Siracide 10
10
1Uyidaan un sá uciŋfitee dàkà u-nibul ní,
u-nyil di tìì-u mpɔn.
2Uyidaan nín bí puee,
míǹ ní u-kàliŋkpilib mun bí.
Unil un kpòotī kitiŋee nín bí puee,
míǹ ní binib bin u kpòotēe mun bí.
3Ubɔti un kaa nyí tibee nàantí u-nibul ní,
ama an bútí abɔtibil ŋin cáá dinyilee tiŋki ní#10.3 Kpèè 2 Bib 21.9-11..
4Duulinya gɔminau kā ti-Dindaan ŋaan ní#10.4 Dūú ŋmàntī nì Alaŋ 21.1, Dani 2.21, 1 Kroo 29.12, Room 13.1..
Ŋyunti yaa ŋmāntèe,
u lèekī ubɔti un máaǹee ní kí kàan̄.
5Án bútí unilee, an nyánní ti-Dindaan cee ní,
úǹ di tìì umarayóonli tinyool.
Dilambil nì tipɔmbɔti
6A-juti yaa yīntiǹ-see, á taa dū-u kí ŋá a-poon,
kí taa pée ŋá tiba tipɔmbɔti poon#10.6 Akoo 19.18..
7Ti-Dindaan nì biniyaŋyambi ná dilambil ní.
Ti-Dindaan nì binib ceeyee, inaamuul sá diyìntil ní.
8Tipɔmbɔti nì dilambil nì tigaajati
di yì-tì ní dibeel ń nyā dinibul diba ŋaan
kí kɔ́ din kíǹee ŋaan.
9Unil pée sá titan nì ŋfantam ní.
Kin ba pu ní u lámintí?
U nín bí dimaŋfalinee, tisuundi di kā ki gbí u-nayin.
10Ŋween ŋun pɔ̄ɔ̄yee bèel̄ unyɔɔdaan gba ní.
Unil un sá ubɔti díǹee,
foolee, u fu kpíì dee.
11Unil yaa gíti dáá kpíìyee,
kun kíǹ-uee di sá
ijiliŋkpaam nì ipeel nì akoosibil.
12Unil nín kífí pu kí kpántí ulambidaanee
di sá ú fàtī u-boon kí tīī ti-Dindaan,
ní kí súntí un náań-uee pu.
13Ikpiti di sá dilambil kíltam.
Un ŋáań ikpitee
tūǹ titumbilindi kɔkɔ nì ti-bulifi ní.
An pu ní ti-Dindaan yāntì bi-naabuŋu sá ŋkpaan
ní ki nāaǹ-bi kɔkɔ pílpil#10.13 Kpèè Diny 11.1-9, Disa 7-11, 2 Bib, 19.9b-37..
14Ti-Dindaan téé bibɔtiibi ki kpákatì bi-beejaliŋ pu
ní ki dū bin sīntiǹ bi-ba taapuee ki kāaǹ bi-paaŋŋu#10.14 Kpèè 1 Sami 2.4-8, Ilan 75.8, Luuki 1.51-53, dūú ŋmàntī nì Siira 11.6..
15Ti-Dindaan lēē bilambidambi
ki dū bin sīntiǹ bi-ba taapuee ki síiǹ bi-paaŋŋu.
16Ti-Dindaan nāaǹ anibul ŋin kíǹee timmu,
u nàn̄-mu dúsi dusi ki tin bàn̄ kitiŋ nyeel.
17U yāntì mu wáŋkì ki nāaǹ-mu,
ní ubɔ kaa ti téetí mu-pu dalba dalba.
18Ti-Dindaan kaa náań unil ú nīn sá ulambidaan.
Baa tí màal̀ ubɔ kí dū-u kí líiǹ diŋuul.
19Kunibuluu kulɔkɔ di máaǹ jilma ní?
An sá binib.
Kunibuluu kulɔkɔ di máaǹ jilma ní?
Bin fàŋkí ti-Dindaanee.
Kunibuluu kulɔkɔ di kaa máaǹ jilma ní?
An sá binib.
Kunibuluu kulɔkɔ di kaa máaǹ jilma ní?
Binib bin kaa tɔ́ marabee.
20Ubɔti nabiyaamu kansikin ní u kāntí tinyool.
Ama úǹ u-ba tìì bin fàŋkí ti-Dindaanee ní tinyool.
22Kun mɔ̄ǹ ugaaja nì unicaan nì usoodaanee
di sá bi nín fàŋkí ti-Dindaanee.
23An kaa kítì bí kpèè usoodaan un cáá iciinee fám,
ní kí nīn tìì unikpiti jilma#10.23 Dūú ŋmàntī nì Uciŋ 9.14-16..
24Bi tìì unikpaan nì ubɔsoonli
nì bikpootiliibi tinyool,
ama bi-kansikin báà ubɔ
kaa jítiǹ bin fàŋkí ti-Dindaanee.
25Uyumbu un sá uciŋfitee
làá dāá nīn cáá bin tɔ́ bi-bee u-tundin.
Binib bin cáá nlandɔkɔee
kaa làá dāá yāliŋkì.
Dibasintil nì ibaamɔn
26A yaa bíi tūǹ a-tundee, á taa nín̄ ŋáań kii a sá uciŋfitee,
kí taa nín̄ dàkà a-ba ŋyunti ŋun ní tiba páb́-see.
27An sɔ́ á tɔ̄ ditundi kí nīn cáá tiwan tikpil
ki jítiǹ á nīn gà a-bindi kaa cáá kí jī#10.27 Dūú ŋmàntī nì Alaŋ 12.9..
28M-jipɔɔn, tīī a-ba tinyool nì dibasintil poon,
kí taa pàkà a-ba kí lákatí mara pu.
29Ŋma kíikí kí pɔ̀ unil un ŋáań u-ba tikpitilee?
Ŋma di ŋūǹ kí pàkà un fá u-jilmau úǹ u-ba yìntitam puee?
30Bi ŋūǹ kí tīī usoodaan jilma u-nyil pu,
ama ní kí tīī ugaaja tinyool u-gaajati pu.
31Bi yaa tìì usoodaan tinyool,
kin u yaa kpántì ugaaja fáà!
Unil yaa sá ugaaja ní bi kpèé-u fámee,
kin u yaa kpántì usoodaan fáà!
Currently Selected:
Siracide 10: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.