Siracide 7
7
Isaŋki iba mun
1Taa ŋá tikpitil tiba,
ní tikpitil tiba mun kaa làá jī a-pu dinyandi.
2Sútí kí wàatī tin kaa bí deedeeyee,
ní tin kaa bí deedeeyee ń sāǹ kí wàatī-si.
3M-jipɔɔn, taa bɔ̄l̀ tin kaa bí deedeeyee daŋŋi pu,
an yaa kaa sá míǹ, a làá dāá cā
tin kaa bí deedeeyee miluli pu ní#7.3 Dūú ŋmàntī nì Yoob 4.8, Alaŋ 22.8, Gala 6.7-8..
4Taa nyàab̀ mpaampeekaa ti-Dindaan cee,
kí taa nyàab̀ tinyool paaŋŋu ubɔti cee.
5Taa dàkà yii a sá deedeedaan ti-Dindaan nimbiin,
kí taa dàkà yii a sá uciŋfiti ubɔti nimbiin#7.5 B. 4-5: dūú ŋmàntī nì Alaŋ 25.6-7..
6Taa nyàab̀ kí nīn sá ubɔsoonli
ŋyunti ŋun aa ŋūǹ kí kúntí inaamuulee.
Yaa sá fám, unikpaan ubɔ ŋūǹ kí yàntī á ŋá tin aa lèe,
ní á fá a-bulcinti#7.6 Dūú ŋmàntī nì Akoo 19.15..
7Á taa ŋá a-tiŋkin nib ikpiti,
yaa sá fám, a làá fá a-jilmau bi-kɔkɔ nimbiin.
8Taa ŋá ikpitibaanti mili pu,
dibabaja ŋmāntì á jī dibɔkpil.
9Taa lì yii: «Yilpu fɔ́ŋŋŋ Nimbɔtiu
làá kpèè m-saraabi nín wīikí puee.
M yaa dū-bi ki tīī, u làá kíí kí fōō.»
10Taa nín̄ mèé ki gùgufī,
kí taa súntí kí pɔ̄ biwɔfib tiwan.
11Á taa lā unil un bíi jīǹ falaayee.
Di sá yii Unimbɔti un sīntiǹ-u taapuee
ŋūǹ kí fàtīí yòon̄-u yilpu#7.11 Dūú ŋmàntī nì Ilan 75.8, Alaŋ 17.15..
12Taa mɔ̄ntì kí túń a-nabiki pu,
àá a-bɔɔ pu.
13Á nīn nyí nì a-ba kí taa pée mɔ̄ntì nnyimɔn,
kí nīn nìkì kí mɔ́ntí inyimɔnee kaa tìì tiwammɔntiil tiba.
14 Bitindaŋkpilib yaa kpáfèe, á taa nín̄ sòoǹ fám fám,
kí taa nín̄ sòoǹ ki bùsī
anyɔɔbumbaanti a-wimmeem poon#7.14 Dūú ŋmàntī nì Maat 6.7..
15Taa nín̄ ná ditundi din pɔ̄ɔ̄yee,
àá asaatuun ŋin Yilpu Fɔ́ŋŋŋ Nimbɔtiu náańee.
16Taa kūtì bikpitiŋaliibi pu.
Téetí yii Unimbɔti ŋuul kaa làá tàan̄.
17Sìntīǹ a-ba taapu taapu,
kun puee unikpiti tafadaaldi
di sá ŋŋmi nì akoosibil.
Kubɔɔtiiu nì kunabitiiu bɔti
18Animbil puee, á taa nyāfì a-bɔɔ,
kí taa dū a-nabiki tiŋman pu yɔu kí kpántí
Oofiiri tiŋki sindaariyau.
19A yaa ká unimpuciŋfiti nì umɔntee,
á taa gùgufì kí cáá-u.
Di sá yii u-nyaaŋku ŋān̄ ki jítiǹ sindaariya.
20Taa sàaǹ uyumbu un tūǹ ditundi tiŋanee,
àá utɔntɔnli un tūǹ ditundi nì dipɔbil dibee.
21A yaa cáá utɔntɔnli un cáá dinyilee,
á nīn néeń-u kii sii a-bee.
Á taa yíí kí tīī-u dibatɔl.
22A yaa cáá tiwaŋkutee, á nīn kpèé-tì tiŋan.
A yaa páatì ti-puee, nín̄ gbíntìi ŋúb́-tì.
23A yaa cáá mbiyaamuee, á dàkà-mu.
Mu-biyatinee, á dàkà-mu mú nīn tɔ́ mara.
24A yaa cáá mbinimpubiyaamuee,
kpèè-mu mú taa bīil̀,
taa pɔ̄-mu nnimbiin.
25A yaa pú a-bisal ticatee,
a túń dituŋkpaandi dee,
ama á dū-u kí tīī uninja un cáá dinyilee.
26Unimpu un fáatì a-pɔbil a cááyee, á taa jà-u.
Ama á taa nín̄ máká unimpu un aa néeńee pu.
27Á nīn tɔ́ a-baa nì a-pɔbil kɔkɔ,
kí taa súntí a-na falaabi pu#7.27 Dūú ŋmàntī nì Disa 20.12..
28Á téetí yii bíǹ di màl̄-si.
Ba ní a ŋūǹ kí ŋá kí tīī-bi
tin bi ŋá ki tīī-see pu?
Tin sá á ŋá kí tīī bisaraaŋaliibee
29Nín̄ jáaḿ ti-Dindaan nì a-pɔbil kɔkɔ,
ní kí nīn tɔ́ u-saraaŋaliibi.
30Nín̄ néeń un di náań-see nì a-pɔbil kɔkɔ#7.30 Dūú ŋmàntī nì Ditee 6.5.,
kí taa fàtī a-boon kí tīī bin bí u-tundinee.
31Nín̄ fàŋkí ti-Dindaan
ní kí nīn tɔ́ bisaraaŋaliibi.
Tīī-bi tin kɔkɔ bi tīī-si mara á tīī-bee:
tijincɔ̀fikaal, nì ikpiti pɔ̄tam saraau#7.31 tijincɔ̀fikaal, nì ikpiti pɔ̄tam saraau: kpèè Dikà 18.8-13. - booku : Ditee 18.3.,
nì tiwaŋkuti tin a kūū ki ŋá saraayee booku,
nì bi yaa dū ubɔ àá tiba ki sú ti-Dindaanee saraau,
nì tiwampeekaal tin bi cāabìń kí dūú sú Unimbɔtee.
Tin sá á ŋá kí tīī biwɔfibee
32Pɔ̄ biwɔfib nì tiniti
ní a-biindi ń nīn sá dimɔndi#7.32 Dūú ŋmàntī nì Alaŋ 19.17..
33Nín̄ pūǹ binifoobi kɔkɔ nì dipɔbil diba,
kí taa yíí kí ŋá bin kpíìyee tiŋan.
34Taa fàtī a-boon kí tīī bin bíi sūǹee,
kūtì bin bíi yáliŋkée pu ní yāliŋkì#7.34 Dūú ŋmàntī nì Room 12.15..
35Taa gùgufì kí cùú màntī bibunliibi pu.
A yaa ŋáań mimmee, binib làá nīn néeń-si ní#7.35 Kpèè Maat 25.35-36..
36Kun kamaa ní a yaa ŋáańee,
á taa súntí a-maŋfal wiiŋyi kúntitam pu.
Mimmee a pée kpá kí ŋá ikpiti.
Currently Selected:
Siracide 7: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.