Sagesse 11
11
1Iciin nìn yāntì an bútì bi-tuuŋŋi circir bɔnaatiliu#11.1 circir bɔnaatiliu: Mooyiisi (kpèè Ditee 18.15, 34.10). ubɔ pu. 2Bi nìn cōom̀ ki jítì kuteeu kun pu ubɔ kaa kóòyee, ní ki cóoǹ bi-tantib laakin unil taal kaa tāā ki kée. 3Bi nìn jáń nì bi-nannanliibi ní ki jìn̄ bi-pulincɔntiibi.
III. ISIRAYEEL YAB SAŊKINDI BƆTI
Isirayeel yab nyinnyooŋu nì Eejipiti yab yɔŋu
4Nnyinnyoo nìn cúú-bi ní bi kúuǹ ki yíiń-si. Niinee ditaŋkpal din nyɔkɔ cɔ́m̀ee tīī-bi nnyim, ditaŋkpal din pɔ̄ɔ̄yee kūū bi-nyinnyooŋu#11.4 Kpèè Disa 17.1-7.. 5Míǹ puee, nnyim min bi nìn dūu dáaĺ bi-nannanliibi tafalee di kpántì tiŋan ki tīī-bi bi-nimbinaamandin.
6A nìn dū tikpati tin ŋmàl̄ fatikuee ki gbātì#11.6 tikpati... ki gbātì: kpèè Disa 7.14-25. bi-mɔɔl nyim min nìn pùub̀ kaa gbèentée. 7Di sá yii binannanliibi nìn tīī mara bí kpɔ̀ mbipɔmu#11.7 kpɔ̀ mbipɔmu: kpèè Disa 1.22., ní a dáaĺ bi-tafal. Ama bin sá a-yabee, a nìn tīī-bi nnyim tikpil min pu baa nìn túkúee. 8A nìn dī nnyinnyoo ŋun nìn cúú-bee gbanti pu ní ki dàkā-bi a nín nìn dáaĺ bi-nannanliibi tafal puee. 9Tiŋman, a nìn cɔ́ŋkì-bi, ní ki dáaĺ bi-tafal a-laŋŋaŋfitiiku poon, bí ŋmā kí béé falaa un ní binikpitib jīǹ ŋyunti ŋun ní a yaa bíi sòoǹ bi-bɔti nì diŋuul poonee. 10A-yabee, a nìn cɔ́ŋkì-bi kii ubaati nín wòoǹ u-biyaamu puee ní. Ama bi-nannanliibee, a nìn sòon̄ bi-bɔti kii ubɔti un di dátí binib tafal kaa sūǹ isaayee ní. 11A-yab nannanliibi yaa nìn pìlīǹ-baaa, bi yaa nìn dátiǹ-baaa, bi nìn jīǹ falaa mbaantiim ní. 12Tiwan tili di nìn kɔ̄ntí-bi kunimbaau. Mpeekaamee, bi yaa téetì inaabu in jítèe puee, bi yáliŋkí ní. 13Míǹ boonee bi yaa nìn gbìl̄ yii inaabu in bi dūu dáaĺ bi-tafalee kpántì tiŋan ki tīī bin kíǹeeyee, ní bí gbìl̄ bi-ban yii sii ti-Dindaan di ŋá míǹ. 14Un bi nìn dūu fá njamin ŋkúm ń dāá yòon̄-uee, un bi nìn jìn̄ nì ibeelee#11.14 fá... yòon̄-uee: kpèè Disa 1.22, 2.1-3, Atuun 7.19-21. - nì ibeelee: kpèè Disa 5.2-5, 7.13,22., an dāa kúntèe, úǹ bɔti di ŋá-bi maamaaci, di sá yii nnyinnyoo ŋun cúú-bee nyáń ŋu-ba nì ŋun cúú deedeedambee.
Bin jáaḿ tiwaŋkutee tafadaaldi
15Bi-gbaanlandɔkɔi nì bi-landɔkɔkpitii in yàntī bi wáŋkée puee, bi jáam̀ ikoobu in kaa cáá nlandɔkɔ nì tiwaŋkuti tin kaa pée bí tibanee. A nìn dū tiwaŋkuti tin kaa cáá dinyilee ki tɔ́ bi-pu kí dáaĺ bi-tafal#11.15 Kpèè Disa 8.1-10.15., 16án nín làá ŋá pu bí béé yii laakin unil ŋá ikpitee, niin ní u fòol̄ u-tafadaaldee. 17A-ŋal ŋun cáá mpɔnee di dū tiwan tin kaa cáá dikílee ki náań duulinya kaa gbìl̄ digìńdi báà diba pu. An puee a bàà nìn ŋūǹ kí dū agbiŋgbil nì gbikintib bin cáá ntoom tikpil tikpilee kí tɔ̄ bi-pu, 18àá tipeebilindi tin baa nyí a dáá pée náań mpɔmin, i cáá mbum ní ki ŋūǹ kí nyāntí ŋŋmi ti-nyɔmmunee kí tɔ̄ bi-pu, àá kí dū nnyiim min cáá kuwoouee kí kpátí, àá kí yàntī itaaŋmɔŋmɔ ń nyā bi-nimbiliŋin. 19An kaa sá tipeebilindee toom ŋmaniŋma di bàà làá kpɔ̀ binib gbanti, ama bi yaa bàà pée wál̀-tèe, dinyoondi di bàà kù-bi. 20Báà an yaa kaa sá tipeebilindi gbanti, a pée ŋūǹ kí púfí dibaba ní bí lábití kí lítí, kí dū a-deedeeu kí jà-bi, ní kí dū a-fooku kun cáá mpɔnee kí yàaǹ-bi. Ama a pée ŋmāntì tikɔkɔ ní ki bɔ́ntì dicɔ́til nì nnyiŋfi poon#11.20 dicɔ́til nì nnyiŋfi poon: dūú ŋmàntī nì Yees 40.12, Yoob 28.25-26..
Unimbɔti Mpɔŋkɔdaan nì dineendidaan
21A-pɔŋkpaaŋŋuee làá nīn pée bí a-cee ní á dūú tɔ̄ ditundi, ní ubɔ kaa ŋūǹ kí jáǹ-ŋu. 22Tiŋman, sii ceeyee, duulinya kɔkɔ bí kii nnyiŋfi fiii ŋun bi dūu páaǹ saniya puee ní, a lì kii ditaafaamalindi nín jòotī kitiŋ pu puee#11.22 B. 22: dūú ŋmàntī nì Yees 40.15.. 23Ama a sūǹ tikɔkɔ saai kun puee a ŋūǹ tikɔkɔ, ní ki fàtī a-boon ki tìì bi-kpitii kí ŋmā kí pɔ̄-bi ŋyunti bí kpántí bi-ba. 24A néeń tin kɔkɔ pée bée, ní kaa ná tiwan tin a náańee báà kubɔbɔ. A yaa bàà ná ti-kansikin kubɔbɔee, aa bàà nāantí-kù. 25Mana ní sii yaa kaa là yii tiba ń nīn bí kí yúntée, tì làá nīn bí kí yúntí? Mana ní tiba ŋūǹ kí nīn bí sii yaa kaa bí yii tí nīn bí? 26A yàntī tiwan kɔkɔ bí dimaŋfalin, kun puee tì sá a-yati, ti-Dindaan, sii un di néeń dimaŋfalee.
Currently Selected:
Sagesse 11: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.