Sagesse 15
15
Fookii nyántì Isirayeel yab iwaatootin
1Ama sii ti-Nimbɔtiuee, a ŋān̄ ní ki bí deedee. A cáá kimɔtii ní ki kpòotī tikɔkɔ nì a-poommɔŋŋu poon#15.1 B. 1: dūú ŋmàntī nì Disa 34.6.. 2Báà ti yaa ŋá ikpiti, ti sá ki tīī-si ní, di sá yii ti nyí a-pɔŋŋu. Ama taa làá ŋá ikpiti, kun puee ti nyí a nín nyí ti-pu yii ti sá a-yabee. 3Tiŋman, unil yaa nyí-see, see ú nīn bí deedee, ní un yaa nyí a-pɔŋŋuee cáá dimákal yii u làá nīn bí talku.
4Unil nín náań tiwaŋkpitil tiŋyee kaa yāntì ti gáatì, kaa ti yāntì bin mɔ́ntí bi-ba ki lèekī tiwan tin kaa kèetī, àá ki cáá inyiŋfi nín bí pu i-ba i-ba ki lèekī footab biŋyee mɔ́ntì-ti. 5Bigbaambi yaa ká tin bi ŋée, an nyàatī-bi ní kunaŋu kun kaa cáá dimaŋfal ki yú jìninee dátí-bi. 6Bin kpítí awaa gbanti nì bin néeń-ŋi ki jáaḿ-ŋee néeń ki ŋáań ikpiti, ní ki máaǹ kí fōō dimákakulindi paati tin dɔ̄ ki cí-bee.
Uyɔɔmaati un māā awaayee waatiiku
7Uyɔɔmaati dù difaŋgiil ní kí búuń kí tāā kuyɔkɔu ní kí mā asambil ŋin ti cáa ŋáań tiwan baabadalee. Kuyɔkɔbaantiiuee ní u tí dūú mā asambil ŋin bi làá dūú ŋá tiwammɔntiilee nì ŋin báà ŋma pée ŋūǹ kí nīn cáa ŋáań min u lèe. Ama uyɔɔmaati di lèekī bi nín làá nīn cáá kun u bíi māāyee ki ŋáań kuŋyee#15.7 B. 7: dūú ŋmàntī nì Yeer 18.2-4, Room 9.21, 2 Tiim 2.20.. 8Míǹ boonee ní ú dū kuyɔkɔbaantiiuee kí mā diwaal din kaa bée ní kí gīī fám. Too, ntam gbantin ní u nyánní ní an kaa làá yúntí u làá fàtīí gítí ntam min poon u nyánnée, ŋyunti ŋun ní Unimbɔti làá dāá fàtīí fōō kinaŋ kin u nìn dūu pīnnì-uee#15.8 ntam min poon u nyánnée: kpèè Diny 3.19. - dūu pīnnì-uee: dūú ŋmàntī nì Uciŋ 12.7.. 9An nín bàà sá ú dàkafì ŋkúm min u làá kpú ŋwindal nì u-maŋfal nín kaa fɔ̀kɔ̀ee puee, ní u là kí ŋá kii bin tūǹ sindaariya nì animbil tundee, ní ki cáá u-ba ki túŋkíǹ bin dùntī tasa kútee. U dàkafī yii u yaa bíi mɔ́ɔ̀ tin kaa sá tiŋmanee, u làá ká tinyool ní.
10U-pɔbil pée sá kii ŋfantamee ní. Ntam sɔ́ǹ kun pu u mákée ní u-maŋfal kaa cáá kudapɔɔu ki bàn̄ kuyɔkɔu. 11Di sá yii waa nyí un di máń-uee. Too, úǹ di púfì kinaŋ kin tūǹ ditundi nee nì ŋfam min yàntī unil bí dimaŋfalinee ki ŋá u-ni#15.11 Kpèè Diny 2.7.. 12Úǹ dàkafī yii ti-maŋfal sá kii abiyaagbiilee ní, ní ti-bítam bí kii kinyɔŋ kin poon ní ti ŋūǹ kí ká animbil tikpilee. U lì yii unil máaǹ kí ká an kɔkɔ pu ipaati, báà kí dī isaŋkpiti pu.
13Unil gbanti baasii nyí ki jítiǹ báà ŋma yii u bíi ŋáań ikpiti, ŋyunti ŋun u cáá kuyɔkɔbaantiiu ki māā asambil ŋin pɔ̀fèe nì awaayee.
Isirayeel yab nannanliibi waatootii
14Ti-Dindaan, a-nibul nannanliibi nì bin nìn wɔ́b̀-bee sá bigbaambi ní, mbiyaamu gba nyíǹ-bi. 15Bi dū atimbun kɔkɔ waaŋi ki ŋá inimbɔti. Awaa gbanti cáá animbil ama ní kaa wāĺ, ŋi cáá imaŋfataabun ama ní kaa fòotī, ŋi cáá atafal ama ní kaa gbìl̀, ŋi-ŋalii cáá ŋŋambiyaamu ama ní kaa ŋūǹ kí gbēē tiba, ŋi cáá ataa ama ní kaa ŋūǹ kí còom̀#15.15 B. 15: dūú ŋmàntī nì Ilan 115.4-7.. 16Awaa gbantee, nisaaleen di máń-ŋi. Un máń-ŋee mun fōō kufoou kun bi dūu pīnnì-uee ní. Too báà unil kaa ŋūǹ kí mɔ́ɔ́ diwaal din làá nīn náań nì uee. 17Unil sá un kúùyee ní, ní tin u pée ŋūǹ kí dū u-ŋalii in ŋáań ikpitee kí náańee làá nīn sá tiwan tin mun kaa bí dimaŋfalinee ní. Úǹ u-ba sɔ́ǹ tiwan tin u jáaḿee: úǹ fōō dimaŋfal, ama tiwan gbanti pée kpá kí nīn bí dimaŋfalin.
18Bi jáaḿ tiwaŋkuti tin cáá titantanee. Tiwaŋkuti tin lóò dinyil tin kɔkɔ kíǹee kansikinee. 19Tiwaŋkuti gbanti kaa ŋān̄ nnimbikpee kí ŋmā kí dáaĺ unil kii tin kíǹee. Ŋyunti ŋun Unimbɔti nìn bíi pàkà ki bìintí u-wannaaŋkaati puee, u nìn súntì tíǹ pu.
Currently Selected:
Sagesse 15: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.