Siracide 1
1
DIDÀKAL BƆTI DIKITIPEEPEEKAAL
Iciin nyeel
1Iciin kɔkɔ nyēeń ti-Dindaan cee ní,
úǹ cee ní i bí kí nīn cá jaanjaan#1.1 Dūú ŋmàntī nì Alaŋ 2.6..
2Ŋma di ŋūǹ kí kàaǹ tiŋku bul
nì utaa nyim nín jòotī puee nyɔkɔm,
nì duulinya un kaa cáá dikúntilee wiiŋyi?
3Ŋma di ŋūǹ kí béé
kutagbɔŋu nín dátìń puee,
kí béé kitiŋ nín wāā puee,
nì tiŋku nyim nín nyóò puee?
4Unimbɔti náań Iciin
ki wāatì ní ki nín náań tiwan kɔkɔ.
Dinyil landɔkɔŋu pée bí ní
doooo jaanjaan.
5Iciin nyeel di sá Unimbɔti nyɔɔbundi din bí yilpuee.
I-sàmbiyaamu di sá marab bin bí ki cá talkuee.
6Ŋma ní an lēē Iciin nyeel ki dàkā?
Ŋma di nyí tin i bɔ́ntì kí ŋá dibalinee?
8Ubaanti di sá uciŋfiti ní ki baasii sá kuwambiiu,
úǹ di sá ti-Dindaan un kā u-beejal puee.
9Ti-Dindaan u-ba di náań Iciin.
U ká-i ní ki ŋmāntì i-daaku,
ní ki dū-i ki pɔ̀l̄ u-wannaaŋkaati kɔkɔ pu#1.9 B. 6-9: dūú ŋmàntī nì Yoob 28.27..
10U dū-i ki tīī unifoo kamaa nì tiniti,
cilinjee u dū-i ki tīī bin néeń-uee#1.10 B. 10: dūú ŋmàntī nì Uciŋ 2.26, 1 Kɔra 2.9..
Ti-Dindaan faaŋku
11A yaa fàŋkí ti-Dindaanee,
an sá-si tinyool nì dimɔɔndi,
nì mmɔn nì ifaal beefuuliiki ní.
12A yaa fàŋkí ti-Dindaanee,
a-pɔbil pīiǹ ní a bí mmɔnni
nì ifaalin ní ki cáá mmaŋfafɔkɔn.
13Un fàŋkí ti-Dindaanee,
tikɔkɔ còom̄-u tiŋan ní.
U-kúm dalee,
u làá dāá fōō dibiindi.
14Á fàŋkì ti-Dindaanee
di sá iciin kílilaŋki.
Fookiidambee,
doooo bi-na poon ní an tīiń-bi Iciin.
15I máń i-diiku binib kansikin kí nīn cá jaanjaan,
i làá nīn yú deedee nì bi-naantiibi.
16A yaa fàŋkí ti-Dindaanee,
a làá nīn sá uciŋfiti tiŋman pu ní.
I tìì binifoobi i-biliŋ tikpilku.
17I gbēentí bi-cindi tin kɔkɔ bi lèe,
ní ki gbēentí bi-cakalaabi tin i lòoǹee.
18Iciin beefuuliiki di sá ti-Dindaan faaŋku.
Iciin yàntī nnaam nì ŋgbampɔn ń púkuḿ.
19I tìì dinyil nì tibɔti taapu digbilindi,
ní ki yàntī bin cáá-iee kāntí tinyool.
20Ti-Dindaan faaŋku di sá Iciin nyeel,
ní i-paŋŋi sá mmaŋfafɔkɔn#1.20 B. 20: dūú ŋmàntī nì Ditee 4.40, Alaŋ 3.1-2,16..
Kimɔtii nì dibacuul
22A yaa gíí diŋuul dàa cáá taapuee,
baa ŋūǹ kí dūú pɔ̄-si.
Di sá yii un yaa gíí diŋuulee
làá nàan̄ u-ba ní.
23Unil un cáá kimɔtiiyee
ŋmèé ní kí tin kátí-ku,
ama kí dāá kúntée, u làá ká mmɔn.
24Waa làá lì tin u dàkafēe
kí cáá sāā ŋyunti ŋun an máaǹee,
ní báà ŋma ń lì yii u cáá Iciin.
Iciin nì tin bí deedeeyee
25Iciin gaajawanti kansikinee,
dinyil laŋkpaŋŋi bí.
Ama kí nīn yú nì Unimbɔti deedeeyee,
an sá ntimbiil ní ki tīī unikpiti.
26A yaa là iciinee,
nín̄ tɔ́ marab tiŋan,
ní ti-Dindaan ń tīī-si-i.
27Di sá yii ti-Dindaan faaŋku
di sá iciin nì dinyil#1.27 Kpèè Alaŋ 15.33..
Tin fáatiǹ-uee di sá
ú nīn yú deedee kí nīn mɔ̄.
28Taa yíí kí fàŋkì ti-Dindaan,
kí taa sútí kí pìl̄-u nì mili mili pɔbil.
29Taa nín̄ sá mpɔnnyoondaan binib cee,
kí nīn nyí nì a-ba nì tin nyēē a-nyɔkɔnee#1.29 Kpèè Yoob 22.29, Alaŋ 16.18, Maat 23.12, Luuki 14.11..
30Taa yòon̄ a-ba yilpu,
kí taa láa fàtīí lítí taapu
kí dáaĺ icoo kí tɔ̄ a-ba pu.
Di sá yii ti-Dindaan
làá bìitī a-bɔɔŋŋi pu.
U làá sìntīǹ-si taapu samaa kansikin.
Kun puee saa fāŋkì ti-Dindaan,
di sá yii aa dɔ́miń u-cee nì kufaaŋŋu,
ama diŋmatindi nyɔɔbuŋŋi gbí a-pɔbilin.
Currently Selected:
Siracide 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.