Sagesse 16
16
Isirayeel yab jíń ki díkí ní Eejipiti yab dɔ̄ ŋkùm
1An pu ní tiwaŋkuti tiba mun dáaĺ bin jáaḿ-tèe tafal kii an nín máaǹ puee, ní tiwaŋkuti tikpil yāntì bi jíń falaa. 2Ama ti-Dindaan, an nín bàà sá á dáaĺ a-nibul tafalee, kulaŋŋaŋfitiiu ní a dàkā-bi. A nìn bɔ́ntì njikpacimamu#16.2 njikpacimamu : kpèè Disa 16.13. ki tīī-bi bi jíń, tijin tin mɔ̄ ki kù ŋkùmee. 3Bi-nannanliibi bin ŋkùm nìn cáá bi nyàab̀ tijin kí jēe, ŋyunti ŋun a dū tiwaŋkuti tin cáá titantanee ki tɔ́ bi-puee, ŋkùm nìn kpíì bi-poon. Ama a-nibul din ŋkùm nìn cúú ŋyunti fiii poonee dāa ká tijin tin mɔ̄ee ki jíń. 4An nìn sá yii bin nìn sàantí-bee, ŋkùm ń cúú-bi ŋkpitim pu, ama ní a-nib ń nīn bí ki kpèé bi-nannanliibi nín jīǹ falaa puee.
Kukoonaŋu nì tiwaŋkuti tin kùee bɔti
5Báà nì min kamaa a nìn dū tiwaŋkuti tin cáá tiloolee ki tɔ́ a-nibul pu ní ikoobu in fù i-biŋŋi puee júntì ki kūū-bee, a-ŋuul kaa nìn cūtì ndan ki kūū ki nāaǹ-bi. 6A nìn là kí kpāafì-bi ní ki yāntì bi fāŋkì ŋyunti fiii poon. Míǹ boonee, a nìn tīī-bi difiil daaŋku kí ŋmā kí téetí-bi a-marau bɔkpaafikaati. 7Un yaa nìn fātì u-ba ki túĺ kudaaŋŋuee nìn kāntí difiil, ní an kaa nìn sá tiwan tin bi nìn kpèéyee di nìn yì-tì ní bi kāntí difiil, ama sii ti-kɔkɔ fiiliu pu ní bi nìn kāntí difiil.
8Míǹ ní a nìn ŋá ní ki dàkā ti-nannanliibi yii sii di fìil̄ unil ki nyāntí tibɔkpitil kɔkɔn. 9Bimbee, isii nì inaakitoon di nìn júntì ki kūū-bi, ní baa nìn ŋúń ki ká nnyɔkɔ ki fīī-bi, di sá an nìn máaǹ yii tiwaŋkuti gbanti ń dáaĺ bi-tafal míǹ#16.9 B. 9: kpèè Disa 8.16-28, 10.1-20.. 10Ama a-biyaamuee, ikoobu in cáá tiloolee nyiŋŋi kaa ŋúń ki kūū ki céetì-bi di sá yii a-poommɔŋŋu poonee, a jòoń-bi ki cáaǹ-bi. 11Ikoobu in nìn júntì-bee nìn téetí-bi a-bɔkpaaŋi, ama a nìn fīī-bi malaa, án nín làá ŋá pu bí taa súntí tikɔkɔ pu, ama kí nīn gbíntìi nìkì ki fòol̄ a-ŋantee. 12An kaa sá tifaapibiti àá ŋkpam di nìn cáaǹ-bi, ama a-nyɔɔbundi din cāantí tikɔkɔee#16.12 a-nyɔɔbundi din cāantí tikɔkɔee: dūú ŋmàntī nì Ilan 107.20. di nìn cáaǹ-bi, ti-Dindaan. 13Di sá sii di cáá dimaŋfal nì ŋkúm pu mpɔn. A yàntī binib ń sìntī ditaŋkpiilin ní kí fàtīí yàntī bí jɔ̄mìń#16.13 B. 13: dūú ŋmàntī nì 1 Sami 2.6.. 14Unil ŋūǹ kí dū ntoonam kí kpɔ̀ u-juti, ama waa ŋūǹ kí gíiǹní kufoou kun nyánnée, ní kaa tí ŋūǹ kí fīī kinaŋ kin pīī ditaŋkpiilinee.
Ditaanyiŋkumbil nì Maana bɔti
15Ubɔ kpá ki ŋūǹ kí sāǹ kí ŋmátí a-ŋaan. 16A dū a-ŋal ŋun cáá mpɔnee ki gbáń binikpitib bin kaa nìn là kí béé-see. Utaakpaan nì ataanyiŋkumbil#16.16 Utaakpaan nì ataanyiŋkumbil: dūú ŋmàntī nì Ilan 78.47-48. ŋin nyáń ŋi-bee nì utaa un cáá kubuŋkpaaŋŋuee nyáń bi-pu, ní ŋŋmi wùn̄ ki céetì-bi. 17Kun gíti sá atulim bɔtee di sá nnyim min gbíntí tikɔkɔee, ŋŋmi bí ŋu-poon ki mɔ̀tīi fòol̄ bìlbil. Di sá yii duulinya jáà ki kútí deedeedambi pu ní. 18Iyunti iba poonee, aŋmilimbilee bàtī kí taa wà kí céetí tiwaŋkuti tin a dūu tɔ́ a-nannanliibi puee, ama bi yaa ká mimmee bí béé yii Unimbɔti bɔsooŋyi di bíi jì-bi. 19Iyunti iba mun poonee, ŋŋmee nìn fòol̄ nnyim kansikin nì mpɔn, kí ŋmā kí wà kí céetí kitiŋ kin kaa bí deedeeyee wanti tin kì lòon̄ee.
20Ama a nìn tīī a-nibul ituun jinti. A nìn tīiń-bi doooo yilpu tijin tin bɔ́ntì#16.20 A nìn tīiń-bi doooo yilpu tijin tin bɔ́ntì: maana (kpèè Disa 16.13-21, Ilan 78.24-25). baa ŋá ti-pu báà digìńdee. Tijin gbanti nìn ŋān̄ ki sɔ́fì ki nìn mɔ̄ ki tīī báà ŋma. 21Tijin tin nìn nyēeń a-cee gbantee nìn dàkà a nín mɔ̄ ki tīī a-biyaamu puee, ama tì nìn mɔ̄ ki tīī un kamaa jīǹ-tèe ní ki kpántí báà ŋma nín là puee. 22Tì nìn bí kii ntaayim àá dinyintaŋkpalee#16.22 ntaayim àá dinyintaŋkpalee: dūú ŋmàntī nì Disa 16.14. ní. Nì míǹ kɔkɔee, ŋŋmi kaa nìn ŋáań-tì tiba ní taa nìn dùntī mun. A nìn ŋá míǹ kí dàkà a-nibul yii ŋŋmi ŋun nìn fòol̄ ataanyiŋkumbil kansikin ki tòó itaaŋmɔŋmɔ utaa poonee làá wà kí céetí binannanliibi kpaajinti. 23Ama ŋŋmi gbanti mbaanti nìn súntí mpɔn ŋun ŋu cááyee pu kí ŋmā kí yàntī deedeedambi ń ká kí jī.
24Tiwan tin a náańee bɔ́ntì kí tɔ̄ ditundi kí tīī sii ti-náanliu. Tì dàntī kii butɔbuee kí dáaĺ binikpitib tafal, ama ní ki pɔ̀fintí ti-ba kí ŋá bin máká a-puee tiŋan. 25An pu ní tì ŋūǹ kí fōō dikpántil kɔkɔ nì di-bulifi. Tì nìn bí a-ŋanti tin nìn kpántí tijinee taapu, ki nóó nì bin nìn bàlifēe nín là puee. 26Ti-Dindaan, míǹ ní a-biyaamu mun a néeńee làá bīfì kí béé yii an kaa sá tikpaajin di kpīintí unil, ama a-nyɔɔbundi di yàntī bin fōō-si ki kííyee bí dimaŋfalin#16.26 B. 26: dūú ŋmàntī nì Ditee 8.3.. 27Tijin tin ŋŋmi kaa nìn wùn̄ ki bíil̀ee, ŋwìiń tuntuŋku fiii yéè di nìn dùntī-tì. 28A là kí dàkà-ti yii ti máaǹ kí jāam̀-si kí wàatī ní ŋwìiń ń nín nyā, ní kí mèè-si kí wàatī ní kutaa ń nín wúntí. 29Ama un kaa nyí tiŋanee mákal làá dùntī kii nsɔnsɔm yuntiŋu pɔ̀ńdee ní, ní kí pùub̀ kí búntí kii nnyim min kaa ti kèetēe.
Currently Selected:
Sagesse 16: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.