Sagesse 18
18
Ŋŋmi tagbanlooŋŋu bɔti
1Ama ŋwalifikpaan nìn bí ki ŋmíntí bin sá a-yabee. Bi-nannanliibi nìn gbìl̀ bi-neeŋyi pu, ama ní kaa wāĺ-bi. Bi nìn bí-bi yii bi bí mmɔnni, kun puee baa bíi jīǹ falaa kii bimbee#18.1 B. 1: dūú ŋmàntī nì Disa 10.23.. 2Bi nìn bíi jáaḿ-bi yii bí taa tɔ̀ falaa un bi yāntì bi jíńee pɔntooŋyi, ní ki nìn gbàam̄-bi bí dū bi nín jáń nì bi puee kpitii kí pɔ̄-bi.
3Ama dibɔmbɔndi paaŋŋu puee, a nìn tīī bin sá a-yabee ntagbanloon ŋun sá ŋŋmee ŋú kpòotī-bi nsan ŋun baa nyée poon. Ŋu nìn bí kii ŋwìiń ŋun mɔ̄ee ní ki nìn céeǹ-bi bi-saŋkindi din nìn sá tinyool yalee poon#18.3 B. 3: kpèè Disa 13.21-22.. 4Ama bi-nannanliibee, an nìn kítì yii bí taa nín̄ cáá ŋwalifi ní dibɔmbɔndi ń cúú-bi kí pìin̄ sarka. Di sá yii bi nìn cúú a-biyaamu kuyuŋu. Too, bíǹ mun pu ní duulinya bàà làá dī kí ká a-marab walifiŋu ŋun kaa kúù jaanjaanee.
Mbiseebiyaamu kúm
5Bi nìn lēē yii bi làá kpɔ̀ bin sá a-yabee bipɔmmu, ní kibiki kibaba nìn ká difiil kaa kpíì. Kí dáaĺ bi-tafalee, a nìn yōoǹ bi-biyaamu tikpil ní ki nāaǹ mu-kɔkɔ dicilpu nnyiŋkpaam poon#18.5 B. 5: kpèè Disa 1.22, 2.2-9. . 6A nìn sòon̄#18.6 A nìn sòon̄: kpèè Disa 12.21-28. nì ti-baabi kunyeeu gbanti pu bí nīn fàal̀ nì dibatɔl. Di sá yii bi nìn nyí ipoon in bi nìn fōō ki kííyee nín pɔ̄ɔ̄ miŋyee. 7A-nibul nìn kā ki cí kunyeeu gbanti ń nīn sá difiil ki tīī deedeedambi, ní kí nīn sá dinàandi ki tīī binannanliibi. 8Tiŋman, kun a nìn dūu dáaĺ binannanliibi tafalee nìn kpántì tinyool wanti ní ki tīī-ti, di sá yii a nìn yíiń-ti a-cee.
9Dibalinee, bin tɔ́-see naantiibi bin bí deedeeyee nìn ŋá saraabi. Bi nìn kpáfì kinyɔkɔ kí nīn tɔ́ a-marau, an dàkà yii bin sá circirdambee ń yàkatī tiwammɔntiil#18.9 yàkatī tiwammɔntiil: kpèè Dikà 31.27, Joos 22.8. nì dinimbinaamandi. Bi nìn gà inyɔŋki laŋyi in nyánní ti-naanjab ceeyee. 10Binannanliibi biilii di nìn kíikí-bi. Bi nìn gbìl̀ ndan binib nín yáliŋkí ki sūǹ bi-biyaamu puee. 11Uyumbu nì un tɔ́ u-bee nìn fōō ditafadaabaantiil, biniyaŋyambi nì ubɔti nìn bí ki jīǹ falaabaanti. 12Bi-kɔkɔ dicilpuee, bi nìn kúù ŋkúmbaantiim ní. Bi nìn cáá anikpil an kaa bí ŋkaan. Binifoobi kaa nìn ŋūǹ kí síb́-bi, di sá yii bi-biyaamu mun cáá kudapɔɔuee kpíì dicilpu dicilpu. 13Bi nìn ŋá mpɔɔgbifin bi-kpaŋkpantiibi tuuŋŋi pu, ama bi nín dāa ká bi-biseebiyaamu nninjabiyaamu kpíìyee ní bi nín béè yii dinibul nee sá Unimbɔti biyaamu#18.13 bi-kpaŋkpantiibi tuuŋŋi: kpèè Disa 7.11-12,22. - Unimbɔti biyaamu: kpèè Oosee 11.1..
14Diŋmiŋŋmil nì ŋgbansɔŋfi nìn bí an kɔkɔ pu, ní kunyeeu mun nìn cōom̀ ku-saŋkindi ki bàn̄ kansikin nì kansikin. 15Niinee a-nyɔɔbundi din pɔ̄ɔ̄yee yíkìń yilpu dibeejal pu. Di yùkū ki jéetì mbusu tiŋki nee pu kii ujanjal un kaa sūǹ isaayee. 16Dì nìn ŋúbiń a-bɔkpaal kii kitàataajiki kin jītí pámpamee#18.16 kitàataajiki kin jītí pámpamee: dūú ŋmàntī nì Eebru 4.12, Dilee 19.15,21.. Dì nìn tūū kutagbɔŋu, ama ní ki nìn còom̄ kitiŋ pu. Dì nìn kíĺ ditundi ní ki kūū binib ki bíl̀ an kɔkɔ fìlfilfil. 17Kpalaayee, bi dámintì tidamintiil tin fàantí-bee, ní dinyoondi kɔ́-bi. 18Bi nìn lítì ki dɔ̄ an kɔkɔ pu kaa kpíìyaaa, kaa wāĺ mun, ní ki nìn lì kun pu ní bi bíi kúùyee. 19Di sá tidamintiil tin nìn fàantí-bee nìn tùkū-bi ki síiǹ, án nín làá ŋá pu bí taa kpú kaa nyí kun pu bi kpíìyee.
Aarɔn yúl̀ ŋkúm nì samaa kansikin
20Deedeedambi mun dáká ŋkúm cɔŋkii ki ká ní an pɔ̀n̄ binib tikpil kuteeun, ama ti-Dindaan, a-ŋuul kaa nìn yúntì#18.20 B. 20: kpèè Dikà 17.9-15.. 21Di sá yii unil un pu baa kāntí tikpitilee nìn ŋá malaa ki wúń bi-pu. U nìn yōoǹ u-saraaŋatundi janjawanti, an dàkà yii ŋwimmeem nì talaalutuukaa un yàntī bí ká ikpiti pɔ̄tamee. U nìn yúl̀ ki bíitiǹ a-ŋuul ní nnaabu gbēeǹ. U ŋá míǹ ki dàkā yii u sá a-tɔntɔnliu. 22Waa jáń ki pɔ́ɔkiǹ a-ŋuul nì dikpabil àá tijanjawan tin pɔ̄ɔ̄yee. Nì dinyɔɔbundi ní u nìn dūu jíń un a nìn yāntì u bíi dátí binib tafalee pu dinyandi. U nìn téetì a nín nìn pūtì ki pōoǹ ti-naanjab ipoon iŋyee pu.
23Ŋyunti gbantee, binib pée kpíì ki nyìkī tɔb pu. Niinee ní u cūtìi yúl̀ ŋkúm nì samaa kansikin ki cúú mì nín wúliń puee ki síiǹ, ní ki pīiǹ nsan ŋun cá binifoobi ceeyee. 24Duulinya kɔkɔ nìn bí u-saraaŋabɔkutikpaandi pu. Bi nìn ŋmàn̄ Isirayeel yab naanjab yiŋŋi ŋin cáá tinyoolee ataŋkpamɔnti kuulii inaa pu, ní a nín sá ukpaan puee daaŋku nìn náká ŋŋaabu ŋun nìn fìn̄ u-yilee#18.24 B. 24: kpèè Disa 28.31-39.. 25Unàanli#18.25 Unàanli: dūú ŋmàntī nì 1 Kɔra 10.10. nín ká mimmee ní u fāŋkì ní ki túlifì u-boon. Tiŋman, a-nibul nìn dáká a-ŋuul ki ká ní an nìn ŋmāntiǹ-bi.
Currently Selected:
Sagesse 18: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.