Siracide 9
9
Binimpoobi
(Kpèè 25.21-26, Dikà 5.12-15, Alaŋ 5.1-20, 6.24-35, 7.5-27)
1Taa ŋá ipoompoon a-nimpuu un a néeńee pu,
taa tīī-u nlandɔkɔ ú ŋá-si tin kaa ŋān̄ee.
2Taa dū a-ba kí líiǹ unimpu ubɔ,
di sá yii u ŋūǹ kí jī a-pu dinyandi.
3Taa sútí kí pìl̄ kinimpulaakpaai,
a ŋūǹ kí dāá kɔ́ u-laantin#9.3 Dūú ŋmàntī nì 42.12-14, Alaŋ 2.16..
4Taa yūĺ kí yúntí unimpu un sá ulaŋgaalee cee,
u ŋūǹ kí dāá ŋmàtiǹ-si á mɔ̀nnì-u.
5Taa dū a-nimbikpeeŋu kí báań usapɔɔn pu dímmm,
án nín làá ŋá pu bí taa sòoǹ kí kpɔ̀ u-bɔti kí kpáaǹ-see#9.5 Kpèè Disa 22.15-16, Ditee 22.28-29..
6Taa dū a-ba kí líí nì nnimpulaakpaamu,
án nín làá ŋá pu aa taa fá a-fakalee.
7Taa nín̄ làaǹ a-nimbikpeeŋu kitiŋ saŋkaŋkpiliŋ kɔkɔ pu,
kí taa nín̄ tú ki yìiǹ laakin binib kaa bée.
8Fàtī a-nimbiin kí taa kpèè.
Á taa dū a-nimbikpeeŋu kí báań
unimpunyaan un saa yèe pu#9.8 B. 5-8. kpèè Diny 34, Disa 22.15, Alaŋ 29.3, Maat 5.28..
Di sá yii unimpu nyaaŋku yāntì binib tikpil wáŋkì.
Kun puee, dineendi fòol̄ lìblib kii ŋŋmee ní.
9Taa pée kàl̄ kí kɔ́ĺ unimpu un mɔ́ǹee,
sii nì u ń taa kàl̄ kí nyɔ̀ ndaam kí jī jiŋaal.
Yaa sá fám, u ŋūǹ kí kɔ́-si á nīn kíǹ ki là-u,
dilal gbantee ń dāá yàntī á lítí kí wāŋkì.
Unil nín máaǹ kí nīn bí nì u-jutiibi puee
10Taa dū ubɔɔtikpiki kí fá,
di sá yii ubɔɔtipɔɔn kaa ŋūǹ kí fōō u-paaŋŋu.
Ubɔɔtipɔɔn sá kii ndapɔmee ní,
mì yaa yúntèe ní mì mɔ̄ dinyɔl.
11An yaa bútì ukpitiŋalee, án taa nín̄ cáá-si nnimbitaataam,
di sá yii saa nyí u-maŋfal nín làá kúntíǹ puee#9.11 Dūú ŋmàntī nì Ilan 37.1-2, 73.3-20..
12An yaa bútì bikpitiŋaliibee, á taa pàkà-bi,
téetí yii kí wàatī bí kpúee, asee bí fōō ditafadaaldi.
13Nín̄ bí ki dátiǹ unil un di cáá mpɔn kí kpɔ̀ u-nijutee,
mimmee aa làá nīn fàŋkí ŋkúm.
Ama a yaa sútì ki pìl̄-uee, á nīn nyí kí taa yìntī,
an yaa kaa sá míǹ u ŋūǹ kí lēē a-maŋfal.
Á béé yii titalindi kansikin ní a còom̄
ní ki tɔ́kɔ́ kitiŋ gundi pu ki yìiǹ.
14Pée ŋá a nín ŋūǹ puee kí nīn cá a-jutiibi cee,
ní kí nín fōoń biciŋfitiibi cee isaŋki.
15Nín̄ sòoǹ nì bin di cáá dinyilee,
tin kɔkɔ a yaa cáá kí sòoǹee
ń nīn tɔ́kɔ́ Yilpu fɔ́ŋŋŋ Marau pu#9.15 B. 14-15: dūú ŋmàntī nì 6.36, Toob 4.18..
16Yàntī sii nì deedeedambi ń nīn kpáfí ki jīǹ,
á nīn mɔ̀ɔǹ a nín fàŋkí ti-Dindaanee pu.
Biyidambi bɔti
17Iŋal pu tɔntɔnliibee, tin bi pàkèe
di sá tin bi mɔ́ɔ́yee,
ama uyidaanee, tin bi pàkèe
di sá iciin in u cáá ki sòoǹee.
18Kitiŋinee, binib fàŋkí ubɔcafil
ní ki ná kubɔcaau daan.
Currently Selected:
Siracide 9: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.