Sagesse 9
9
Ŋwimmeem min Saloomɔn mēē kí ká Iciinee
(Kpèè 1 Bib 3.6-9)
1«M-naanjab Nimbɔtiu nì ti-Dindaan un poon mɔ̄ee, sii di dū a-nyɔɔbundi ki náań duulinya. 2A dū a-ciiŋyi ní ki náań unil ú jī a-wannaaŋkaati kɔkɔ pu dinyandi#9.2 Kpèè Diny 1.26-28.. 3A bí yii unil ń kpòotī duulinya nì a-lammi nì a-deedeeu poon, ní kí nīn sòoǹ tibɔti nì mbaamɔn. 4Tīī-mi a-ciiŋyi in di bí ki kɔ́ĺ a-beejalee ní kí taa jà-mi kí nyāntí a-biyaamu kansikin. 5Kpèè, m sá a-tɔntɔnliu nì a-nimputɔntɔnliu jipɔɔn ní#9.5 Dūú ŋmàntī nì Ilan 116.16., unil un pɔ̀fì ní u-maŋfal wiiŋyi kaa náaǹee. Maa pée nyí bi nín sòoǹ tibɔti puee, kaa ŋūǹ kí gbìl̄ a-marab taapu. 6Unil yaa sá unimɔnti binib kansikin ní kaa cáá Iciin in nyánní a-ceeyee, waa pée bí tiban.
7«Sii di lēē-mi ḿ nīn sá a-nibul bɔtiu, kí nīn sòoǹ a-jipɔmbi nì a-bisalib bɔti. 8A bí-mi yii ḿ mā a-diiku a-circir jool pu, ní kí mā nsaraafan kitiŋ kin poon a kóòyee, kí nóó nì a-circir kɔŋkooŋŋu ŋun nìn pée bí#9.8 a-circir kɔŋkooŋŋu ŋun nìn pée bí: dūú ŋmàntī nì Disa 25.9,40, Atuun 7.44, Eebru 8.5. doooo ŋkilkaaminee nín bí puee.
9«Sii cee ní Iciin in nyí a-tuuŋŋee bí. I nìn bí#9.9 I nìn bí...: dūú ŋmàntī nì Alaŋ 8.27-31. ŋyunti ŋun ní a náań duulinyee. I nyí tin fáatiǹ-see, nì tin nóó nì a-marabee. 10Yàntī í nyānní a-circir taakun kí kpákatiń. Tɔ̄ń-i doooo a-nyooti beejal cee í dāá tūtuǹ-mi m-tuuŋŋi poon, ní kí yàntī ḿ béé tin fáatiǹ-see. 11Íǹ di nyí tikɔkɔ ní ki gbìl̀ tikɔkɔ taapu. I làá dū dinyil kí kpòotī-mi m-tuuŋŋi poon ní kí dū i-nyooti kí wúń m-pu. 12Mimmee m-tuuŋŋi làá fáatíǹ-si. Niinee ní ḿ sòoǹ a-nibul bɔti nì mbaamɔn ní kí nīn kítì kí ŋmā kí kàl̄ m-baa beejal pu.»
Iciin bɔti páb́ ki tīī unil
13«Unil ulɔu di ŋūǹ kí béé Unimbɔti lammi? Ŋma di ŋūǹ kí dàkafì kí béé ti-Dindaan landɔkɔi? 14Nisaal landɔkɔi kaa cáá dimákal, ní ti nín dàkafī puee kaa pɔ̄ɔ̄. 15Di sá yii ti-wunti tin làá sūūyee nyìm̀ ti-pu. Ntam gbaŋŋu nee sá diwaŋgul ní ki tīī ti-fam ní ki tìì-ŋu ilandɔkɔ tikpil. 16Kpèè an pɔ̄ɔ̄ ki tīī-ti tí ŋmā kí béé tin di bí kitiŋ puee, ki kpáaǹ gba tin di dɔ̄ ki kɔ́ĺ-tee, an pɔ̄ɔ̄ ki tīī-ti tí ká. Too, ŋma di nín ŋūǹ kí béé tin bí yilpuee? 17Ŋma di ŋūǹ kí béé a-lammi, an yaa kaa sá un ní a tīī Iciin, ki dū a-Fam min bí yilpuee ki tú udaan ceeyee? 18Míǹ ní bin bí kitiŋ puee fātìi gítìń nsan ŋun tèen̄ee pu, binib bífì ki béè tin nín fáatiǹ-see ní Iciin fīī-bi.»
Currently Selected:
Sagesse 9: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.