Sagesse 17
17
Dibɔmbɔndi tafadaaldi
1A nín sòoǹ tibɔti puee nyóò ní ki pɔ̄ɔ̄ unil ń ŋmā kí gbìl̄ taapu. An pu ní binib bin lóò Iciinee wáŋkì. 2Binikpitib gbanti nìn là kí jī a-circir nibul pu dinyandi. Bi kpántì dibɔmbɔndi sarkadambi nì kunyeeu kun yúntèe yumbui. Bi nìn pīī bi-diiŋŋin, ní ki lántì a-neendi din bí talkuee. 3Bi nìn dākafì yii bi làá ŋmā kí báĺ bi-kpitii in bí dibalinee nlansum ŋaabuŋu ŋun gbìfèe boon. Ama bi nìn sáǹ ki yàl̄ ní ki kɔ́ dinyoondi dikpaandin, ní tin bi nìn kāntée nìn fàantí-bi. 4Laakin bi nìn sáń ki bāal̀ee kaa nìn yàntī bí taa fàŋkì. Kuwoou kun nìn pɔ̄ɔ̄ kaŋkaŋee nìn māntìi tú-bi ní bi kāntí ifaŋfanti in nìn yɔ̀l̄ i-nimbiiŋyi gbí kunimbaauee. 5Ŋŋmi ŋun nìn pɔ̄ɔ̄yee kaa nìn ŋūǹ kí ŋmíntí-bi ní iŋmalbijaa in wāĺ tiŋanee kaa nìn kíí kí ŋmíntí kunyawambiiu gbanti. 6Kun bi nìn pée wāĺee di sá ŋŋmi ŋubɔ di pée fòol̄ ŋu-baba ní ki fàantí-bi. Ŋŋmi gbanti yaa nìn wáŋkèe, bi nìn fàŋkí ní bi yaa nìn wāĺ-ŋuee, an gíti fàantí-bi ki lákatì.
7Bikpaŋkpantiibi nyimɔntuuŋŋi kaa nìn gíti cáá mpɔn. Bi nìn dàkafī yii bi cáá Iciin, ama ní ki nìn fòol̄ icoo#17.7 B. 7: kpèè Disa 7.12, 8.14.. 8Bin nìn bí yii bi pɔ̄ɔ̄ ki jì bibunliibi pu tifaandi nì kun ŋáań-bi yári yaree, kufaaŋŋu nìn yāntì bíǹ bi-ba búŋkì ní an nìn mɔ̄ tilaal. 9Báà tiba yaa kaa nìn bí kí fàaǹ-baaa, ipeel nín jītí puee nì ikoobu nín sūǹ puee nìn fàantí-bi. 10Bi nìn kúù kufaaŋŋu, ní ki nìn yíití kí ŋúbití bi-nimbiliŋ kí kpèè dibɔmbɔndi din poon bi nìn bí kaa ŋūǹ kí sāǹ kí ŋmátée.
11Di sá binikpitib dàkà yii baa cáá dipɔbil ní ki kù bíǹ bi-ba bɔti. Bi-landɔkɔjaatiŋu kɔ́kɔĺ-bi ní agìń mɔ̀tīi kútí. 12Di sá yii un fàŋkée sá un di kaa là u-landɔkɔŋu ń tūtuǹ-uee. 13Ti-nee, ti yaa kaa máká ditutundi gbanti puee, taa béetí kun pu ti bí ki jīǹ falaayee ní falaa mɔ̀tīi kútí.
14Kunyeeu gbanti kaa nìn cáá báà mpɔn. Ku nìn nyáń ditaŋkpiil din mun kaa cáá mpɔnee taapu taapu ní. Binib gbanti mun kaa nìn ká ŋgeemmɔntiim ki gèen̄. 15Ifaŋfanti di nìn jì-bi ní bi-wunti dūu kpíì baa ti cáá mpɔn kí ŋá tiba, di sá yii kufaaŋŋu kun pu baa túkúee cúú-bi dicilpu dicilpu. 16Míǹ mbaantiim ní un kamaa nìn bí niinee nìn lítí kitiŋ, ní ki nìn pīī sarka un kaa cáá kipunyɔkɔee poon. 17Ukpaaleeee, uwaŋkpaaleeee, utɔntɔnli un gbāā kuteeu pu ki tūǹ ditundi din pɔ̄ɔ̄yeeyeeee, nnaabu gbanti nìn túuǹ báà ŋma ní baa nìn gíti ŋūǹ kí ŋá tiba. 18Di sá yii dibɔmbɔmbaantiilee di nìn bóob́ bi-kɔkɔ kii ikusakee. Kubuŋu nín jītí puee, inoon in tɔ́kɔ́ asupan ŋin cáá tifaal pu ki gà ilan in mɔ̄ee, nnyim min pùub̀ múlmul nì mpɔnee, 19ataŋkpee ŋin lítée wooku, tiwaŋkuti tin sáń baa wāĺ-tèe nín yùkufī puee, ipeecuncuti nín sūǹ puee, àá kuwoou kun nyēeń njoofaŋfakaminee, tíǹ gbanti kɔkɔ nìn fàantí-bi ní bi-wunti kúù.
20Laan kɔkɔ nìn kíǹee, ŋwalifikpaan di nìn ŋmíntí duulinya ní báà ŋma nìn nìkì u-tundi an kaa cáá digìńdi. 21Bíǹ baba pu ní kunyeeu kun nìn nyìm̀ gbantee nìn dàn̄, kunyeeu kun di sá dibɔmbɔŋkpaandi kun làá dāá màntīí tū-bi bi-kúm dalee naŋkuee. Ama bíǹ bi-ba nìn gíti sá diwaŋgul din nyìm̀ ki jítiǹ dibɔmbɔndee.
Currently Selected:
Sagesse 17: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.