Siracide 43
43
Kutagbɔŋu nì ŋwìiń
1Kpèèmaan kutagbɔŋu kun dàn̄ yilpu nee
nín ŋān̄ ki wāĺ kílkil puee#43.1 Dūú ŋmàntī nì Ilan 104.1-2.!
Kpèè u-nyaaŋku nín mɔ̄ nnimbikpee puee!
2Ŋwìiń yaa gbīitìń kí nyēe,
ŋu sòoǹ Yilpu fɔ́ŋŋŋ Nimbɔtiu tuuŋŋi nín mɔ̄ dikpeel puee ní.
3Kuwiŋkaŋu puee ŋu yàntī kitiŋ ń kpā ní.
Ŋma di ŋūǹ kí yūĺ ŋu-tuntuŋku poon?
4Ucaa pàá u-ŋmiŋu kí tɔ̄ u-tundi ní.
Ama ŋwìiń ŋun gbáà ajoonee
tùm̀ ki jítiǹ míǹ ŋfunyɔm mita pu ní.
Ŋu tūǹní ŋu-tuntuŋku
ki tòoń ŋu-wintaabiliŋ,
ki yàntī unil kaa ti wāĺ.
5Ti-Dindaan un di náań-ŋuee sá ukpaaneeee!
U kpòotī-ŋu ní ŋu còom̄ ŋu-saŋkindi#43.5 B. 2-5: dūú ŋmàntī nì Ilan 19.5-7..
Uŋmal
(B. 6-7. kpèè Diny 1.14, 8.22, Ilan 104.19)
6Uŋmal mun kuluku yaa pée gbáńee, see ú nyā.
U dàkà iyunti ní ki sá kudaaŋŋu kí nīn cá jaanjaan.
7Uŋmal di dàkà jiŋaal yuntiŋu,
úǹ un bàtī fiii fiii áli kí dāá wāŋkì kɔkɔee.
8Úǹ pu ní bi dì kí pɔ̄ uŋmal kamaa diyindi.
Ŋu yaa fātìi nyáń ki bíi gbìfintée,
an cáá kunyaaŋŋu ní!
Úǹ di sá iŋmalbi kitil in bí yilpu
ki ŋmíntée walifiŋu.
Iŋmalbijaa
(Kpèè Yees 46.26, Yoob 25.2-3, Baru 3.34-35)
9Iŋmalbijaa walifiŋu di yì kutagbɔŋu nyaaŋku,
i-walfiŋu di nyɔ̀kɔntī yilpu ti-Dindaan cee.
10Ti-Dindaan un bí circiree yaa tīī maree,
i cá ní kí yūĺ laakin u síiǹ-iee.
Ubɔ kaa féeń mpaan ŋun u yúee.
Dikuntinyindi
(B. 11-12. kpèè Diny 9.12-17, Eesee 1.28. B. 13-33. kpèè Yoob 36.27–37.24, 38.22-38)
11Kpèè dikuntinyindi ní kí jāam̀ un di náań-dèe.
Dì yaa nyáń ki làl̄, dì cáá kunyaaŋŋu an kaa cáá bí lì.
12Dì lùtī kulaguŋu kun cáá tinyoolee kutagbɔŋu pu.
Un píĺ butɔbu gbantee di sá Yilpu Fɔ́ŋŋŋ Nimbɔtiu.
13Ti-Dindaan tìì mara ní ntaayim nyēeń kutaa pu ki lítí,
u tūǹ itaaŋmɔŋmɔ ní i cá ki ŋáań tin u lēe.
14Míǹ ní u pìitī laakin u kpáafì atagbanee
ní ŋíǹ ń nyā ki ŋàaǹ kii inoonee.
15Ti-Dindaan pɔŋŋu yàntī atagban ń pɔ̄ɔkì,
ní kí cúú wìil̀ wìil̀ kí kpántí ataanyiŋkumbil.
16 U-taadundi yàntī kitiŋ cìŋkī.
17 Ti-Dindaan yaa páaǹnée, ajoon cìŋkī ní.
U yaa lèe ní ú yàntī ŋgiil pú buŋku,
18 àá ŋgan pú buŋkpaaŋku àá kunaakpaabuŋŋu ń jītí#43.17b B. 16-17: dūú ŋmàntī nì Disa 19.18, Ilan 29.3,7-8..
Kii unoon nín ŋàaǹ ki sìntīń puee,
míǹ ní u yàntī ntaayim lítí.
Mì lítiń kii inaakitoon nín kpákatiń kitiŋ pu puee ní#43.17b Dūú ŋmàntī nì Ilan 147.16a..
19 Mì nín pīiǹ puee nyaaŋku mɔ̄ nnimbikpee,
ní mì yaa bíi lítée, an mɔ́ɔkíǹ unil pɔbil.
20 Unimbɔti dù ntaanyiŋkumbilimu ní
kí yàaǹ kitiŋ pu kii ŋyaamee,
ní nsɔnsɔm ń yàntī mú kpántí kii ŋkuŋkumbiyaamuee#43.19 Dūú ŋmàntī nì Ilan 147.16b..
21 Ŋgan pú buŋku kun sɔ̀m̀ee yaa bíi jītée
ní nnyim ń dūú jìlifì kí pɔ̄ɔkì.
Kubuŋu gbanti jītí nnyimee nín dɔ̄ puee
ní nnyimee yilpu ń dūú kìl̄ kí pɔ̄ɔkì kii digbampɔɔlee.
22 Ku wù ajoon, ki wù kuteeu
ní ki wù kumɔsɔŋu kii ŋŋmee.
23 Ama atagban sɔŋfiŋu di cāabìń nnyɔkɔ malaa,
ní kutuntuŋkpaaŋŋu boonee, dimalindi ń cáań dipɔɔsɔŋkil.
24 Unimbɔti nín là puee di sá u cúú tiŋku pɔŋŋu,
ní ki cóoǹ u-ni ntimu mun nnyim māntìi túee#43.23 Dūú ŋmàntī nì Ilan 104.6-9..
25 Bin kóò meelab ki còom̄ tiŋku puee
máafí dinimbinaamandi din bí u-puee.
Tibɔti tin bi máafée ŋáań-ti bitii#43.24 Dūú ŋmàntī nì Ilan 107.23-32..
26 Tiŋkun ní a kāntí maamaaci nì atulim wanti,
nì tiwan tin pée cáá kufoouee kɔkɔ nì ti-bulifi,
nì tiwambilindi tin kóò nnyiminee kɔkɔ#43.25 Dūú ŋmàntī nì Ilan 104.25-26..
27 Unimbɔti pu ní tin kɔkɔ u tūnnèe bà ti-laŋki,
tikɔkɔ bɔ́ntí ki nóó nì u-nyɔɔbundi#43.26 Dūú ŋmàntī nì 39.18, Kool 1.17..
28 Ti bàà ŋūǹ kí nīn nìkì ki sòoǹ ki cá,
ama taa làá ŋmā kí sòoǹ kí dóó tikɔkɔ.
Tin ti làá dūú kúntí ti-bɔtee di sá yii
tikɔkɔwoooo nyánní ti-Dindaan cee ní.
29 La ní unil nín kāntí mpɔn kí nyɔ̄ŋkì-u?
Di sá yii úǹ di sá Ukpaan, u jítiǹ tin kɔkɔ u náańee.
30 Ti-Dindaan sá kuwambiiu ní ki sá ukpaan ki jítiǹ tikɔkɔ.
U-pɔŋŋu sá maamaaci pɔŋŋu ní.
31 Ni yaa làá nyɔ̄ŋkì ti-Dindaanee,
ní sòoǹ u-kpaanti pu kii ni nín ŋūǹ puee.
Ama u làá nīn sá ukpaan ki jítiǹ min ni làá lèe.
Ní dū ni-pɔŋŋu kɔkɔ kí gāā ilan
kí yòon̄ u-yindi yilpu.
Ní taa gīī, di sá yii ni pée kpá kí nyɔ̄ŋkì-u kí dóó.
32 Ŋma di ká Unimbɔti kí ŋmā kí lì u nín bí puee?
Ŋma di ŋūǹ kí nyɔ̄ŋkì-u kii án nín máaǹ puee#43.31 B. 28-31: dūú ŋmàntī nì Ilan 145.3, Iciin 13.3.?
33 U-tuŋkpaaŋŋi tikpil gíti bí ki jítiǹ ŋin bí nee,
di sá yii u-tuuŋŋi ŋwaam pu ní ti wāĺ nee#43.32 Dūú ŋmàntī nì Yoob 26.14..
34 Ti-Dindaan di náań tikɔkɔ,
ní ki dū iciin ki tīī bin yú nì u deedeeyee.
Currently Selected:
Siracide 43: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.