Sagesse 12
12
1Tiŋman, a-Fam min kaa kúùyee bí tiwan kɔkɔn.
Kanaan yab tafadaaldi
2An puee soooo soooo ní a dátí unikpiti tafal. A wòoǹ-bi ní ki téetí-bi bi-yìntitam, án nín làá ŋá pu bí fá ikpiti kí fōō sii ti-Dindaan kí kííyee. 3Míǹ ní a nìn ŋá bin nìn kóò a-circir tiŋkinee#12.3 bin nìn kóò...: an sá Kanaan yab (dūú ŋmàntī nì Ditee 7.1).. 4A-nimbil kaa nìn là kí wāl̀-bi bi-timbiilituuŋŋi pu: kukpaŋkpantiiu tuuŋŋi, akoobil ŋin sá ticoobɔtee, 5bi nín kù mbiyaamu inimbinaakulim poon kí ŋá saraayee, jiŋaalib bin poon bi ŋmóò binib nanti nì bi-fatikuu áli poon nayee. Bi nìn cúú binib bin bí dikitil gbantinee bi bíi ŋáań míǹ#12.5 B. 4-5: kpèè Ditee 18.9-14.. 6Bibaatiibi bin nìn kù bi-biyaamu mun kaa cáá ubɔ ń mɔ̄tì mu-puee puee, a nìn lēē ti-naanjab bí dū bi-ŋalii kí kpɔ̀-bi, 7án nín làá ŋá pu kitiŋ kin ní a néeń ki jítiǹ ntimu kɔkɔee ń bàà fōō Unimbɔti biyaamu mun kítì kí kɔ́ ki-puee. 8Ama a nìn súń binib gbanti kɔkɔ saai, kun puee bi pée gbíntìi sá binib ní. A nìn dū abaakati#12.8 abaakati : kpèè Disa 23.28. ki tú ŋí lìntī a-janjaliibi nyɔkɔpu kí nīn kù-bi fiii fiii. 9Min kamaa a bàà nìn ŋūǹ kí dū binikpitib gbanti kí ŋá deedeedambi ŋaan kujabambaantiiunee. A bàà nìn tí ŋūǹ kí dū ipeecuncuti kí tɔ̄ bi-pu, àá kí tīī mara un pɔ̄ɔ̄yee kí kpɔ̀ kí céetí-bi. 10Ama a pée sòon̄ a-bɔti soooo soooo bí bàà ŋmā kí kpántí bi-ba, di sá yii a pée nyí bi-nyeeŋŋu nín sá ikpiti ŋmee. Bi pée màl̄-bi ikpitin ní, ní baa ŋūǹ kí kpántí nlandɔkɔ. 11Di sá yii bi sá ditimbundi din bí mbusun doooo ŋkilkaaminee ní#12.11 doooo ŋkilkaaminee ní: kpèè Diny 9.25..
A yaa kaa nìn dáaĺ bi-tafal bi-kpitii puee, an kaa nìn sá yii a fàŋkí ubɔ. 12Ŋma di sá-u kí bàlifì-si yii: «Ba ní a ŋée?» Ŋma di ŋūǹ kí kpákáǹ a nín sòon̄ tibɔti puee? Ŋma di tí ŋūǹ kí yíiń-si ibeeyiin yii a nāaǹ anibul ŋin ní sii a-ba náańee? Ŋma di ŋūǹ kí yūĺ yii u làá mɔ̄tì binikpitib pu? 13Unimbɔti ubɔ kaa tí bí kii sii#12.13 Unimbɔti ubɔ kaa tí bí kii sii: dūú ŋmàntī nì Ditee 32.39. un di kpèé tikɔkɔ puee á lēē kí dàkà-u yii a sòoǹ tibɔti deedee. 14Ubɔti àá ubɔtikpaan ubɔ kaa bí ki ŋūǹ kí yīkì kí mɔ̄tì bin tafal a dáaĺee pu.
Unimbɔti kpòotī duulinya deedee ní
15A nín sá deedeedaanee puee, a kpòotī duulinya deedee mun ní. Á kpɔ̀ un kaa máaǹ bí dáaĺ u-tafalee bɔtee kaa còom̄ nì a-pɔŋŋu. 16Di sá yii a-pɔŋŋu di sá a-deedeeu nyeel, ní a nín sá tiwan kɔkɔ kpiliuee puee di yì-tì ní a dàkà tiwan kɔkɔ kulaŋŋaŋfitiiu. 17Bin kaa máká a-pɔŋkpaaŋŋu puee baba ní a dàkà a-pɔŋŋu, ní a dátí bin baasii nyí a-pɔŋŋu ní ki jáà nì see tafal. 18Ama sii un di ŋúb́ a-pɔŋŋuee, a sòoǹ tibɔti nì disaasɔl poon ní, ní ki kpòotī-ti soooo soooo poon. Ama a cáá mpɔn kí ŋá tin a lèe ŋyunti ŋun ní a yaa lèe.
Unimbɔti dàkà u-nibul
19A yaa bíi ŋáań mimmee, a là a-nibul ń bīfì kí béé yii deedeedaan máaǹ kí nīn sá binib bɔɔ ní. A dū dimákal ki gbéeǹ a-biyaamu, kun puee a tìì-bi mpɔn bí ŋmā kí kpántí bi-ba kí nyā bi-kpitiin. 20A-biyaamu nannanliibi máaǹ ŋkúm, ama a dáaĺ bi-tafal nì kimɔtii nì disaasɔl poon, di sá yii a nìn là kí tīī-bi ŋyuntimɔnti bí ŋmā kí fá bi-kpitii ní. 21Ama a kpēē a-biyaamu bɔti nyíki nyiki ní ki sòon̄ bi-bɔti. Sii nì bi-naanjab di nìn ŋá mpèé ní a pūtì ki pōoǹ-bi yii a làá ŋá tiŋan kɔkɔ nì ti-bulifi kí tīī-bi. 22Míǹ puee, á ŋmā kí dàkà-tee, a gbáà ti-nannanliibi disaasɔl poon, án nín làá ŋá pu ti yaa bíi sòoǹ ti-jutiibi bɔtee, tí nīn dàkafī a-laŋŋaŋfitiiku pu, ní kí nīn máká a-poommɔŋŋu pu ŋyunti ŋun a yaa bíi sòoǹ ti-bɔtee.
Bin jáaḿ tiwaŋkutee tafadaaldi
23An pu ní bin bin cōom̀ disaŋkikpitil bi-gbaandi poonee, a yāntì tiwambilindi tin bíǹ bi-ba nìn jáaḿee sāaǹ-bi. 24Di sá yii bi nìn dī diyìntil saŋyi ki wáŋkì fílamm. Bi nìn dū tiwaŋkuti tin kaa pée bí tiban ki cáá titantanee ki ŋá inimbɔti, ki yāntì bi mɔ́ntì-bi kii campɔntib bin kaa pée cáá nlandɔkɔee. 25Niinee, kii mbiyaamu mun kaa cáá nlandɔkɔee, a dū ditafadaaldi ki tɔ́ bi-pu kí bèel̀-bi. 26Ama bin kaa gbìl̄ mbiyaamu tafadaaldi gbanti taapuee làá dāá fōō Unimbɔti tafadaaldi tiŋman pu yal. 27Bi nìn gíti gīī nì tiwaŋkuti tin di nìn sàantí-bee, kun puee tin bi nìn cáa yíì inimbɔtee di nìn bíi dátí bi-tafal. Niinee ní bi nín wál̀ ki béè yii Unimbɔti un baa nìn là kí bééyee di lafun sá Unimbɔti tiŋman pu yɔu. An pu ní Unimbɔti ŋuul din pɔ̄ɔ̄yee jéetì bi-pu.
Currently Selected:
Sagesse 12: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.