kè Tɔhonɔ̀, Mawu wò do àsi na wòa ji ò ɖe! Ne mu nyi nène òa, Tɔhonɔ̀ la kè sɔ èfìɔɖùɖu kòkòɖàbì do àsi na wò e! 14Fifìa, àpo èfìɔɖùɖu mu gbà la yì ŋùkɔ̀ ò! Ekè wò mu zɔ̃ ɖo ɖoɖo kè Tɔhonɔ̀ do àsi na wòa ji òa, Tɔhonɔ̀ cã ŋusù bu kè jɔ̀jì na ɛ̀a, sɔ ɖo yebe dùkɔ̃a nu.”

15Samuɛl jo, eye be jè èmɔ, lia ètoa so Gilgàl, tùtà Gibea, lè Bɛnyamìn-nyigbã ji. Saolò yaa, hlɛ̃ yebe àhùakɔ̃ kè kpɔ̀tɔ̀ na ɛ̀a kpɔ: Woa kpata, wo la nɔ̀ àmè àlɔ̀ àdɛ̃ (600). 16Saolò ku èvia Yonatàn kudo àhùakɔ̃ kè lè woa yomè a ci Gibea, lè Bɛnyamìn-nyigbã ji, wàlɛbɛ kè Filistìtɔwo be àsàɖaa lè Mikmas. 17Filistìtɔwo be àhùakɔ̃ trìakɔ a to so woabe àsàɖa a mè, eye wo va ɖo ɖoɖo ètɔ̃ nu. Woabe mamã ɖèka ɖota Ɔfrà, lè Sual-nyigbã ji. 18Mamã èvègɔ̃a ɖota Bɛt-Horɔ̀n, eye ètɔ̃gɔ̃a tùtà èmɔ kè to lipò kè lè ègbevũ be bàlìa tamè, lè zògbèa ji lɔ̀ge.

19Wàlɛbɛ ŋua, àmè ɖe mu gbà kpɔna èzògbɛ̀dɛ ɖekpe lè Izràɛl-nyigbã bliboa ji ò, ɖoa, Filistìtɔwo gblɔ̃ be: “Mu jè be Izràɛlviwo ne tù èwui, àlo, èhuã ò.” 20Izràɛlviwo kpata yìnà Filistìtɔwo be èzògbɛ̀dɛwo gbɔ. Funua ye àmè si àmè ɖana yebe àgblèdèkèke be kòjòe-nu, kòjòe, sɔfì, èfiɔ ku àtifɛ̃-gà lè. 21Ènu ɖaɖa kèa be èci nyina sìka gà be mamã èvè lè ètɔ̃ mè, ne wo la ɖa kòjòe-nu, àlo kòjòe, àlo, ne woa jrà sɔfì, èfiɔ ku èhuã ɖoa. 22Ekèa na be, gbè kè gbè àhùa jɔ̀ a, Saolò ku Yonatàn be àhùakɔ̃a mu ɖo èwui ku èhuã ò. Gãkea, wo kpɔ èɖewo na Saolò ku èvia Yonatàn.

23Eye Filistìtɔwo be èmɔɖiatɔ ɖewo to va Mikmas be èmɔa ji.

Currently Selected:

1Samuɛl 13: GEN

Highlight

Copy

Compare