Sagesse 14
14
Usaŋkinli bɔti
1Uninja ubɔ mun di bí ní ki bíi bɔ́ntí kí kɔ́ meela kí cù nsan tinyiŋgban tin pɔ̄ɔ̄yee kansikin, ní ki cūtìi bíi kūuntí ki yíì didɔgindi din pɔ̀fì ki jítiǹ meela un làá cáá-u kí cùnnèe. 2Di sá yii ubɔ di ká nlandɔkɔ kí kpáá meela gbanti kí ká animbil, ní ŋŋal pu tɔntɔnliu dū u-ciiŋyi ki kpáá-u. 3Ama ti-baa, a-neendi di sá u-ŋàali. A cátí-u didandi tiŋku pu, a cátí-u nsan tinyiŋgban kansikin, 4ki dàkà yii a ŋūǹ kí fīī unil kí nyāntí dinimbinaamandin, báà udaan yaa kaa nyí nnyim pu tundi. 5Aa là yii a-ciiŋyi tuuŋŋi ń gbíntí fám. An pu ní binib bin cáá bi-maŋfal ki ŋáań didɔgindi din kaa bí tiban nee ŋaanee ŋúń ki kāl̀ meelan ki dūtì tinyiŋgban tiba kaa ŋá-bi. 6Míǹ pu ní ŋkilkaaminee, tinikpaandi bilambidambee nìn kpíì. Ama bin nìn sá duulinya mákalee nìn sáǹ ki kɔ́ meelan ní, ní a-ŋal kpōotì ní bi dāa dūu màl̄ binib bin kíĺ duulinyapɔɔnee.
7Ndɔ ŋun di kpántì a-deedee tɔntɔŋwantee ká dibiindeeee! 8Ama ndɔ ŋun bi dūu kpítì diwaal nì un di kpítì-dèe bí mbusun: ukpiŋkpiitee bí mbusun kun puee úǹ di kpítì-dì, ní diwaalee mun bí mbusun kun puee dì kúù, ama ní bi yíì-dì unimbɔti. 9Di sá yii Unimbɔti ná unikpiti ki kpáaǹ u-tuŋkpitiŋ mun ní. 10An puee u làá dáaĺ kun bi kpítèe nì un kpítì-kuee tafal. 11Tiŋman Unimbɔti làá dāá jáǹ atimbun waaŋi, di sá yii ŋi kpántì ntimbiil wanti Unimbɔti wannaaŋkaati kansikin. Ŋi yàntī binib ŋáań ikpiti, ní ki kpántí kutaliŋŋu ki tìì bigbaambi.
Awaa ŋin bi kpítì ki nántiǹ binibee nyeel
12Ŋyunti ŋun binib ká nlandɔkɔ kí nīn kpítí awaayee, ní bi kíĺ kaa ti yú nì Unimbɔti deedee, ní bi-wannaaŋkaati gbanti bíil̀ bi-maŋfal. 13Ŋkilkaaminee, awaakpitikaa gbanti kaa nìn bí ní ŋaa làá nīn bí ki cá talku mun. 14Binib nín kaa dàkafī ki cá ndan puee di yì-tì ní ŋi kɔ́nní duulinyan, míǹ ní an ŋmàn̄ ki síiǹ yii ŋi làá wāŋkì malaa.
15Ubaati ubɔ di nìn bí u-jipɔɔn kpíì ŋkúntuntukum ní u yāntì bi kpítì u-biki kin kaa ti bée naŋku. Un di nìn kpántì utaŋkpiilee, kɔŋkɔnnee, úǹ ní u kíǹ ki tìì tinyool kii unimbɔtee, ní ki cáá abɔɔn nì akoobil ki tìì bin bí u-taapuee. 16An bí míǹ ki cée ní dikoobikpitil gbanti dāa dūu kpántì mara.
Míǹ mbaantiim bibɔtikpaambi tīī mara ní bi kpítì awaa ní binib jáaḿ. 17Bin nìn kóò ndanee kaa nìn ŋūǹ kí tīī bibɔtiibi gbanti tinyool bi-nimbiin. An puee bi nìn kpèé bibɔtiibee nín bí puee ní kí lēē ubɔti un bi làá nīn tìì tinyoolee naŋku. Mimmee bi ŋūǹ kí dū difaŋgiil kí pàkà ubɔti un kpá bi-kansikinee kii u bée. 18Ki kpáaǹ bin kaa nyí-uee, iŋal pu tɔntɔnliu sàal̄-bi bí ŋmā kí jāam̀-u kii unimbɔtee. 19U nín là kí fáatíǹ ubɔtee, see ú pɔ́ɔǹ kí ŋá tin gíti ŋān̄ ki jítiǹ tibɔŋmanee. 20Niinee, tiwan tin u kpítèe nyaaŋku ń dáaĺ samaa, ní unil un bi nìn dáá tìì tinyoolee ń kpántí tiwan tin bi kíǹ ki jáaḿee. 21Míǹ ní an dì kí kpántí kutaliŋŋu kí tīī binib. Binib bin kpántì nnaabu nì mpɔn yumbuyee dū diyindi din sá Unimbɔti baba yalee ki pú ataŋkpee nì adɔgin.
Iwaatooti nín cāabìń tiŋyee
22An kaa sá yii bi mɔ́ntì bi-ba kaa béè Unimbɔti ŋmaniŋma, ama bi bí bi-gbaandi jaaku poon, ní ki yíì tijáti gbanti yii ŋgbansɔŋfi. 23Bi kù mbiyaamu ki cáa ŋáań saraabi, ki lèekī maamaaci bɔɔwuliŋ, ní ki jīǹ jiŋaalib bin poon ní bi ŋáań bi nín là puee. 24Baa ti dū unil maŋfal ki yíiń tiba, ní kaa yú deedee bi-cati poon. Unil nyēē u-juti boon ní kí kpɔ̀-u, àá kí cáá u-juti nimpuu kí sìì-u. 25Tikɔkɔ dūu ŋmālim̀ ní cɔkisii: bi féeń fatiku ki kù binib. Bi yù ní ki mɔ́ntí binib. Bi cáá inaamuul kaa cáá mbaamɔn, ki néeń kujaau ki pùtī fám fám. 26Bi sàantí bibulcinnib kaa nyí tiŋan, ki bíil̀, bininjab dɔ̀ nì tɔb ní binimpoobi mun dɔ̀ nì tɔb. Bi-nimpucáatam kaa nóó mara ní ki sá bilaakpaadambi nì bijɔkɔndambi.
27Di sá yii iwaatooti di sá tikpitil kɔkɔ kílilaŋki. Íǹ di sá tikpitil nyeel ní ki yì tikpitil. 28Bin tòotī awaa gbantee yaa fītèe, baa ti yì bi-ba ní ki nàatī tinyimɔmbɔti ní ki pée bí bi nín là puee, ní ki nyēē bi-pooŋyi boon. 29Bi nín máká awaa ŋin kaa cáá dimaŋfal ŋinee puee, bi nyí yii báà bi yaa pūtì fámaaa, ŋaa làá ŋá-bi tiba. 30Ama bi làá dāá dáaĺ bi-tafal tiwan tili pu. Mpeepeekaamee, baa béè Unimbɔti ní ki dū bi-ba ki líiǹ awaa. Nliliitiimee, bi kpēē ki sīŋkiǹ tin bí circiree ki pūtì fám ki mɔ́ntì binib. 31Báà awaa ŋin bi yíiń ki pūtèe yaa kaa cáá mpɔn kí dáaĺ bi-tafalaaa, bi làá fōō binikpitib tafadaaldi din di sá abɔkpildambi yìntitam tafadaaldee.
Currently Selected:
Sagesse 14: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.