Siracide 6
6
1Taa kpántí a-bɔɔ nannanliu,
di sá yii diyimbiildi cāabìń icoo nì disiibil ní.
Míǹ ní an sá ki tīī biibiidaan.
2Taa yàntī a-kpɔkɔsib ń kpáaǹ-si,
yaa sá fám a-pɔŋŋu làá yàaǹ kii unajee ní.
3A làá dāá ŋmɔ́ a-faati,
a-subiliŋ ń dāá gbátí
ní kí dāá kíń busukulimbu.
4Kukpɔkɔsikpiiu nàantí un cáá-kùee ní,
di-puee, u-nannanliibi làá nīn bèel̄-u ní.
Kubɔɔtimɔntiiu nì kubɔɔtikpiiu
(Kpèè 12.8-18, 37.1-6, Alaŋ 17.17)
5Dinyɔɔbummɔɔndi bùtī bibɔɔtiibi ní,
kinyɔɔmɔɔi yàntī bí kíí-si kinyɔɔmɔɔi ní#6.5 Dūú ŋmàntī nì Alaŋ 16.21..
6A ŋūǹ kí nīn nyí binib tikpil,
ama binib kutuku poonee,
unibaanti ń nīn sá a-saŋkiliu.
7A yaa làá píí unil kubɔɔtiiuee,
á cɔ̄ŋkì-u kí wàatī.
Á taa jìkì kí dū a-mákal kí páań u-pu.
8Unil ubɔ bée, tiba pu ní u sá a-bɔɔ,
ama a yaa kɔ́ dinimbinaamandinee, waa ti nyí-si.
9Ubɔɔti ubɔ bí ki ŋūǹ kí kpántí a-nannanliu,
kí dū sii nì u-jaaku kí māafì kí kɔ́ǹ-si icoo.
10Ubɔɔti ubɔ bí sii nì u jīǹ disambibaantiilin,
ama a yaa kɔ́ dinimbinaamandinee, waa ti nyí-si.
11An yaa bútì-see, u làá nīn bí kii sisi a-bee ní,
u làá nīn tìì a-tɔntɔnliibi marab nì dimákal.
12Ama a yaa kɔ́ dinimbinaamandinee,
u làá nīn kíǹ ki jáà nì si, ní aa ti làá wāl̀-u#6.12 Dūú ŋmàntī nì 12.9, Alaŋ 14.20, 19.4,6-7..
13Nín̄ dátiǹ a-nannanliibi,
nín̄ nyí nì a-ba nì a-bɔɔbi.
14Ubɔɔtimɔnti sá kibalilaŋ tiŋman pu ní,
un di yaa ŋúń ki ká-uee ká tigaajati ní.
15Ubɔɔtimɔnti pɔ̄ɔ̄ kudaau ní,
u-daaku kaa cáá bí dūú ŋmàntī.
16Ubɔɔtimɔnti sá nnyɔkɔ ŋun tìì dimaŋfalee ní.
Bin fàŋkí ti-Dindaanee di kāntí-u.
17Unil un fàŋkí ti-Dindaanee
nyí bi nín píikí kubɔɔtiiu puee ní.
Di sá yii u nín bí puee,
míǹ ní u-bɔɔ mun bí.
18M-jipɔɔn, nín̄ néeń bí dàkà-si a-naacimpɔntin.
A-yikpiti dāa píiĺee a ká Iciin.
19Sútí kí pìl̄ Iciin kí cīití nì kimɔtii,
i-subimɔntiŋi bí kii ukpaal nì uwambɔlilee ní.
Di sá yii a làá gīī digìńdi ŋwaam ní kí kpɔ̀-i,
ama án kaa làá yúntí ní á jī tin i làá lòoǹee#6.19 Dūú ŋmàntī nì Yaku 5.7-8..
20Iciin bɔti pɔ̄ɔ̄ ki tīī bigbaambi,
bin lóò dinyilee kaa ŋūǹ kí nīn bí i-cee.
21I bí kii ditaŋkpal din unil dúkutí
kí dàkà u-pɔŋŋuee,
ama baa làá sūŋkì ní kí dūú fá.
22Di sá yii Iciin yindi baasii máaǹ-i ní,
binib bin wāĺ-iee pée sá fiii yéè ní.
23M-jipɔɔn, pīlifì kí fōō tin m dàkafēe,
taa fá m-saŋkii.
24Dū Iciin kusakai kí bóob́ a-taaŋi,
kí dū i-kpancikiliu kí léeń a-neen#6.24 Dūú ŋmàntī nì 51.26, Maat 11.29..
25Dū a-boon kí tīī kí túń i-waŋgul,
jī kimɔtii kí léeń i-kpancikiliu.
26Sútí kí pìl̄-i nì a-pɔbil kɔkɔ,
nóó i-saŋyi nì a-pɔŋŋu kɔkɔ.
27Dī i-boon kí nyàab̀-i,
i làá yàntī á béé-i.
A yaa cúú-iee, á taa ti gíiǹ-i kí líí.
28Di sá yii án dāa kúntée,
a làá dāá ká i-cee diŋuŋfil,
ní a-gìŋ́ŋi ń dāá kpántí mmɔn.
29Niinee i-kusakai làá nīn sá a-cee
kii diwundi din pɔ̄ɔ̄yee,
ní kpancikil un lá a-neenee
ń kpántí tiléeŋkaal tin cáá kudapɔɔuee.
30I-kpancikiliu làá nīn sá-si sindaariya léeŋkaati
ní i-kusakai ń nīn sá-si dambalanyaan uman.
31A làá dāá dū-i kí pèen̄ kii dijiŋaabɔkutilee,
ní á dāá cíkiń-i kii ifaal beefuuliikee.
32M-jipɔɔn, a yaa là, a làá bīfì kí nīn nyí,
a yaa pɔ́ɔǹ, a làá cíkití.
33A yaa néeń ki pílifí tibɔtee, a làá bīfì kí cíkití,
a yaa kpòontí a-tafalee, a làá kpántí uciŋfiti.
34Nín̄ néeń ki kàal̀ bijaŋkpilib kansikin,
dū a-ba kí nákáǹ iciin in bi dàkèe.
35Nín̄ néeń ki pílifí tibɔti tin kɔkɔ nyánní Unimbɔti ceeyee,
taa yàntī iciin laŋkpandi diba ń ŋmátí kí nyā a-ŋaan.
36A yaa ká unyilee,
á péé kutaafaau pɔ̀lpɔl kí cù u-cee,
a-taaŋi ń nīn tà ki kùbitī u-diiku nyɔkɔpu.
37Nín̄ dàkafī ti-Dindaan marab pu,
kí ŋá tin u-bɔkpaaŋi bí yii á ŋée tiŋan.
U làá tīī-si mpɔn
ní kí tīī-si iciin in ní a lèe#6.37 Dūú ŋmàntī nì Joos 1.8, Ilan 1.2..
Currently Selected:
Siracide 6: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.