Esther (grec) F
F
Maardoosee damintiiku taapu
4 Maardoosee nìn lì yii: «Unimbɔti cee ní tibɔti nee kɔkɔ nyánní. 5 Di sá yii m téetí kudamintiiu kun m nìn dámintì tibɔti gbanti puee. Tiba kaa kíǹ kaa ŋá kii m nín nìn dámintì puee. 6 M ká kinyimbulwaai kiba dāa dūu kpántì dimɔɔl. Míǹ boonee ní m ká ŋwalifi nì ŋwìiń nì nnyim tikpil. Dimɔɔlee, Eesiteer un Ubɔti cáá u kpántì unimpubɔtee dee. 7 Tipeebilindi tilee, Amaani nì man dee. 8 Anibul sá binib bin kpáfì kinyɔkɔ kí kpɔ̀ Juuda yabee. 9 Bin kúuǹ ki yíiń Unimbɔti ní úǹ fīī-bee di sá Isirayeel m-nibul. Ti-Dindaan Unimbɔti fīī-ti ki nyántì inaabu in nìn dàn̄ ti-puee. Timbi bin di sá u-nibulee, u fīī-ti. U túń atuŋkpaan nì maamaaci tuuŋŋi ŋin baa láa pée ká atimbun ŋin kíǹee diba poonee. 10 U bɔ́ntì iwilimbu mili pu ní, diba pu sá ki tīī u-nibul ní din kíǹ sá ki tīī anibul ŋin kíǹee. 11 Iwilimbu ili gbantee ŋá ki nóó nì ŋwiin nì kukuluu nì ŋyunti ŋun Unimbɔti lēē kí sòoǹ anibul kɔkɔ bɔtee ní. 12 Unimbɔti nìn téetì u-nibul pu ki pɔ̀n̄ bin sá u-yabee. 13 An pu ní bi máaǹ kí dū iwiin ili kí jī jiŋaal Adaar ŋmaliu poon, an dàkà yii ŋwiin ŋubɔ kpá saalku nì saalku dal. Bi dāa kpáfí kí jī jiŋaal nì dipɔɔpiŋkpaandi. Unimbɔti nibul kansikinee, mmaabool kamaa làá nīn jīǹ jiŋaal gbanti kí nīn cáa cá jaanjaan.»
Tibɔjoolkaal
14 Pitooleemee nín kpántì ubɔti nì Kileewoopatri nín kpántì unimpubɔti nì Doositoosi nín yíiń u-ba yii u sá uleefiija nì usaraaŋal binnanaatiil poonee ní u-jipɔɔn Pitooleemee cáań kugbɔŋu nee. Kugbɔŋu gbanti nìn sòoǹ «Puuriim pu ní. Pitooleemee jipɔɔn Liismaaki un nìn kóò Jeerusaleemee di nìn nāatì-ku.
Currently Selected:
Esther (grec) F: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.