1Màkàbeòwo 10
10
Àlɛ̀ksãdro Epifane ku Demètrio le hlùɛ̃ èfìɔɖùɖu
1Le èpè èkà ènegɔ̃a mèa, Àlɛ̀ksãdro Epifane, Ãtiokus be èvia, so àpù va ɖo àlɔ̀ Tolemais ji. Wo xɔ̀ ɛ̀ nyuɛ̃ ɖe, lè èdùa mè, eye be tɔ èfìɔɖùɖu ji. 2Kè èfìɔ Demètrio sè ènyà kèa, e bɔ̀ àhùakɔ̃ gã ɖe, eye be jè èmɔ̃ la yì wɔ̀ àhùa ku Àlɛ̀ksãdro. 3E ŋlɔ̀ ŋutifafa be xoma ɖoɖa Yònatàn, le fiã àjɔ̀gbè na ɛ̀ be yè la do bùbu jèsi gã ɖe e ŋuti, la sɔ kɔ ɛ̀ ɖo ji. 4E le gblɔ̃ lè ye ɖokoe mè be: “Ma ɖèbla ɖo ŋutifafa be èkàdodo mè ku wo, gbɔ̀xue wo ava wɔ̀ ɛ̀ ku Àlɛ̀ksãdrò, la sɔ sitè ɖo mia ŋuti. 5Gà ŋua mèa, e gbà teŋu va ɖoŋù àyà kèwo keŋu, mi do na ye ŋutɔ ku nɔ̀viawo kudo yebe dùkɔ̃a.” 6Demètrio ɖè èmɔ̃ na Yònatàn be ne bɔ̀ àmèwo, sɔ ɖo àhùakɔ̃, ŋutɔ cã, ne wo awɔ̀ àhùawɔ̀nuwo. E gbà biɔ so e si be ne nyi yèbe èzòɖùxlɔ̃. E ɖè ègbè be wo ne trɔ àwòbàmè kèwo lè Yeruzàlɛ̀m be àgbògbòa mèawo sɔ na ɛ̀. 7Yònatàn va Yèruzàlɛ̀m eye be hlɛ̃ xomaa lè dùkɔ̃ bliboa ku àmè kèwo lè àgbògbòa mèawo be ŋùkɔ̀. 8Kè wo sè be èfìɔa ɖè èmɔ̃ na Yònatàn be ne bɔ̀ àhùakɔ̃a, wo vɔ̃ ŋutɔ. 9Amè kèwo lè àgbògbòa mèawo trɔ sɔ àwòbàmèawo na Yònatàn, eye Yònatàn sɔ wo do àsi na woabe xòmèwo. 10Yònatàn nɔ Yèruzàlɛ̀m, eye be tɔ èdùa tùtu, gbìgbɔ̀ le jrà ɛ̀ ɖo. 11E ɖè ègbè na èdɔwɔ̀tɔwo be wo ne gbìgbɔ̀ tù èglìkpaawo, ne wo asɔ èkpe gãwo tɔ̃ èkpa trɔ do Sinai-Toa, eye wo wɔ̀ ɖo e ji. 12Edù bu mètɔwo be gbàdagbã kèwo lè àgbògbò kèwo Bakidɛs tùawo mèa si jo. 13Amè sia àmè gble àfi kè wo do èdɔ àsi na ɛ̀ lèa ɖɛ, trɔ yì àxue. 14Bait-Sur be èdù mè kpò wo ɖè àsi lè àmè ɖewo ŋuti lè, lè àmè kèwo trɔ lè Èsea ku ɖoɖowo yomèawo dòmè lè, ɖoa Bait-Sur nyi xɔ̀ na àmè be èdù.
15Efìɔ Àlɛ̀ksãdrò sè àtaŋu kèwo Demètrio kã ɖoɖa Yònatànawo. Wo gbà kã àseŋu na ɛ̀, so àhùa ku kàlĩnu kèwo ye ŋutɔ ku nɔ̀viawo wɔ̀awo ŋuti, gbàkudo so àyà kèwo wo ɖùa ŋuti. 16Efìɔa gblɔ̃ be: “Mi la teŋu kpɔ ŋusù kèa hatià? So fifìa, mi ɖo la sɔ ɛ̀ wɔ̀ èxlɔ̃, eye mi ɖo la nɔ̀ èkàdodo mè ku ì. 17Ekèa ŋutia, e ŋlɔ ɖoɖa ɛ̀ ku ènyà kèawo be: 18“Efìɔ Àlɛ̀ksãdrò le do ègbè ɖoɖa nɔ̀via Yònatàn. 19Mi sè, wo gblɔ̃ so ŋuti wò be wò nyi ŋusù kàlĩsu ɖe, eye wò jè la nyi miabe èxlɔ̃. 20Ye ŋutia, so egbè jia, mi sɔ wò le ɖo mawunɔ gã, ɖo àpo dùkɔ̃a nu, eye mi sɔ bùbu-nyikɔ na wò be Efìɔa be Exlɔ̃, e sɔ bùbu be àwù jɛ̃ ku sìka-jègbà ɖoɖa ɛ̀, ekèa le nyi jèsì be wò anɔ mia ji, eye wò anɔ̀ èxlɔ̃wɔ̀wɔ̀ be èkàdodo mè ku mi.” 21Lè èpè èka ènègɔ̃a be wètri àdrɛ̃gɔ̃a mèa, Yònatàn do àwù kɔ̀kɔ̀ɛawo, lè Gòxɔ̀wo be Azã gbè. E bɔ̀ àhùakɔ̃, eye be wɔ̀ àhùawɔ̀nu sùgbɔ.
Demètrio na tèpe Yudàviwo
22Kè Demètrio sè ènyà kèa, e ci siayi, eye be gblɔ̃ be: 23“Nukɛ ye mi wɔ̀ ŋua ò? Àlɛ̀ksãdrò jè ŋùkɔ̀ na mi, sɔ Yudàtɔwo wɔ̀ èxlɔ̃, ekèa na be e gbà sɛ̃ŋu kpe è. 24Nyè cã mù la ŋlɔ̃nu ɖoɖa wo, la sɔ biɔ woabe èkàdodo; mù la na wo bùbu jèsìwo ku àjɔ̀. Mù jro be wo asɔ̀gbè, ne wo anɔ do mù àlɔ̀.”
25E ŋlɔ̃ ènyà kèawo ɖoɖa wo be: “Efìɔ Demètrio le dogbè ɖoɖa Yudàtɔwo be dùkɔ̃a. 26E nyi jìjɔ̀ɛ na mi be, mì sè leke mì le ɖo èkàdodo kèwo lè mia dòmèawo ŋuti, be mì gbà nyi mia-xlɔ̃wo, eye mì mu jo yì le miabe èkɛ̃tɔwo ji o. 27Mì nɔ wɔ̀ ànùkua na mi kpò, miawo cã, mi la na mì àjɔ̀ ɖo ekèa ta. 28Mi la ɖè àmlɔ̀kɔɛ jɔ̀jɔwo ji kpɔ̀tɔ̀ na mì, eye mi la na, mì la xɔ̀ ènu nana sùgbɔ. 29So fifìa, mù le ɖè ètaci kè Yudàtɔ ɖè sia ɖè tunaa jo. Mù le ɖè ètaci kè mì tuna ɖo èjè taa jo. Mù le ɖè èta-ci kè Yudàtɔwo tuna na èfìɔa jo. 30Lè ègo bu mèa, so egbè jia, mù le sɔ àgblèmè-nukuwo be mamã ètɔ̃gɔ̃a ku àtikusɛ̃sɛ̃wo be mamãmè kèwo nyina tɔ̀ nyèa, kè mì. Ɖoɖo kèa le jè e gɔ̃mè egbè, eye be la nyi àlè na Yudà-nyigbã ku Samarìa be kɔpe ètɔ̃ kèwo wo sɔ tɛ ɖo e ŋutia kudo Gàlìleà gbidi. 31Yèruzàlɛ̀m la nyi èdù kɔ̀kɔ̀ɛ, eye, ye ku yebe nutomèa mu la gbà nɔ na ènu be mamã èwogɔ̃a ku ètaci ò. 32Mù gbà le ɖè àsi lè Yèruzàlɛ̀m be àgbògbòa ŋuti, eye mùle sɔ ɛ̀ le ɖo mawunɔ gãa be àcɛ̀ gɔ̃mè. Ye ŋutɔ teŋu ɖo ɖìatɔ kèwo ye ŋutɔ la cãa sɔ ɖo funua. 33Yudàtɔ ɖe sia ɖe kè wo le, eye wo kplɔ̀ so Yudà-nyigbã ji, va àpe èfìɔɖupe be àfi ɖekpekpea, mù le ɖè àsi lè e ŋuti, àjɔ̀ ɖekpe mà-xɔ̀. Yudàvi ɖe sia ɖe vò, so àmlɔ̀kɔɛ tutu si, kaka vò ŋutɔ cã so èlãhawo be èta-ci si. 34Yudàvi kèwo keŋu lè àpe èfìɔɖùpe be ànyigbã jiawo mu la gbà tu ètaci ò, eye wo la sɔ woabe èfɛ̃wo kè wo, wàlɛbɛ kè wo la nɔ dù woabe àzã kɔ̀kɔ̀ɛ kèwo nyi: Jɛ̃gbɔ̃zã, Wètri Yeye jè Eji be Azã ku àzã kpɔ̀tɛawoa; nènea ke be la nyi, lè ŋùkèkè ètɔ̃ kèwo jè ŋùkɔ̀, àlo, kèwo kplɔ̀ àzãɖùɖu vevewo doa yeŋu. 35Amè ɖekpe mu kpɔ èmɔ̃ la zĩ woa ji, la sɔ xɔ̀ ègà ɖe lè woa si, àlo, la do ŋùklɛ̃ na wo, ɖo ènyà ɖekpe ŋuti ò.
36Wo la xɔ̀ Yudàtɔ sìgbè àmè hotu woeatɔ̃ nène, ɖo èfìɔ be àhùakɔ̃a mè; wo la nɔ xɔ̀ èfɛ̃tu ɖèka ŋùkumè ku èfìɔɖupea be gbàdagbã kpɔ̀tɛwo kpata. 37Wo la ɖè gbàdagbã kèawo dòmètɔ ɖewo ɖo èfìɔ be àgbògbò gãwo mè. Wo la sɔ Yudàtɔwo ɖo ànùkua be èdɔwɔ̀pewo nu, lè èfìɔɖùpea. Wo la cã woabe èdɔjikpɔtɔwo ku woabe ègawo lè woa dòmè, eye wo la nɔ zɔ̃ ɖo woa ŋutɔ, woabe èsewo ji, sìgbè leke èfìɔa ɖè ègbè so e ŋuti na Yudea be ànyigbãa nène.
38Wo la bù Samaria be nutomè ètɔ̃ kè wo sɔ tɛ ɖo Yudea ŋutia, sìgbè ànyigbã ɖèka nène, eye wo la nɔ̀ àmè ɖèka pɛ kè nyi mawunɔ gãa be àcɛ̀ gɔ̃mè. 39Mù le sɔ Tolemais ku yebe nutoamè sɔ na Yèruzàlɛ̀m be kɔ̀kɔ̀ɛpea, ne wo asɔ e mè so nuwo nɔ kpɔ sɛ̃sɛ̃-dɔwo be zãzãwo gbɔ. 40Epè sia èpèa, nyè ŋutɔ, mù la sɔ sekɛl be klòsalò-gà hotu adrɛ̃ èkawivɔàtɔ̃, kè wo la jɔ̀ so tèpe kèwo teŋu ìa, so èfìɔ be àdɔ̀kùnuwo mè la sɔ na. 41Sãa, èfìɔɖùpea be èdù gãwo mè be fìɔha-dɔwɔ̀tɔwo mu sɔna ègà kè ci ànyia na àmè ɖe ò. Fifìa, wo la nɔ sɔ ɛ̀ ɖɛ na mawuxɔ̀a be èhìãwo. 42Gbà sɔ kpe èa, klòsalò be sekɛl hotu èvè èkàwìvɔàtɔ̃ be ègà kè wo ɖènà lè Kɔ̀kɔ̀ɛpea be èpè sia èpè be àdɔ̀kùnu mèa, wo la nɔ sɔ ɛ̀ na mawunɔ kè lè èdɔa nua. 43Amè ɖekpekpe kè si va bè ɖo Yèruzàlɛ̀m be Mawuxɔ̀a mè, àlo Mawuxɔ̀a be èkpa mè, ɖo èta-ci be èfɛ̃ ɖe kè be ɖù, àlo, ɖo èfɛ̃ bu ɖekpekpe ŋutia, la vò, eye wo mu la do àlɔ̀ yebe ènuɖoɖo ɖekpe ŋuti ò. 44Zãzã kèwo wo la wɔ̀, la sɔ tù, àlo, la sɔ gbìgbɔ̀ jrà Mawuxɔ̀a ɖoa, la so èfìɔ be àdɔ̀kùnuwo mè. 45Zãzã kèwo wo la wɔ̀, la sɔ gbìgbɔ̀ ɖo Yèruzàlɛ̀m be èglìwo, la sɔ do ŋusɛ̃ èglìkpawo, àlo, la sɔ tù èglìkpa ɖo àfi bu, lè Yudeaa, cã la so èfìɔ be àdɔ̀kùnuwo mè.”
Efìɔ Demètrio cucugbã tɔ̀a ku
46Kè Yònatàn ku dùkɔ̃a sè Demètrio be ènyà kèawoa, wo gbe be yèwo mu la xɔ̀ wo sè, àlo, asɔ èɖe lè woa mè ò, ɖoa, ènu bàɖà kèwo kpata Demètrio wɔ̀ le Izràɛl ku lekè be zĩ wo ɖo ànyi ɖoa gbà kpɔ̀tɔ̀ lè susu mè na wo. 47Wo sò ènyàa mè be yèwo la nɔ̀ Àlɛ̀ksãdrò be ènyà ji, ɖoa, wo kpɔ be Àlɛ̀ksãdro le gblɔ̃ ŋutifafa be ènyàwo, eye wo nyi yebe èzòɖùxlɔ̃wo lè Àlɛ̀ksãdro be àgbè mè-ŋùkèkèwo kpata.
48Efìɔ Àlɛ̀ksãdrò bɔ̀ àhùakɔ̃ gãwo, eye be zɔ̃, la kpe àkɔ ku Demètrio. 49Kè èfìɔ èvèawo jè àhùaa gɔ̃mèa, Àlɛ̀ksãdro be àhùakɔ̃a si jo. Demètrio nyà wo ɖo èdù-nu, kaka ɖù Àlɛ̀ksãdro be àhùakɔ̃a ji. 50E wɔ̀ àhùaa ku ŋusɛ̃, kaka va na wètrɔ mè. Vɔ̀a, Demètrio ku, gbè ŋua gbè.
Àlɛ̀ksãdro Balas ɖè Tolemèo Àdɛ̃gɔ̃ a be èvi
51Àlɛ̀ksãdrò ɖo àmèdɔ̃dɔ̃wo ɖoɖa Tòlòmeò, Ejiptè be èfìɔa, ku àŋɛ̀ kèa be: 52“Kpɔɖa: mù trɔ gbɔ̀ va àpe èfìɔɖùpea, eye mù xɔ̀ ètɔ nyèwo be èfìɔzìkpea; mù ɖo àlɔ̀ jiɖùɖua ji, mù ɖù Demètrio ji, eye miabe èdùa be ànyigbãa trɔ zũ mia tɔ̀, lè àsi nyè. 53Nyàwo be nyi be mù wɔ̀ àhùa ku Demètrio, nyè ku gbàdagbã nyèwo mi ɖù e ji, eye ye ku yebe gbàdagbãwo, wo kã hlɛ̃, si jo, eye mi ɖo àlɔ̀ yebe èfìɔzìkpea ji. 54Fifìa, mi aɖo èxlɔ̃wɔ̀wɔ̀ be èkàdodo mè, ne wò asɔ nyɔ̃nùvi wò na mù, ma ɖè. Lekea, mù la trɔ zũ èto-yɔvi wò, ne ma na èwò ku èvi wòa, èènu nana kèwo ye jè na àmè kè ŋukumè wò nyia.” 55Efìɔ Tòlòmeò ɖo e ŋuti ku ènyà kèawo be: “Ɖàgbè be ŋùkèkè ye nyi àzã kè gbè wò trɔ gbɔ̀ va ètɔ wòwo be èdù mè, eye wò va xɔ̀ ànyi nɔ̀ ɖo woabe èfìɔzikpe ji. 56E nyɔ̃, mù lɔ̃ ɖo ènu kè wò sɔ le ɖo ŋùmè na mù, lè xoma kè wò ŋlɔ̃a mèa ji. Vɔ̀a, va dogò mù lè Tolemais be èdùa mè, ne mi akã àseŋu vi ɖe. Mù lɔ̃ be wò aɖè èvi nyè, sìgbè leke wò biɔ mùa nène.”
57Tòlòmeò jo lè Ejiptè ku èvia nyɔ̃nùvi Kleopatra, eye be va ɖo Tolemais, lè èpè èkà ène ci èvègɔ̃a mè. 58Efìɔ Àlɛ̀ksãdrò va dogò Tolemèo. Tolemèo sɔ èvia nyɔ̃nùvi Kleopatra na Àlɛ̀ksãdro, eye wo wɔ̀ èsrɔ̃ɖèɖe gã ɖe lè Tolemais ku zĩzĩ kè jè na èfìɔwoa.
Efìɔ Àlɛ̀ksãdro ku Yònatàn dogò
59Efìɔ Àlɛ̀ksãdrò ŋlɔ̃ xoma ɖoɖa Yònatàn be ne va dogo yè. 60Yònatàn yì Tolemais ku yɛyì gã ɖe, eye be dogò èfìɔ èvèawo. E na woa wo ku woa xlɔ̃wo, klòsàlò, sìka ku èènu nana sùgbɔ, eye be kpɔ màjè lè woa gbɔ. 61Izràɛlvi mà-wɔ̀ ànukua ɖewo kèwo nyi àhovìwoa bla èse ɖo Yònatàn ŋuti. Wo do hùɛ do è, lè èfìɔa be ŋùkumè, vɔ̀a, èfìɔa mu kpɔ woa gbɔ tètè ò. 62E ɖè ègbè ŋutɔ cã be wo ne ɖè Yònatàn be àwùwo lè e ŋuti, ne wo a do èfìɔ be àwù jɛ̃ na ɛ̀. Wo wɔ̀ ɖo e ji nènea. 63Efìɔa na be va nɔ̀ ànyi ɖo ye gbɔ, eye be gblɔ̃ na yebe àgbònùglawo be: “Mi kplɔ̀ ɛ̀ yì èdùa dòmè, ne mì aɖogà be àmè ɖekpe mu kpɔ èmɔ̃ la sɔ ènyà ɖo e ŋuti, so ènu ɖekpe ŋuti, àlo àwɔ̀ ŋùklɛ̃nu ɖe ɖoɖa e gbɔ ò.” 64Kè àmè nyikɔ gbletɔawo kpɔ bùbu kèwo wo le na ɛ̀, ku ègà kè wo le ɖoa, kudo bùbu be àwù kè wo do na ɛ̀, sɔ zɔ̃ ɖo èfìɔ be ègbè jia, wo si jo keŋu-keŋu. 65Efìɔa do bùbu e ŋuti, eye be hlɛ̃ ɛ̀ ɖo “Efìɔ be Exlɔ̃ Cucugbɔ̃awo” dòmè, eye be ɖo è Ahùafìɔ Gã ɖo Ahùagawo nu. 66Yònatàn trɔ gbɔ̀ va Yèruzàlɛ̀m lè ŋutifafa mè, ku lè jìjɔ̀ɛ mè. 67Le èpè èkà ènè ci àtɔ̃gɔ̃a mèa, Demètrio kè nyi Efìɔ Demètrio Cucugbɔ̃a be èvia, so Kreta, va ɖo tɔgbeawo be èdu mè.
Yònatàn ɖù Apòlonìo ji
68Kè be sè ènyà kèa, èfìɔ Àlɛ̀ksãdrò ci siayi ŋutɔ, eye be trɔ yì Ãtiokìa. 69Demètrio ɖo Apolonio, èdù ji ɖùtɔ lè Siria Gãa be nutomè. Apolonio bɔ̀ àhùakɔ̃ gã ɖe, va do àsàɖa ɖo Yamnia gbɔ, eye be dɔ̃ àmè, ne wo ayì gblɔ̃ na mawunɔ gãa Yònatàn be: 70“Wò ɖèka kpò ye le sitè ɖo mia ŋuti, eye, wò va na, mù trɔ zũ àmè kè ɖì kòkoe, ku àmè kè ɖìgbɔa. Nukɛ ŋuti wò le zã àpo àcɛ̀ ɖo mia ŋuti, lè èto-nyigbãwo ji ɖo ò? 71Ne wò kã ɖo àpo àhùakɔ̃wo ji nyàwo a, eŋua ɖì va, kpà ŋùkɔ̀ mi fifì, lè ànyigbã gbàjàa ji, ne mi a dà mia nɔ̀nɔ̀ɛwo kpɔ, ɖoa, èdù gãwo be àhùakɔ̃wo lè ji nyè. 72Biɔ ènya sè, ne wò anyã àmè kè mù nyi, ku àmè kèwo keŋu ye lè ji nyèawo. Amè ŋuawo le gblɔ̃ be mì mu la teŋu kpe àkɔ ku mi ò, ɖoa, zè èvè kpataa, wo ɖù mìa tɔgbewo ji, eye wo nyà wo ɖo ègbe, lè woa ŋutɔ, woabe èdù mè. 73Wò mu la teŋu kpà ŋùkɔ̀ àpe èsɔdotɔwo be ahùakɔ̃a ku àhùakɔ̃ kè sɛ̃ŋu sìgbè tɔ̀ nyèa nène, lè ànyigbã gbàjà ji, àfi kè tèpe ɖekpe mu lè kè mì la si wla ɖo ò; èkpe ku àkpã tètè mu lè ò. 74Kè Yònatàn se Apòlonìo be ènyà, e do àdɔ̀mèze gã ɖe. E cã gbàdagbã hotu àtɔ̃ bɔ̀, eye be jo, so Yèruzàlɛ̀m; nɔ̀via Simɔ̀n kplɔ̀ yebe àhùakɔ̃wo yì kpe ye tɔ̀awo, ne be asɔ do è àlɔ̀. 75E do àsàɖa kpa ŋùkɔ̀ Yope. Apolonio be gbàdagbã kèwo lè èdùa mèawo na èdùa mètɔwo tu èdùa be àgbowo. Izràɛltɔ ɖè àhùaa kpe na Yopa be èdùa. 76Kè vɔ̃vɔ̃ jè èdùa mètɔwo jia, wo hũ àgboawo, eye Yònatàn ɖo àlɔ̀ Yopa be èdùa ji. 77Kè Apòlonìo sè ènu kè jɔ̀ a, e ɖo èsɔdotɔ hotu ɖèka èkàwivɔàtɔ̃ ku àhùakɔ̃ gãa ɖe tùta Azdod, sìgbè wo la to èdùa mè va yì nène, vɔa ànyigbã gbàjàa be èmɔ̃ ji ye wo lè, ɖoa, e le dojì ɖo yebe èsɔdotɔwo be àhùakɔ̃ gãa ŋut. 78Yònatàn be àhùakɔ̃wo jè woa yomè, ɖota Azdod eye àhùaa jè e gɔ̃mè. 79Apòlonìo sɔ èsɔdotɔ èkàwìvɔàtɔ̃ wla ɖo ŋùgbe. 80Yònatàn sè èmɔ̃tetre kèa fli, be ɖoɖo lè yèbe ŋùgbedòmè ŋuti. Esɔdotɔawo trɔ do yebe àhùakɔ̃a eye wo le dà woabe àŋùwo ɖoɖa Yònatàn be àhùakɔ̃ ji, so ŋùdekɛ̃nyɛ̃, kaka va na wètrɔ. 81Yònatàn be àhùakɔ̃a lè ètè goŋugoŋu, sìgbè leke Yònatàn gblɔ̃ na woa nène. Wàlɛbɛ ŋuaa, ènu le tikɔ̀ na èkɛ̃tɔwo be èsɔwo vɔ̀. 82Gà ŋua mè ye Simɔ̀n kplɔ̀ yebe àhùakɔ̃wo yì ŋùkɔ̀, kpe àkɔ ku àfɔ̀zɔ̃tɔwo be àhùakɔ̃a. Kè ŋusɛ̃ vɔ̀ lè èsɔdotɔwo ŋutia, Simɔ̀n kãkã èkɛ̃tɔawo, eye wo si jo. 83Esɔdɔtɔwo be àhùakɔ̃a kãkã ɖo ènyigbã gbàjàa ji. Kè wo sia, wo va ɖo Azdod, gɛ̃ ɖo woabe vòdu Dàgɔn be vòduxɔ̀a mè be yèwo akpɔ xɔnàmèpe. 84Yònatàn tɔzò Azdod ku èdù kèwo trɔ do èawo. E hlà woabe ènuwo jo, eye be tɔzò Dàgɔn be àdo a ku àmè kèwo si bè ɖo e mèawo. 85Amè kèwo kpata ci èwui nu, àlo, èzò mèawo lè àmè hotu ènè. 86Kè Yònatàn jo lè funuaa, e yì do àsàɖa ɖo Askàlɔn lɔ̀ge. Edùamètɔwo to va dogo è ku yɛyì gã ɖe. 87Yònatàn ku ye tɔwo trɔ va Yèruzàlɛ̀m ku àhùalenu sùgbɔ. 88Kè èfìɔ Àlɛ̀ksãdrò sè ènyà kèa, e gbà sɔ bùbujèsì buwo na Yònatàn. 89Esɔ sèika be àkɔjigɔ̃ ɖèka ɖoɖa ɛ̀, sìgbè leke wo wɔ̀na na èfìɔ be xòmètɔwo nène. Esɔ Ekrɔn be èdùa ku yebe nutowomè keŋu na ɛ̀, ne be anyi ye tɔ̀.
Currently Selected:
1Màkàbeòwo 10: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.