Sagesse 1
1
Unil ń nīn ŋáań tin bí deedeeyee
1Nimbi bin di kpòotī kitiŋee, nín̄ néeḿmaan tin bí deedeeyee. Ní nīn cáá ti-Dindaan pu ilandɔkɔmɔnti, ní kí nyàab̀-u nì dipɔbil diba. 2Di sá yii u yàntī bin kaa cɔ́ŋkí-uee kāntí-u ní. U lèekī u-ba ki dàkà bin fòol̄-u ki kíikí kaa gùgufēe. 3Ilandɔkɔkpiti kàkatī unil ki wàatī Unimbɔti ní. Bigbaambi yaa cɔ́ŋkì-uee, u-pɔŋŋu kɔ̄ntí-bi icoo.
4Dipɔɔkpitil poonee, Iciin#1.4 Kpèè Alaŋ 1.20. kaa kóò. Iaa kàal̀ un ni ní ikpiti jíń dinyandee. 5Di sá yii circir Fam min dàkà binibee sáń inyimɔn ní, mì sáń ki wàatī igbàánlandɔkɔ. Mì ná un ŋáań tin kaa ŋān̄ee.
6Iciin sá ŋfam min di néeń binibee, ama iaa làá yàntī un sòoǹ ki bíiĺ Unimbɔtee fám kaa dáaĺ u-tafal. Di sá yii Unimbɔti wāĺ tin kā unil pɔbil poon poon kábuee, u nyí tin u dàkafēe kɔkɔ, ki gbìl̀ tin u sòoǹee kɔkɔ mun. 7Tiŋman, ti-Dindaan Fam gbí kitiŋ kɔkɔ. Míǹ di ŋúb́ duulinya kɔkɔ, an pu ní mì nyí dinyɔɔbundi din kamaa unil sòon̄ee. 8An puee un sòoǹ ntoonam bɔtee kaa bāal̀ u-ba pu, ní u kpá kí lóó ditafadaaldi din u máaǹee. 9Bi làá dāá nyàab̀ kí béé unikpiti landɔkɔi. Tin u sòoǹee làá bà ti-Dindaan cee, ní án dāá nīn sá u-tuŋkpitiŋ daaŋku. 10Unimbɔti tafal pílifí tikɔkɔ ní, ki kpáaǹ tin bi lɔ́kɔfí sooooyee kóò u-tafalin. 11An puee ní taa nín̄ lɔ́kɔfí an kaa cáá taapu. Ní ŋúb́maan ni-limbiliŋ kí taa kūŋfì ni-jutiibi boon, di sá dinyɔɔbundi din nyáń dibalinee cáá tipaal ní, ní un kúŋfí u-juti boonee bíi kù kinaŋ ní.
12Ní taa nín̄ cáá ni-maŋfal ki ŋáań ni nín là puee kí dáaĺ ŋkúm kí tɔ̄ ni-ba pu, ní taa dū ni-tuŋkpitiŋ kí nàan̄ ni-ba. 13An kaa sá Unimbɔti di ŋá ŋkúm, ní unifoo kúm kaa tìì-u mmɔn#1.13 Dūú ŋmàntī nì Eesee 18.23, 33.11.. 14Di sá yii u náań unil kamaa ú nīn bí ní. Tin kɔkɔ u yāntì an bí duulinyanee tìì dimaŋfal ní. Ndabiim min tìì ŋkúmee kaa bí tin u náańee poon. Ŋkúm kaa jíń kitiŋ pu dinyandi, 15di sá yii tin bí deedeeyee kaa kúù.
Binikpitib landɔkɔi
16Ama binikpitib cáá bi-tuuŋŋi nì bi-nyɔɔbuŋŋi ki yíì ŋkúm. Bi dàkafī yii ŋu sá bi-bɔɔ ní. Bi dū difaŋgiil ki nyàab̄-ŋu, ní bi nì ŋu ŋá mpèé#1.16 bi nì ŋu ŋá mpèé: dūú ŋmàntī nì Yees 28.25.. Tiŋman, an máaǹ-bi bí nīn bí ŋu-jandi pú.
Currently Selected:
Sagesse 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.