Sagesse 10
10
Iciin tuuŋŋi kí yòon̄ Adam kí cáá sāā Mooyiisi
1Iciin di wúń duulinya kɔkɔ baa un bi péé péé ki náańee pu, úǹ un nìn bí u-babee. Míǹ boon u nín kɔ́ ikpitinee, íǹ di tí nyántì-u niin#10.1 B. 1: kpèè Diny 2.7, 3.1-13., 2ní ki tīī-u mpɔn ú nīn tɔ́kɔ́ tikɔkɔ pu.
3Ama unikpiti ubɔ nìn fātì u-boon ki tīī-i u-ŋuul poon ní ki kpíì, kun puee u nìn kūū u-naal u-bum poon#10.3 Kpèè Diny 4.1-16.. 4U-puee nnyim gbí ki léeǹ kitiŋ pu, ama Iciin di nìn tí fīī-kì. Íǹ di nìn ŋàal̄ deedeedaan ndɔ meelau poon nnyim pu#10.4 B. 4: Diny 6-8..
5Atimbun di nìn ŋá kinyɔɔbaantii kí ŋá tikpitilee, ŋi nìn kɔ́ fikil fikil poon, ama Iciin di nìn ká deedeedaan ki dū-u ki kpáafì bí taa ká u-pu tiba Unimbɔti nimbiin, ní ki nìn tīī-u mpɔn ú nīn tɔ́ Unimbɔti min kamaa u nìn néeń u-bikee#10.5 B. 5: kpèè Diny 11.1-9, 12 nì 22.1-19..
6Míǹ mbaantiim ŋyunti ŋun binikpitib nìn bíi kúùyee, i nìn fīī deedeedaan un nìn bíi sáń ŋŋmi ŋun nìn bíi wù ntimu muŋmooyee nimbiinee#10.6 B. 6: kpèè Diny 19.1-25.. 7Bi-tuŋkpitiŋ daaŋku dáá gbíntìi bí ki dāa sāā díǹ kitiŋ kin kūń ki dáá gbíntìi bíi dùkùee, isufi in lòoǹ abil ŋin kaa bīī jaanjaanee, nì diyanyindi din yú#10.7 diyanyindi din yú...: kpèè 19.26. bí nīn cáa téetí unimpu un nìn ŋá mpɔɔgbifinee pu. 8Binib bin kaa nìn dū Iciin ki yíiń tibee, an kaa sá tiŋan ŋmaniŋma ní baa ŋúń ki béè, ama bi dū bi-waatiiku ki bíl̀ bi-naantiibi bin làá páań bi-boonee ń nīn cáa téetí bi-pu, án nín làá ŋá pu bi-kpitii poonee, bí taa ŋmā kí báĺ bi-ba puee. 9Ama Iciin fīī i-tɔntɔnliibi bi-cɔŋkii poon.
10Deedeedaan nìn sáǹ u-nabiki diŋuul din kì nìn gíí u-puee pu. Iciin nìn kpōotì-u ki tākaǹ nsàmbiyaamu mun tèen̄ee poon. I nìn dàkā-u Unimbɔti beel ní ki nìn yāntì u béè tiwan tin bí circiree. I nìn yāntì u-tuuŋŋi bútì-u ní ki nìn yāntì u páatì u-pɔ́ɔǹtam pu#10.10 Deedeedaan nìn sáǹ u-nabiki: kpèè Diny 27.41-43. - Unimbɔti beel: kpèè Diny 28.10-22. - tiwan tin bí circiree: kpèè Diny 28.13-32. - páatì u-pɔ́ɔǹtam: kpèè Diny 31.38-42.. 11Nnimbineel dambi nìn nyàab̄ kí mùul̀-u, ama i tútuǹ-u ní ki yāntì u kpántì ugaaja. 12I nìn wúń u-pu u-nannanliibi nimbiin, ní ki nìn fīī-u ki nyántì bin nìn pīil̀ tikalindee ŋaan. I nìn tīī-u dijajil#10.12 I nìn tīī-u dijajil: kpèè Diny 32.23-32. kujakpaaŋŋu kubɔ poon kí ŋmā kí dàkà-u yii á nīn yú nì Unimbɔti deedeeyee pɔ̄ɔ̄ ki jítiǹ tikɔkɔ.
13Iaa nìn dū deedeedaan un bi nìn dūu nyáfèe ki fá, ama i nìn nyántì-u ikpitin#10.13 B. 13-14: kpèè Diny 37.12-36 nì 39.14.. 14I nì u di nìn sīntì dilɔkɔgindin ní kaa nìn dū-u ki fá u-kusakai poon. Ama i nìn tīī-u mbɔtikpandɔ ní ki tīī-u u-kpilib kɔkɔ pu mpɔn. Iciin di yāntì bi béè yii bin nìn túǹ-u dibɔgabilee sá binyimɔndambi ní i tīī-u talku nyooti.
15Iciin di fīī circir nibul din nib pu baa kāntí tibee ki nyántì-bi ditimbundi din nìn wɔ́b̀-bee ŋaan. 16I nìn kɔ́ ti-Dindaan tɔntɔnliu ubɔ pɔbilin ní úǹ dū maamaacib nì tidaandi ki jáń nì bibɔtikpaambi#10.16 B. 16: kpèè Disa 3-11.. 17I nìn pàn̄ circirdambi bi-tumpɔɔŋi paati, ní ki kpōotì-bi ki dī maamaaci saŋŋu pu. I nìn kpántì kibalilaŋ ní ki tīī-bi ŋwiimpu ní ki nìn sá iŋmalbijaa in ŋmíntí-bee kunyeeu#10.17 I nìn kpántì kibalilaŋ... kunyeeu: kpèè Disa 13.21-22.. 18I nìn yāntì bi cōom̀ ki dūtì Tikati mɔɔl, ní ki dū-bi ki jítì nnyiŋkpaam kansikin. 19Ama i nìn dū bi-nannanliibi ki múĺ nnyimin, ní ki nyántì-bi tiŋku taapu taapu ki tɔ́ digbándi. 20An pu ní deedeedambi nìn fúkúl̀ binikpitib wanti. Bi nìn gāā nlan yii: «Ti-Dindaan, a-yindi sá circir yindi. Bi nìn nyɔ́ŋkì dicilpu a-ŋal ŋun di mɔ́tì bi-puee»#10.20 bi nìn nyɔ́ŋkì...: kpèè Disa 15.. 21Di sá yii Iciin nìn cúú bimɔɔmiimbi nyɔmmu ki pīitì ní ki nìn yāntì campɔntib ŋúń ki sòon̄ tiŋan#10.21 campɔntib: dūú ŋmàntī nì Ilan 8.3..
Currently Selected:
Sagesse 10: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.