Siracide 44
44
NLAN ŊUN BI GĀĀ KÍ TĪĪ ISIRAYEEL YAB NAANJAB TINYOOLEE
1Kɔŋkɔnnee tí nyɔ̄ŋkìmaan binib bin nìn nyáń diyindee,
ti-naanjab kí nóó nì bi nín dī dī tɔb pu ki kāl̀ kitiŋ puee.
2Ti-Dindaan dàkā u-kpaanti
ki tīī-bi tinyookpaandi doooo cannaaku.
Binikpaambi bin kāl̀ kitiŋ puee
3Bibɔtiibi nìn nyáń ki kpōotì bi-beeŋi,
ki dàkā bi-pɔŋŋu binib béè bi-pu.
Bisaŋkiliibi mun nìn nyáń ki cáá dinyil
ní Unimbɔti bɔnaatiliibi mun nìn bí.
4Biba nìn sá bikpilib ki sáŋkí dinibul,
ní biba mun nìn sá abɔtibil ki nìn cáá dinyil tikpil.
Bi nìn cáá iciin nyɔɔbuŋŋi ki dàkà dinibul.
5Biba nìn sá bin nāantí ilan
ní ki ŋmà tibɔti bi cáa gà ilanee.
6Biba nìn sá bigaajab, ki nìn cáá mpɔn
ní ki nìn bí ŋgbansɔŋfin bi-dumpui.
7Binib gbanti kɔkɔee
yuntiŋu yab nìn tīī-bi tinyool,
ní ki nìn yōoǹ bi-yindi yilpu
ŋyunti ŋun bi nìn bí dimaŋfalinee.
8Bi dáá gbíntìi téetí bi-kansikin biba yiŋŋi pu,
ki gà ilan ki nyɔ́ŋkí-bi.
9Bi-kansikin biba mun bí baa ti pée téetí bi-pu.
Baa ti gbìl̀ bi-pu, a lì kii baa nìn pée kāl̀ kitiŋ pu ki kée,
a lì kii binib bin baa màl̄ ki kée.
Míǹ ní an sá ki tīī bi-biyaamu mun páaǹ bi-boonee.
Isirayeel yab naanjab
10Ama binib nee di sá bin nìn ŋá tiŋanee,
binib bin tunnyaaŋŋi pu baa súntèe.
11Bi dū bi-tunnyaaŋŋi ki tīī bi-biyaamu,
ní bi-biyaamu biyaamu fōō bi-fakal.
12Bi-biyaamu yúl̀ nì dipoondi deedee,
bi-pu ní bi-naantiibi gbíntìi bí nee.
13Bi-naantiibi làá nīn bí kí nīn cá jaanjaan,
bi-nyooti kpá kí wāŋkì dalba dalba.
14Bi síb́ bi-wunti ŋgbansɔŋfin,
ní bi-yindi bí kí nīn cá abin abin.
15Atimbun làá dāá māafì bi-ciiŋyi bɔti,
ní samaa ń dāá nīn gà ilan ki nyɔ́ŋkí-bi.
Eenɔki
16Eenɔki bɔti nìn fáatiǹ ti-Dindaan
ní úǹ nìn yōoǹ-u ki cūnnì u-cee.
Kí nīn cá abin abinee, u tīī dibakpántil ŋabikau#44.16 Eenɔki: kpèè 49.14, Diny 5.24, Eebru 11.15..
Noowa
17Noowa nìn sá deedeedaan tiŋman pu yɔu ní.
Unimbɔti ŋuul yuntiŋuee, úǹ di nìn fōō inibool kɔkɔ yil.
U-pu ní nnyiŋgbeen boonee, binib dáá gbíntìi bí kitiŋ pu.
18Unimbɔti nìn pōoǹ-u dipoondi din làá nīn bí ki cée,
yii waa làá ti yàntī nnyiŋgbeen ń kúntí tin cáá kufoouee#44.18 B. 17-18: dūú ŋmàntī nì Diny 6.8-14, 9.1-17, Iciin 10.4, 14.6..
Abraam
19Abraam di nìn sá atimbun kupaau naanja.
Báà uniseen kaa ká tinyool ki bàn̄-u dalba dalba#44.19 Dūú ŋmàntī nì Diny 17.4-6, Room 4.1-25..
20U nìn tɔ́ Yilpu Fɔ́ŋŋŋ Nimbɔtiu Marau,
ní u nì u nìn ŋá mpèé.
U nìn dū mpèé gbanti daaŋku ki ŋá u-wunti pu,
ki gíí-u dikpancandi.
Unimbɔti nìn mākaǹ-u ki ká yii u sá deedeedaan#44.20 Dūú ŋmàntī nì Diny 17.9-14, 22.1-18..
21An pu ní Unimbɔti nìn pūtì ki pōoǹ-u
yii u-naantiibi pu ní atimbun kɔkɔ làá ká dibiindi.
Yii u làá yàntī u-naantiibi ń bùtī kii kitiŋ pu bulee,
kí yòon̄-bi yilpu kii iŋmalbijaayee.
Bi-tinjandi làá dāá kíĺ Ŋyaam mɔɔl
kí tin cáá sāā Meediiteeranee tiŋkuu,
kí dāá yòon̄ Eefiraati mɔɔl
kí tin cáá sāā kitiŋgbeennyɔkɔ#44.21 Dūú ŋmàntī nì Diny 12.3, 13.16, 15.5, Ilan 72.8..
Isaaki
22Ti-Dindaan nìn pōoǹ Isaaki dipoombaantiil,
u-baa Abraam pu.
Jaakɔb
Míǹ boonee ní u lēē Jaakɔb
23ú fōō u-poondi nì u-biindi
inifunaan kɔkɔ yil pu.
Ti-Dindaan nìn nyīī diŋambil yii u làá bìin̄ u-pu,
ní ki dū kitiŋee ki tīī-u,
ní u cúu yākatì atinjan ki tīī tinaakɔti saalaa nì tilee#44.23 Isaaki : Diny 17.19, 25.19-26, 26.3. - Jaakɔb: Diny 27.27-29, 28.14, 35.12, Eebru 11.20. - atinjan : Joos 14.1..
Mooyiisi
(Kpèè Ditee 34.10-12)
24 Jaakɔb naantiibi kansikin ní
ti-Dindaan nìn lēē unimɔnti ubɔ,
udaan bɔti nìn fáatì samaa kɔkɔ.
Currently Selected:
Siracide 44: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.