Sagesse 8
8
1I kpátì i-pɔŋŋu kitiŋ kúntinyɔkɔ kiba ki cáa sāā kin kíǹee, ní ki kpòotī tikɔkɔ i-ŋanti poon.
Iciin, Saloomɔn nimpumɔntiu
2Iciin ní m néeń ní ki nyàab̄-i doooo m-naacimpɔntin. M nyàab̄ kí dū-i kí ŋá m-nimpuu ní ki kpántì i-nyaaŋku bɔɔn. 3I dàkà bi nín màl̄-i tinyool poon puee, di sá yii i nì Unimbɔti di yàkatī dimaŋfal, ní duulinya kɔkɔ Dindaan néeń-i. 4Unimbɔti u-ba di lēē u-ciiŋyi ki dàkā-i, ní i lēē i nín làá nīn tūǹ atuun puee. 5Tigaajati ní unil fèefī ki nyàab̀ dimaŋfal nee poon. Ama ba di gíti cáá kudapɔɔu ki bàn̄ Iciin, íǹ in náań tikɔkɔee? 6Ti-nyil yaa pɔ̄ɔ̄, Iciin in náań tin kɔkɔ bée kaa pɔ̄ɔ̄ ki jítiǹ-dàaa? 7Ni néeń tin tèen̄eeee? Too, Iciin di sá mbimbimɔntiim nyeel, di sá yii i dàkà dibacuul nì ibɔsoon in sá ibaamɔnee, nì tin bí deedeeyee nì dipɔbil, ní duulinyanee, tiba kaa bí ki kèetī binib kii tin bí nee. 8Ni là kí gíti kàl̄ duulinya nee poon kí yúntáaa? Iciin nyí tin jítèe ní ki dàkafī tin bí ki dòońee pu. I nyí kí lēē tibɔti tin pɔ̄ɔ̄yee taapu ní kí lēē ipɔɔn taapu kí bíĺ mpaampiin pu. I nyí tidaandi nì maamaacib ki síiǹ ní an nín bàń, ní ki nyí iyunti nín pée bí bí puee mun. 9An pu ní m lēē Iciin í nīn sá m-ŋàliŋu, di sá yii i làá nīn sáŋkí-mi ḿ nīn ŋáań tiŋan, ní kí nīn tìì-mi kunyannyaau iyunti in pɔ̄ɔ̄yee nì kunimbaau poon. 10M lī m-ban yii, i-puee m làá ká tinyool binib kansikin, ní min kamaa m dáá pɔ̀ɔǹee, binicikitikaabi làá nīn tɔ́-mi. 11M yaa sòon̄ unil bɔtee, bi làá ká m-bɔsooŋyi nín nyóò puee, ní an ŋá binikpaambi bitii. 12M yaa ŋmíl̀, bi làá cīití-mi, m yaa tí bíi sòoǹ, bi làá kàl̄ soooo kí pīlifì. M yaa tí sòon̄ an yúntì, bi làá dū bi-ŋalii kí bìin̄ bi-nyɔmmu pu. 13Iciin puee, m làá kpántí un kaa ti kúùyee ní bin bínní m-boon ki dòońee làá nīn téetí m-pu talku. 14M làá jī anibul pu dibeel, atimbun làá nīn bí m-taapu. 15Bibɔtikpaambi yaa láa gbìl̄ bi sòoǹ m-puee, bi làá dāá fàŋkì ní. M làá dāá dàkà m-nibul kulaŋŋaŋfitiiu ní kí nīn cáá dipɔbil kujaaun. 16M yaa fātìi gítìń m-dumpuee, ní ḿ dòon̄ kí kɔ́ĺ Iciin, di sá yii si nì i yaa tááyee, ntuntun kpá. Si nì i yaa bée, kunimbaau kpá, ama mmɔn nì dipɔɔpindi di bí.
Saloomɔn mēē ki nyàab̄ Iciin
17M kɔ́ m-ban ki dākafì ní ki dáań ki ká yii unil yaa ŋá mpèé nì Iciinee, waa ti kúù. 18U nì i yaa píí kubɔɔtiiuee, u kāntí mmɔŋkpaan. I yaa túń u-ni ditundee, u kāntí tigaajati tin kaa kúntée. U yaa cá i-cee múlmulee, u kpántí uciŋfiti. U nì i yaa sòoǹee, u nyēē diyindi. Ŋyunti gbantee ní m kíǹ ki cá an kɔkɔ pu ki nyàab̀ m nín làá ŋá pu kí cáá-iee. 19Tiŋman, bi nín màl̄-mee, m nìn ŋān̄, ní ki nìn fōō kinaŋ kin sá kimɔntiiyee, 20àá tí lì yii m nín sá unimɔntee puee, m kɔ́ tiwun tin kaa cáá tijɔkɔndee poon. 21Ama m nìn béè yii Unimbɔti yaa kaa tīī-mi Iciin, maa làá ŋmā kí ká-i. Á béé un di tìì tiwammɔntiilee dàkà yii a cáá Iciin. An pu ní m fātì m-ba ki túĺ ti-Dindaan ní ki mēē-u nì m-pɔbil kɔkɔ ki lī yii:
Currently Selected:
Sagesse 8: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.