Sagesse 19
19
Bi nín dūtì Tikati mɔɔl puee
1Ama a-ŋuul din kaa sūǹ isaayee nìn nàn̄ binikpitib ki cáa kátì-ku. Di sá yii a nìn nyí kun a làá gíti ŋée. 2Bi nín jìn̄ a-nibul malaa malaa ki yāntì bi búntèe, bi nìn cúú bi-landɔkɔŋu ki kpántì ní ki jìn̄ bi-boon#19.2 B. 2: kpèè Disa 12.31-33 nì 14.5-6.. 3Di sá ŋyunti ŋun bi dáá kā dikpool ki kā ki kɔ́ĺ bi-taŋkpiibi kaakuliŋ ki sūǹee, ní bi gíti tí lēē ŋgbaanlandɔkɔ. Binib bin bi nìn gbāam̀ yii bí yīkèe, bi kùl̄ ki páaǹ bi-boon kii binib bin sáǹee. 4Bi-winlimbu nín máaǹ kuŋyee di téé-bi ki cūnnì niin, ní bi kpáàa súntì tin jítèe pu, án nín làá ŋá pu bí ŋmā kí fōō ditafadaaldi kí kūtì bi-falaau puee. 5Ŋyunti ŋun a-nibul làá còom̀ maamaaci saŋkindee, bíǹ làá ká maamaaci kúm dee.
6Di sá yii tiwannáaŋkaal kɔkɔ nì ti-buluku fātìi pɔ̄ntì ki tɔ́ a-marab, án nín làá ŋá pu tikpitil tiba ń taa bàń a-biyaamuee. 7Bi nìn ká ditagbandi bīiǹ dinaapaal pu, ní ntaŋkulim nyáń laakin nnyim nìn bée. Tikati mɔɔl nìn kpántì didandi din pu diganlakal kpée, ní tinyiŋgban kpántì kii kitimpiliŋ kin cáá tifaapɔnee#19.7 B. 7: kpèè Disa 14.20-22.. 8Niin ní a-nibul kɔkɔ jítì, a-ŋal wúń bi-pu ní bi ká a-maamaaci tuuŋŋi. 9Bi nìn kpátì ki gbí kii itaamu#19.9 kpátì ki gbí kii itaamu: dūú ŋmàntī nì Yees 63.13. nín bí kunaakpaapɔɔun puee ní. Bi nìn yùkufī kii apibilee ki nyɔ́ŋkí sii ti-Dindaan un di nìn fīī-bee. 10Bi gbíntìi téetí tin nìn jítì bi-pu ŋyunti ŋun bi nìn bí kuyuŋunee, min ní an bàà sá kitiŋ ń nyāntí tiwaŋkutee, kì dūu nyántì inaacibee, min ní an bàà sá dimɔɔl ń wùliŋkì ijɔmee, dì dūu wūliŋkì kpaabee#19.10 B. 10: kpèè Disa 8.12-15 nì 7.26-8.11.. 11Míǹ boonee, bi nìn ká inooncaan in pée nyáń i-bee ŋyunti ŋun ní ŋkùm nìn yāntì bi bālifì tijin tin mɔ̄ee puee. 12Kí ŋmā kí kpíiǹ-bee, njikpacimamu nìn nyánní tiŋkun ní#19.12 Kpèè Dikà 11.13..
Soodoom yab kaa fòol̄ binicambi
13Ditafadaaldi nìn jéetì binikpitib pu. Ama kí wàatī míǹ ń bàńee, utaa nìn ŋmɔ́ ki tīī-bi kudaaŋŋu. An nìn máaǹ bí fōō ditafadaaldi din bi nìn fōō bi-toonam puee, di sá yii bi nìn dàkā binicambi pu kináŋ#19.13 dàkā binicambi pu kináŋ (an dàkà yii Isirayeel yab): kpèè Disa 1.8-14. kin gíti lákatì mara puee. 14Biba#19.14 Biba , an dàkà yii Soodoom yab: kpèè Diny 19.1-29. nìn yíì kaa nìn fōō binicambi bin nìn túutì bi-puee. Ama bimbee, bi nìn dū binikɔkaabi bin nìn ŋá-bi tiŋanee ki kpántì iyumbu. 15An kaa dóò. Ditafadaaldi dɔ̄ ki cí bin nìn fōō binicambi kii binannanliibee. 16Bi nìn jíń jiŋaal nì dipɔɔpindi ki fōō-bi. Bi nìn tīī-bi kun bíǹ bi-ba yèe. Ama ní boonee ki dū atuun ŋin pɔ̄ɔ̄yee#19.16 atuun ŋin pɔ̄ɔ̄yee: kpèè Disa 1.8-14. ki nyīī-bi ki múĺ. 17An pu ní bi nìn kpántì bijɔfub, kii bin nìn yú deedeedaan punyɔkɔpuee. Dibɔmbɔŋkpaandi nìn māntìi tú-bi ní báà ŋma nìn kíǹ ki nyàab̀ u-punyɔkɔki.
Unimbɔti cúú tiwannáaŋkaal bimbim ki kpántì
18Kubeeu puee, ŋŋmii kamaa cáá ŋu-siim ní. Iŋmiiyee mɔ́ɔkí ki tìì tɔb kí ŋmā kí nóó ilan nín bí pu i-ba i-bee. Míǹ ní tin mun bí duulinyanee dūu kpáfì isan tikpil poon. Kun nìn jítèe ŋūǹ kí yàntī tí wāl̀ míǹ tiŋan. 19Di sá yii tiwaŋkuti tin còom̄ kitiŋ puee kpántì nnyim poon yati, ní tin bí nnyiminee kíǹ ki còom̄ kitiŋkuliŋŋi pu. 20Ŋŋmi nìn fòol̄ nnyimin nì mpɔn ki jítiǹ mì nín kpààa fòol̄ puee, ní nnyim kaa ti kpáàa ŋūǹ kí gbíntí-ŋu. 21Ama aŋmilimbil kaa nìn wù tiwaŋkuti tin pɔ̀fì ki còom̄ nnyiminee. An kaa nìn dūntì tijin tin nyánní Unimbɔti ceeyee, tijin gbanti mun nìn náań nì dinyintaŋkpal din dùntī sɔkɔmiiyee ní.
Inyɔŋkiluŋkikaa
22Tiŋman ti-Dindaan, isan tikpil poonee, a yōoǹ a-nibul yilpu ki tīī-dì tinyool. A dū-dì ki fá, ama a pée bí di-cee ní ŋyunti kamaa nì laakin kamaa dì yaa bée.
Currently Selected:
Sagesse 19: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.