Siracide 41
41
Ŋkúm
1Óò ŋkúm, an sá ntuntun ní ki tīī
unil ń dàkafì a-pu,
ŋyunti ŋun ní u-pɔbil sɔ̀m̀,
tigaajati māntìi tú-u,
tiba kaa páb́-u,
tikɔkɔ bútì-u,
ní u gíti ŋūǹ kí jī tijimmɔntiilee#41.1 Dūú ŋmàntī nì Yees 38.10..
2Óò ŋkúm, a dòoń ŋyuntimɔnti
ki tīī unandaan un kaa ti cáá mpɔn,
ki tīī un púĺ kɔ́tí kɔti, tibɔti tikpil páb́-uee,
ki tīī unil un kaa kíikí u-ba pu kaa ti cáá kimɔtiiyee#41.2 Dūú ŋmàntī nì Yoob 3.21..
3Taa fàŋkì ŋkúm ŋyunti ŋun ŋu yaa lēē kí dāan̄ee.
Téetí bin di līntiǹ-si
nì bin di làá dāá páań a-boonee pu.
4Ŋkúm sá tiwan tin ti-Dindaan sòon̄ ki síiǹ
unifoo kamaa puee ní.
Ba pu ní á nīn bí ki kpākantí tin Yilpu Fɔ́ŋŋŋ Nimbɔtiu
lēē ki síiǹ báà ŋmee?
A ŋūǹ kí kàl̄ kitiŋ pu abin saalaa,
àá abin dilaataal àá kutuku,
ubɔ kaa làá wòoǹ-si a-maŋfal wiiŋyi pu ditaŋkpiilin.
Tin dɔ̄ ki cí binikpitibee
5Binikpitib biyaamu kpántí
ntimbiil biyaamu ní.
Mu cáà bin di kaa nyí Unimbɔtee dumpui ní.
6Bikpitiŋaliibi biyaamu fakal làá nàan̄ ní,
icoo di làá nīn dī mu-naantiibi kí nīn cá jaanjaan.
7Ubaati un sá unikpitee biyaamu làá dāá wòoǹ-u.
Di sá yii u-pu ní icoo dī-mu.
8Mbusu dɔ̄ ki cí nimbi binikpitib
bin di dū Yilpu Fɔ́ŋŋŋ Nimbɔtiu Marau ki fée.
9Daliŋkin bi màl̄-nee, mbusu di dɔ̄ ki cí-ni,
ni yaa tí kpíìyaaa, mbusu di dɔ̄ ki cí-ni.
10Tin kɔkɔ pée nyánní ntaminee làá fàtīí gítí ntamin ní.
Míǹ mbaantiim ní an sá ki tīī binikpitib:
bi làá nyā mbusun ní kí kɔ́ dinàandin#41.10 Dūú ŋmàntī nì Ditee 27.26, Fiil 3.19..
Diyimmɔntiil
(Kpèè 44.14, Alaŋ 10.7, Uciŋ 7.1)
11Unil yaa kpíìyee, bi kàal̀ u-kpool ní,
ama bikpitiŋaliibi yimbiiku làá pítí ní.
12Yàntī a-yindi bɔti ń nīn páb́-si,
di sá yii a-kpátam boonee,
di làá nīn bí kí yúntí kí jītíǹ
asindaariyakpuku kutuku pu.
13Nnaam kaa yúntí,
ama diyimmɔntiil díǹ bí ní ki cá jaanjaan.
Ba di máaǹ kí kɔ́ǹ unil icoo?
(41.16–42.1. kpèè 4.20-21)
14Mbiyaamu, nín̄ ŋúb́maan m-dàkatam tiŋan.
Dinyil din bál̀ee nì tigaajati tin baa wāĺee kèetī tilati poon?
15Unil un bāal̀ u-gbaandee
sɔ́ǹ un bāal̀ u-ciiŋyee.
16An puee m làá tùkù-ni tin di máaǹ kí nīn cáá-ni icooyee.
Di sá yii an kaa ŋān̄ unil ń nīn pée bí icoon.
Kí kūtèe báà ŋma kaa kpèé ki wāĺ tiwan mbaantiimin.
17Á nīn cáá icoo kí dòon̄ nì unimpu a-baa nì a-na nimbiin.
Ubɔti nì unikpaan nimbiinee, án nīn cáá-si icoo á mɔ̄ntì.
18Ubɔsoonli nimbiinee,
án nīn cáá-si icoo á ŋá tikpitil.
Unimbɔti nibul nimbiinee,
án nīn cáá-si icoo á yìntīǹ Unimbɔti Marau.
A-bɔɔ nì a-ŋeenaatɔ nimbiinee,
án nīn cáá-si icoo á ŋá tin kaa ŋān̄ee.
19A-kɔŋkɔnnaatɔb nimbiinee,
án nīn cáá-si icoo á yɔ̀.
Án nīn cáá-si icoo yii a nín pūtì
ki pōoǹ kí ŋá puee, aa ŋá míǹ.
Án nīn cáá-si icoo yii a dū a-ŋaŋkpancɔ
ki nyīī teebil pu ki jīǹ tijin,
àá a kpēē ki sīŋkiǹ tin bi tīī-see àá tin a tīī ubɔee.
20Án nīn cáá-si icoo yii bi jáam̀-si aa kíí,
àá a yú ki kpèé kinimpulaakpaai.
21Án nīn cáá-si icoo yii a gbáfì a-nabiki kaa pílifiǹ-kì,
àá a fìkī unil wanti àá tin bi pú-uee.
Án nīn cáá-si icoo yii a kpēē ubɔ nimpuu,
22àá a mɔ̄nnì a-tɔntɔnliu unimpu,
àá a sútì ki pìl̄ u-lambaŋki.
Án nīn cáá-si icoo yii a sīī a-bɔɔbi,
àá a pú-bi tiba ki pɔ́ntì-bi.
Currently Selected:
Siracide 41: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.