Siracide 8
8
Nín̄ nyí nì a-ba
1Á taa kpákáǹ upɔɔl,
yaa sá fám a ŋūǹ kí dāá kɔ́ u-ŋaan.
2Taa cùnnì ugaaja ibɔsoon,
yaa sá fám, aa làá nīn cáá nnyiŋfi ŋubɔ u-cee.
Di sá yii sindaariya yāntì binib tikpil lítì,
ki ŋéeb́ gba bibɔtiibi biba nyɔmmu.
3Sii nì kufuudaan ń taa kpáká,
taa kūtì idɔ u-ŋmiŋu pu.
4Taa jī kunifaŋu tinaacin,
yaa sá fám, u làá sìì kí kpáaǹ a-naanjab.
5Taa wòoǹ unil un béè u-kpitiiyee.
Á téetí yii ti-kansikin ubɔ kpá ki bí deedee.
6Á taa kpèè utikpil fám,
di sá yii ti-kansikin biba bíi púl̀ ní nee.
7Ubɔ kúm ń taa nīn mɔ̄ǹ-si.
Téetí yii ti-kɔkɔ làá pée kpú ní#8.7 Dūú ŋmàntī nì 14.17-18, Alaŋ 24.17..
8Taa nín̄ kpèé biciŋfitiibi dàkatam fám,
ama á nīn pée bífí alaŋkpan ŋin bi gèe.
Di sá yii ŋíǹ di làá dàkà-si ní á ká dinyil,
ní kí bīfì-si á nīn bí binikpaambi tundin.
9Taa dū bitikpilib dàkatam kí ŋá ŋkpaŋkpamboon.
Di sá yii bi mun bífì-tì bi-baabi cee ní.
Bi-cee ní a làá bīfì kí gbìl̄ tibɔti taapu,
ní ŋyunti ŋun an máaǹee, á nīn cáá tin a làá kííyee.
10Taa tūū ukpitiŋal kooŋŋi ŋŋmi,
yaa sá fám ŋu-ŋmifaam dāa ŋūǹ kí wà-si.
11Á taa jáǹ ulambidaan ní nīn bíi kpákà,
u dāa ŋūǹ kí yàntī á nīn bíi sòoǹ tibɔfan.
12Taa pìnnì unil un pɔ̄ɔǹ-see animbil.
Ama a yaa pīnnì udaanee,
á béé yii a fá a-nimbiliŋ dee.
13Taa yūĺ unil boon ú pìnnì animbil
ŋin jítì a-pɔŋŋu nyɔkɔmee.
A yaa ŋá míǹ, á bɔ́ntí kí dāá pà dipɔndi.
14Taa yíiń ubɔsoonli ibeeyiin.
Di sá yii bi làá sòoǹ kí pɔ̀-u,
kun puee úǹ tundi dee.
15Si nì naayeeku ń taa còom̀ nsan,
yaa sá fám, u làá kɔ́ǹ-si agìń tikpilin.
Di sá yii u làá nīn ŋáań u nín là puee,
ní kí dū u-waatiiku kí fìn̄-si kí cùnnì ŋkúmin.
16Taa já kujaau nì unil un ŋáań tipɔmbɔtee,
sii nì u ń taa táá kí cù kuteeun.
Di sá yii kí kpɔ̀ unilee kaa sá u-cee tiba,
u ŋūǹ kí kpɔ̀-si laakin ubɔ kpá kí fīī-see#8.16 Dūú ŋmàntī nì Alaŋ 22.24-25..
17Sii nì ugbaan ń taa sòoǹ kí bɔ́ntí tiba,
di sá yii waa làá ŋmā kí báĺ ni-bɔɔŋŋi.
18Taa ŋá tiba dibalin unicaan nimbiin,
di sá yii aa nyí udaan nín làá ŋá puee.
19Taa dū a-poon bɔti kɔkɔ kí māafì un ní a yaa pée kée.
Ubɔ kaa làá jāam̀-si.
Currently Selected:
Siracide 8: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.