Siracide 42
42
1Icoo ń nīn cáá-si yii
a tùkū mbɔmbɔtuku
ki bīitì a-nabiki bɔɔŋŋi pu.
Niin ní a làá béé kun di sá icoo tiŋman pu yayee,
ní báà ŋma ń tīī-si mmɔ́ɔn.
Tibɔti tin kaa máaǹ kí nīn cáá-si icooyee
Taa nín̄ cáá tin m làá sòoǹ nì si nee pu icoo,
kí taa ká nnaakpal kí ŋá ikpiti.
2Án taa nín̄ cáá-si icoo á nīn tɔ́
Yilpu fɔ́ŋŋŋ Nimbɔtiu Marau nì u-Poondi,
àá kí pɔ̀ unikpiti u-bɔti yaa ŋān̄.
3Án taa nín̄ cáá-si icoo á gbá a-bɔɔ
àá si nì un bí ki còom̄ nsanee akɔntaa,
àá kí yàkatī a-fakal kí tīī bin kíǹee.
4Án taa nín̄ cáá-si icoo á nīn cáá
saniya nì tikúŋmantikaal tin bí deedeeyee,
àá kí ká ipaati fiii àá tikpil,
5àá á nyāfì tiwan kí ká ipaati.
Án taa nín̄ cáá-si icoo á nīn dátí a-biyaamu tafal múlmul,
àá kí lùfì utɔntɔŋkpiti kiŋkinti mbambaan áli fatiku ń tin nyā.
6A yaa cáá unimpu un là kí nīn wāĺ tikɔkɔee,
an ŋān̄ yii á nīn pìintí a-wanti pu.
A yaa cáá binib tikpil bin pu aa mákée,
an ŋān̄ yii á nīn pìintí ki kpàl̀ a-wanti pu.
7A yaa làá síiń unil cee animbilee,
á kàaǹ-ŋi ní kí ŋmàntī-ŋi.
Á ŋmà tin kamaa a tììyee
nì tin bi tìì-see ki sīintí.
8Án taa nín̄ cáá-si icoo á kpòotī ujɔti nì ugbaan
àá utikpil un ŋá tilaakpaal bi cúú-uee.
Án di làá dàkà yii a lafun fōō didàkamɔntiil,
ní báà ŋma làá tīī-si mmɔ́ɔn.
Ubaati landɔkɔi in u cáá u-bisal puee
9Usapɔɔn tìì u-baa ilandɔkɔ tikpil,
báà u yaa kaa nyí míǹ.
U nín dàkafī u-bisal pu miŋyee kaa yàntī u gèeǹ.
Di sá yii u-bisal yaa láá pɔ̀ɔǹee,
u dàkafī yii án taa ŋée
ú wíiǹ kí càatī dicamɔndi pu.
U yaa tí mɔ́ǹ muee,
ní u fàŋkí yii án taa ŋée
u-cal ń taa ti nín̄ là-u.
10U yaa kaa láá béè uninjee,
ní u-baa fàŋkí yii uninja ubɔ ń taa ŋá kí dòon̄ nì u mpɔn
ú nīn kā úǹ u-ba cindin kí cáá dipool.
U yaa mɔ́ǹ, u ŋūǹ kí taa yūĺ nì u-cal deedee.
U yaa tí gbíntì ki kā u-dumpu,
an ŋūǹ yii ú kpántí uŋmaŋŋmanti.
11A-bisal yaa kaa ŋūǹ kí cúú u-bee,
á mɔ̀tīí nīn cɔ́ŋkí-u tiŋan.
An yaa sá fám u làá yàntī a-nannanliibi ń lā-si.
Kitiŋin nib làá nīn sòoǹ an pu
ní samaa yaa kóoǹ ki kpáfì laakiŋyee, tíǹ ní bi làá nīn sòoǹ.
Niinee ní ú kɔ́ǹ-si icoon dikpafikpaandi poon.
12Taa dū a-nimbikpeeŋu kí báań báà unil nyaaŋku pu,
kí taa nín̄ kàal̀ binimpoobi kansikin.
13Tiwampeeŋkaal poon ní mpɔkɔfimu nyēē,
míǹ ní ntoom mun nyēē unimpun.
14Uninja toom sɔ́ǹ unimpu ŋanti.
Unimpu di kɔ̄ntí u-cal icoo kí yàntī binib ń kpèè kí sɔ́kɔ́-u.
DIDÀKAL BƆTI DIJAŊŊMOOŊMOOTIIL
Unáanli kpaanti
(Kpèè 16.18, Ilan 148.1-3, Iciin 9.1)
15Kɔŋkɔnnee m làá téetí tin ti-Dindaan ŋée kɔkɔ pu,
m làá māafì tin m kée.
Ti-Dindaan sòon̄ anyɔɔbun ní ki ŋá tikɔkɔ.
Tin kɔkɔ u náańee ŋáań u nín là puee ní.
16Ŋwìiń ŋun ŋmíntí nee kpèé tikɔkɔ ní,
ti-Dindaan nyooti gbí tin kɔkɔ u ŋée poon ní.
17Ki kpáaǹ ti-Dindaan circir tuuŋyi
kaa ŋūǹ kí māafì maamaaci tuuŋŋi kɔkɔ,
ŋin ní ti-Dindaan Mpɔŋkɔdaan ŋá ki síiǹ,
duulinya ń mɔ̀tīí báań inyaan u-nimbiin
kí nīn cáá tinyoolee.
18U kpèé tiŋku nì unil pɔbil poon
ki wāĺ tin kɔkɔ bál̀ poonee.
Di sá yii Yilpu Fɔ́ŋŋŋ Nimbɔtiu nyí tikɔkɔ,
ní ki kpèé ki kpáaǹ iyunti daanti kɔkɔ.
19Úǹ di sòoǹ tin jítèe nì tin bí ki dòońee,
ní ki lèekī tiwan tin bál̀ee taapu ki dàkà#42.19 Dūú ŋmàntī nì Iciin 8.8..
20Nlandɔkɔ báà ŋubɔ kaa bí yii waa nyí-ŋu
dinyɔɔbundi diba kpá ki bál̀ u-cee#42.20 Dūú ŋmàntī nì Ilan 139.1-4, Iciin 1.8-9..
21Atuŋkpaan ŋin ti-Dindaan bɔ́ntì u-ciiŋyi poonee,
ŋáań ki dī u nín bɔ́ntì puee ní.
U pée sá ubaanti ní ki yōoǹ talku kí nīn cá talku.
U-tuuŋŋi kɔkɔ poonee,
tiba kaa bí bí gbéeǹ àá bí bàtī
ní waa nyàab̀ ubɔ ń sāŋkì-u.
22Tin kɔkɔ ti-Dindaan ŋée mɔ̄ dikpeel,
ki kpáaǹ kiŋmiyatiyaalii kin ní unil ŋūǹ kí wāl̀ee.
23Tíǹ kɔkɔ nee bí kí nīn cá jaanjaan ní,
ki cí kí ŋá tin an yaa bàlifī tí ŋée.
24Tin kɔkɔ ní Unimbɔti náańee nóó tɔb tili tili ní,
ní waa pée náań tiba tíǹ kaa ŋān̄#42.24 Dūú ŋmàntī nì 33.14-15, Uciŋ 3.1-8..
25Tiwan kɔkɔ dàkà tin kíǹee dapɔɔku ní.
Ŋma di ŋūǹ kí lì yii u kpēē ti-Dindaan nyooti ki gīī?
Currently Selected:
Siracide 42: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.