1Màkàbeòwo 9
9
Yudà Màkàbeo ku lè àhùa
1Kè Demètrio sè be àhùa gble do Nikanɔr ku yebe àhùakɔ̃a, e gbà dɔ̃ Bakidɛs ku Àlkimò yì Yudà-nyigbã ji, ku àhùakɔ̃a be ɖùsimè be àwàa. 2Amè kèawo sɔ Gàlìlea be èmɔ̃a, eye wo yì xa Mèsàlɔt ɖo *akoto mè, lè Arbèlɛs be ènutoa mè. Wo ɖo àlɔ̀ èdùa ji, eye wo wù àmè sùgbɔ. 3Lè èpè èkà ètɔ̃ takpo ci woèvègɔ̃a (152) be wètri cucugbãa mèa, wo do àsàɖa, kpà ŋùkɔ̀ Yèruzàlɛ̀m. 4E yomè a, wo jo, le èmɔ̃ ɖota Berea ku gbàdagbã àfɔ̀zɔ̃tɔ hotu èwo ku èsɔdotɔ hotu ɖèka. 5Yudà ya ɖo yebe àsàɖa ɖo Elasa, ku gbàdagbã kàlĩ cacã hotu ɖèka èkàwivɔàtɔ̃ (3000). 6Kè wo kpɔ èkɛ̃tɔ gbogbo ŋuawoa, vɔ̃vɔ̃ gã ɖe ɖo wo; àmè sùgbɔ si àhùa, eye àmè èkà-èwui kpò ye kpɔ̀tɔ̀. 7Yudà kpɔ be yèbe àhùakɔ̃a kakã, gà kè mè tututu àhùa la jè e gɔ̃mèa. Yebe èjì gbã, ɖoa mu la gbà teŋu bɔ̀ ye tɔ̀wo ò. 8Akpɔ̃ ɖo ɛ̀, gãkea, e gblɔ̃ na àmè kèwo ci ànyiawo be: “Mì si tè! Mi a yì kpà ŋùkɔ̀ miabe èkɛ̃tɔwo, ne mi la teŋu kpe àkɔ ku woa!” 9Woawo ya, wo gbe, gblɔ̃ na ɛ̀ be: “Lè fifì mèa, mi mu sù, la teŋu wɔ̀ ènu ɖekpe, sɔ wu be mi ahlùɛ̃ miabe àgbè gã ò. Mi la gbà trɔ va ku mia nɔ̀viwo, gà ŋua mèa, mi la wɔ̀ èhùaa. Fifìa ya, mi hùè akpa.” 10Yudà gbìgbɔ̀ ɖo e ŋuti be: “Gbèɖe! Ne wo agblɔ̃ be mù si a? Kpaò! Ne miabe gàpòpo va ɖoa, eŋua mia ku kãlìtɔ̀, ɖo mia nɔ̀viwo ta. Mi mu gbà na, ne miabe gogo ne bu gbidi ò.”
11Kɛ̃tɔwo be àhùakɔ̃a to so àsàɖa mè, va kpà ŋùkɔ̀ wo. Woabe èsɔdotɔwo mã ɖo èvè; rɔbàtu dàtɔwo ku àŋùtu dàtɔwo le zɔ̃ lè ŋùkɔ̀ na àhùakɔ̃a, ku àhùakɔ̃ àkɔ-àkɔ kpetɔwo; woa kpata, wo nyi kãlìsuwo. 12Bakidɛs ya lè ɖùsimè be àwàa ji. Ahùa-hasòsoawo zɔ̃, ɖo èkpɛ̃wo be ɖiɖi ji, so àgo èvèawo ji. Yudà be àmèwo cã ku èkpɛ̃. 13Kè àhùakɔ̃ èvèawo kpe àkɔa, leke be ɖì ɖoa na ànyigbãa huhũ. Avũa jè e gɔ̃mè ŋùdekɛ̃nyɛ mè eye be yì e ji, kaka na wètrɔ mè. 14Yudà kpɔ be Bakidɛs ku èkɛ̃tɔwo bè àhùakɔ̃a be àmè cãcãawo va lè ɖùsimè. Ekèa na be yebe gbàdagbã kèwo kpata wɔ̀nà kàlĩ wuawo va bɔ̀, trɔ do è. 15Wo nyà àhùakɔ̃ ɖùsimè tɔ̀a yì ŋùgbe, kaka yì ɖo Azara be ètowo ji. 16Kè wo kpɔ be ɖùsimè be àhùakɔ̃a kãkã joa, èmìɔ̃mè tɔ̀a trɔ jè Yudà ku ye tɔ̀wo yomè, eye wo kplɔ̀ wo do. 17Àhùaa va sɛ̃sɛ̃, eye àmè sùgbɔ ci àhùa lè àkpa èvèa. 18Yudà ŋutɔ nyã ku ci àhùa, eye àmè kpɔ̀tɛawo si jo. 19Yonatàn ku Simɔ̀n va kɔkɔ woa fòfo Yudà jo, eye wo ɖì ì ɖo tɔgbeawo be yɔ̀do mè, lè Modin. 20Izràɛl bliboa fã ɛ̀, eye wo wɔ̀ ècɔ gã ɖe na ɛ̀; wo lòfũ ŋùkèkè sùgbɔ gblɔ̃ be: 21“Kãlìsu ŋua kè hlùɛ̃nà Izràɛl gãa, leke be la teŋu ci àhùa ɖo ò?” 22Yudà be wɔ̀na kpɔ̀tɛawo, yebe àhùa wɔ̀wɔ̀, yebe ènuklìkowo, yebe kàlĩnu wɔ̀wɔwo, yebe kafu be nyikɔ xɔ̀xɔ̀ kpɔ̀tɛawoa, wo mu ŋlɔ̃ wo ò, ɖoa wo sùgbɔ wu nu.
Yònatàn va nɔ fòfoa Yudà tèpe
23Lè Yudà be èku yomèa, ji mà-xɔ̀sètɔwo gbà va kɔ̀ ɖo Izràɛl be ènuto bliboa mè, eye àmè vlowo gbà kɔ èta yìji. 24Ekè àdɔ̀ gã tɔ̀xɛ̀ ɖe to gà ŋua mèa, dùkɔ̃a jo kplɔ̀ wo do. 25Bakidɛs cã àmè lè mà-xɔ̀sètɔwo dòmè, ne wo aɖù èga lè èdùa nu. 26Ne wo yì ɖè Yudà be èxlɔ̃wo dòmètɔ ɖe to, so yebe wawlapea, wo biɔna ɛ̀ ènyà; e yomèa, wo kplɔ̀nà ɛ̀ yì na Bakidɛs; Bakidɛs dɔ̃nà èto na ɛ̀, eye be ɖìnà ègbɔ ɛ̀. 27E nyi àyà dona àmè ɖe kè mu gbà jɔ̀, lè Izràɛl-nyigbã ji kpɔ, so kaka gblɔ̃ɖɛtɔwo be hùenu be ènuwuwu ò. 28Eye Yudà be èxlɔ̃wo kpata bɔ̀, eye wo gblɔ̃ na Yònatàn be: 29“So kaka gà kè mè fòfo wò Yudà kua, àmè ɖekpe mu gbà nyi ŋusù, sìgbè eye nène, la yì kpe àkɔ ku miabe èkɛ̃tɔ, ku Bakidɛs kudo àmè kèwo keŋu crìnà miabe dùkɔ̃a ò. 30Ye ŋutia, mi le cã wò egbè, ɖo e tèpe, ne wò anyi miabe kplɔ̀tɔ kè la nɔ̀ ŋùkɔ̀ na mi, lè àvũ kè mi le wɔ̀a mè.” 31Yònatàn xɔ̀ àhùa kpɔ̀kplɔ, gà ŋua mè, eye be nɔ̀ fòfoa Yudà tèpe.
Yònatàn biɔ nɔ̀via Yòhanɛ̀s be èhlɔ̃
32Kè Bakidɛs sè ènyàa, e ji be yè awù Yònatàn. 33Wo va gblɔ̃ ɛ̀ na Yònatàn ku Simɔ̀n, nɔ̀via, ku àmè kèwo kpata nɔ̀nà Yònatàn ŋutiawo. Wo si yì Tekoa be zògbè ji, eye wo do àsàɖa ɖo Asfar be èsì-doa gbɔ. 34Bakidɛs sè ènyàa jɛ̃gbɔ̃zãgbe, eye ye ku yebe àhùakɔ̃ bliboa, wo va Yɔrdan-tɔ̀a godo. 35Yònatàn dɔ̃ nɔvia Yòhanɛ̀s kè le kplɔ̀ àhùakɔ̃a be ne biɔgbe yè-xlɔ̃ Nabatetɔwo, be yè asɔ yèbe àgbã kèwo sùgbɔawo dàɖo woa gbɔ. 36Vɔ̀a Yambri be èvi kèwo nɔ̀nà Madabaa, hɔ̃ va, eye wo le Yòhanɛ̀s, xɔ̀ ènu kèwo kpata wo hɛ̃a, eye wo jo ku woabe ènuwo keŋu. 37Enu kèawo yomè a, wo va gblɔ̃ na Yònatàn ku Simɔ̀n be Yambri be èviwo le wɔ̀ èsrɔ̃ɖèɖe gã ɖe: wo le kplɔ̀ àgɔ̀sɔ ku zĩzĩ gã ɖe, so Nabata gbànà. Nyɔ̃nùa nyi Kanan be àmè gã ɖe be èvi. 38Wo ɖoŋù woa nɔ̀vi Yòhanɛ̀s kè ku ci èhũ mèa, eye wo lia èto, yì bè ɖo èto be èdo ɖe mè. 39Kè wo kɔ ŋùkuvi yìjia, wo kpɔ àmè kè le kplɔ̀ nyɔ̃nùa, èxlɔ̃awo ku nɔ̀viawo zɔ̃ gbànà, gogo wo lè èhũpòpo, èhàjìji ku àhùawɔ̀nu xɔ̀ciwo dòmè hòo, kudo woabe àgbãwo keŋu. 40Yònatàn ku Simɔ̀n be àmèawo to so woabe èxadopea, eye wo lũ ɖo nyɔ̃nù kplɔ̀tɔawo ji; wo wù wo hànyã-hànyã; àmè sùgbɔ xɔ̀ èku-bi; àmè kèwo ci àgbèawo si tùtà èto-nyigbã ji. Wo lɔ woabe àgbãwo kpata jo. 41Nènea, èsrɔ̃ɖèzãa trɔ zũ èfũlòlo, eye èhàjìji viviawo trɔ zũ àlenana. 42Wo biɔ woa nɔ̀via be èhũ be èhlɔ̃, eye wo trɔ yì Yɔrdan be ègbaa mè.
Àvũ nɔ̀ Yɔrdàn-tɔ̀a to.
43Kè Bakidɛs sè àfi kè wo lèa, jɛ̃gbɔ̃zã ɖe gbèa e kplɔ̀ àhùakɔ̃ gã ɖe va Yɔrdan-tɔ̀a to. 44Yònatàn gblɔ̃ na ye tɔ̀wo be: “Mì so! Mi awɔ̀ àhùa, ne mi ahlùɛ̃ miabe àgbè gã; ɖoa egbè be ŋùkèkea mu lè sìgbè èsɔ̀ ku nyìsɔ̀ va yì nène ò. 45Àvũ wɔ̀wɔ̀ ye nyi ekèa, lè ŋùkɔ̀ na mi; Yɔrdan be èsia lè àgo ɖe ji; ègbàamè ku àŋɔkãmè lè àgo ɖetɔa ji: àfi ɖekpe mu lè kè mi la si to ò. 46Fifìa, mì fã yɔ Mawu, lè jiŋùkusi, ne mi mu gbà ci miabe èkɛ̃tɔwo si ò.” 47Kè àvũ wɔ̀wɔ̀ a jè e gɔ̃mèa, Yònatàn drɛ̃ àlɔ̀, la sɔ yebe èwuia ja Bakidɛs, vɔ̀a Bakidɛs dɔ̃ yì ŋùgbe, eye èwuia glì ì do. 48Yònatàn ku ye tɔ̀wo tìkpo jè Yɔrdan-tòa mè, pusì yì jè àgo ɖea ji, vɔ̀a, èkɛ̃tɔawo mu sò Yɔrdan-Tɔ̀a lè woa yomè ò. 49Gbè ŋua gbè a, àmè sìgbè èkàwivɔàtɔ̃ nène ci àhùa lè Bakidɛs be àmèwo dòmè.
Bakidɛs va Yudà-nyigbã ji. Alkimè ku
50Kè Bakidɛs trɔ yì Yèruzàlɛ̀ma, e trɔ Yudea be èdù sɔ tù àgbògbòwo: woawo ye nyi: Yeriko, Emaus, Bait-Horɔn, Betɛl, Timna, Faratɔn ku Tefɔn. E tù èglìkpa kɔkɔwo trɔ do wo, do àgbo ku lɔkèwo woa nu. 51E yomè a, e sɔ gbàɖagbã-hawo ɖo èdù ɖè sia ɖe mè, ne be asɔ nɔ ɖè èfũ na Izràɛl. 52E gbìgbɔ̀ tù Bait-Sur, Gazɛr be èdùwo, eye wo sɛ̃ŋu wu sãa. E sɔ gbàdagbãwo do woa mè, eye be bɔ̀ ènuɖùɖu ɖɛ ɖo woa mè. 53E le kɔpewo mè be èfìɔwo be èviwo, ɖo àwòba, eye be tu wo ɖo Yèruzàlɛ̀m be àgbògbòa mè.
54Lè èpè èkà etɔ̃ takpo ciwoètɔ̃gɔ̃a be wètri èvègɔ̃a mèa, Àlkimò ɖè ègbè be wo ne mù Kɔ̀kɔ̀ɛpea be gbàjà ji kè lè èkpaa mèa be èglìa. Nènea ye be gbã gblɔ̃ɖɛtɔwo be èdɔ kè wo wɔ̀ ɖɛa, eye be jè Kɔ̀kɔ̀ɛpea gbãgbã gɔ̃mè. 55Enu va jè Àlkimò ji, eye èdɔa tɔtè. Yebe nu miɔ̃ eye be kplibɔ. Mu gbà teŋu le gblɔ̃ ènyà kui ɖèka tètè, àlo, awɔ̀ ɖoɖowo ɖo yebe àxue ŋuti ò. 56Àlkimò sè veve sùgbɔ ŋutɔ, eye be ku, gà ŋua mè. 57Kè e kpɔ be Àlkimò kua, Bakidɛs trɔ yì èfìɔ Demètrio gbɔ, eye Yudà-nyigbã teŋu kpɔ gbɔ̃jɛ̃, èpè èvè.
Bakidɛs be ɖoɖowo gblìdo, eye be jo
58Amè mà-ɖo xɔ̀sèwo kpata wɔ̀ bɔ̀bɔ, eye wo gblɔ̃ be: “Yònatàn ku ye tɔ̀wo lè àgbè kpoo, kè wo mu le jè àyè ò a. Mi ana Bakidɛs ne va, fifì; e la le woa kpata lè èzã ɖèka mè.” 59Wo yì le ènyàa kpɔ ku ì. 60Bakidɛs jè èmɔ̃ ku àhùakɔ̃ gã ɖe. E ŋlɔ̃ ènu ɖoɖa yebe èzòɖù-xlɔ̃ kèwo lè Yudea-nutowo mèawo lè bèbemè, le biɔ so woa si be wo ne ɖo àsi Yònatàn ku ye tɔ̀wo ji ɖɛ na yè. Vɔ̀a, ènyàa va ɖo Yònatàn be èto mè, eye ènu kè Bakidɛs ɖoa mu teŋu jè e ji ò. 61Bòhũa, wo le ènudrã wɔ̀tɔ kèawo dòmètɔwo, sìgbè àmè èkàci èwo nène lè èdùa mè, eye wo wù wo. 62Ekèa yomèa, Yònatàn, Simɔ̀n ku woa tɔ̀wo trɔ yì zògbèa ji, lè Bait-Basi. Wo gbìgbɔ̀ tù tèpe kèa kè gbã ɖɛa, trɔ ɛ̀ wɔ̀ àgbògbò. 63Kè Bakidɛs va sè èa, e bɔ̀ yebe àhùakɔ̃a kpata, eye be yɔ ye tɔ̀wo kèwo lè Yudà-nyigbã jiawo cã be wo ne va kpɔ yè. 64E kplɔ̀ yebe àhùakɔ̃a va kpà ŋùkɔ̀ Bait-Basi, ɖè àhùa kpe na èdùa, ŋùkèkè sùgbɔ ku àhùawɔ̀mɔ̃wo. 65Yònatàn gble nɔ̀via Simɔ̀n ɖo èdùa mè, kplɔ̀ àhùakɔ̃a be àmè vi ɖe, eye wo teŋu to yì àgblè ji. 66E ɖù Odòmèra ku nɔ̀viawo ji, eye be gbà ɖù Fàsirɔn be èviwo cã ji, lè woabe àsàɖa mè. Kè wo ɖù àmè kèawo jia, wo lɔ̃ be yèwo ava kpe Yònatàn, eye wo kpe àkɔ ku Bakidɛs. 67Simɔ̀n ku yebe àmèwo to so Bait-Basi eye wo tɔzò èkɛ̃tɔwo be àhùamɔ̃wo. 68Wo kpe àhùa ku Bakidɛs, wàlɛbɛ kè be gbɔjɔ keŋu-keŋua. Leke wo gble ɖoɖo kè be wɔ̀ na àhùaa ɖoa, nɔ̀ e ji ŋutɔ. 69Kè be bijì veve ɖe do ji mà-xɔ̀sètɔ kèwo ye na be va àgo ŋu jia, e wu woa dòmètɔ sùgbɔ, eye be trɔ yì àxue. 70Kè ènyàa va ɖo Yònatàn gbɔa, e dɔ̃ àmè ɖoɖa ɛ̀, be yèwo aɖù ŋutifafa be èzò, ne yèwo atrɔ àhùalewo ɖoɖa yèwo nɔ̀nɔ̀ɛwo. 71E lɔ̃, eye be wɔ̀ ɖo ènu kè Yònatàn biɔa ji. E kã àtaŋu be, kaka kè yè gbà lè àgbèa, yè mu la gbà ji, la wɔ̀ èvùɛ̃ ku Yònatàn ke ò. 72E sɔ àmè kèwo be le àhùalewo le Yudà-nyigbã jiawo ɖoɖa Yònatàn; e yomèa, e trɔ yì àxue, eye mu gbà trɔ va Yudàtɔwo be ànyigbã ji ke ò. 73Le Izràɛl-nyigbã jia, àhùa nu sò. Yònatàn yì ci Mikmas be èdùa mè. E va nyi èga, lè yebe dùkɔ̃a nu, eye be ɖè ji mà-xɔ̀sètɔwo jo lè Izràɛl be dùkɔ̃a dòmè.
Currently Selected:
1Màkàbeòwo 9: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.