Siracide 38
38
Dɔkɔta nì igbaŋween bɔti
1Tīī dɔkɔta jilma ditundi din u tūǹee pu,
kun puee ti-Dindaan di náań u mun.
2Di sá yii Yilpu Fɔ́ŋŋŋ Nimbɔtiu cee ní dicáaǹdi nyēeń,
kii tiwampɔkaal tin unil fòol̄ ubɔti ceeyee.
3Dɔkɔta nyil pu ní u còom̄ u-yil gáań,
ní binikpaambi tɔ́-u.
4Isunyaan in cāantée nyánní kitiŋ ní,
an dàkà yii ti-Dindaan di náań inyɔkɔfi.
Unil un cáá nlandɔkɔee kaa kpèé ki sìŋkīǹ-i.
5Didɔgindi ní Mooyiisi dūu tɔ́ nnyimin ní mì mɔ́ɔkì#38.5 Dūú ŋmàntī nì Disa 15.23-25..
An yāntì binib béè Unimbɔti pɔŋŋu.
6U tīī binib dinyil bí dūú nyɔ̄ŋkì-u
u-maamaaci tuuŋŋi pu.
7Tíǹ ní dɔkɔta cáa cāantí iween ní ki bàtī iwàlfi pu.
8Tíǹ ní un nyāntí inyɔkɔfee cáa ŋmàlintí ki ŋáań inyɔkɔfi,
án nín làá ŋá pu ti-Dindaan tuuŋŋi ń taa nín̄ cáá dikúntilee.
Ŋgbampɔn nyánní u-cee ní ki kpátì ki gbí kitiŋ kɔkɔ pu.
9M-jipɔɔn, a yaa būǹee á taa dūú ŋá bugbambu,
ama á mèè ti-Dindaan, u làá cáaǹ-si#38.9 Dūú ŋmàntī nì Yaku 5.14-16..
10Fá a-kpitii kí ŋá min kítèe,
kí ŋá a-pɔbil circir kí nyā ikpiti kɔkɔn.
11A yaa cáá ŋŋmamee, á nyàab̀ ŋyim diŋaaŋkul
nì talaalutuukaa nì ŋkpam kí ŋá Unimbɔti saraa.
12Míǹ boonee á yàntī dɔkɔta ń kpèè-si,
kun puee ti-Dindaan di náań u mun.
Yàntī dɔkɔta ń nīn bí ki kɔ́ĺ-si,
di sá yii a nyàab̀-u ú cáaǹ-si ní.
13Ŋyunti ŋubɔee a-cáaǹtam làá nyānní dɔkɔtab cee ní.
14Di sá yii bi mun làá mèè ti-Dindaan ní.
U làá yàntī bí ŋmā kí bàtī ubunli weeŋyi pu,
ní kí cáaǹ-u ú nīn bí dimaŋfalin.
15Un di yaa yīntiǹ u-náanliuee,
udaan ń kɔ́ dɔkɔta ŋaan!
Tin a máaǹ kí ŋá unil yaa kpíìyee
(Kpèè 22.11-12)
16M-jipɔɔn, sɔ̄ unil un kpíìyee pu.
Tóoń ŋkpiisilan kí dàkà a-nimbaaku.
Míǹ boonee á síb́-u kí nóó nì akoobil nín sá puee,
kí taa súntí kí tīī dikaakul din poon bi síb́-uee tinyool.
17Yāliŋkì u-pu tikpil, kí sɔ̄ u-pu lɔ̀lɔlɔ.
Kāl̀ u-kpool min ní an máaǹ-uee,
ŋwiin ŋubɔ kii ili binib ń taa sòoǹ a-pu.
Míǹ boonee á sɔ̀ŋkì a-pɔbil a-nimbaaku pu.
18Di sá yii kunimbaau ŋūǹ kí kpɔ̀ unil.
Unil un pɔbil bíil̀ee kaa ti cáá mpɔn.
19A yaa kɔ́ nnaabunee, kunimbaau kaa lèekī a-pu.
A yaa kā kunandaŋuee, an sá mbusu ní.
20Taa yàntī kunimbaau ń jī mpaan a-pɔbil poon,
jà-ku ní kí nīn dàkafī a-kúntitam pu.
21Taa súntí yii a yaa kpíì aa ti gítiń dimaŋfalin.
A-nimbaaku kaa làá kèetī utaŋkpiil báà tiba,
ní siiyee, a bí ki náatí a-ba fám.
22Á téetí yii kun bāań-uee di làá pée bàń sii mun.
Úǹ cee fu jítì fool, sii cee di sá díǹ.
23Unil yaa kpíì ki kɔ́ diŋuŋfilinee,
á taa ti dàkafì u-pu.
U tin lì yii u sìntēe, á sɔ̀ŋkì a-pɔbil.
Ŋŋal pu tuuŋŋi nín cáá agìń puee
24Kí kpántí unyilee, see á nīn cáá
iyunti tikpil ki kɔ̀ntī a-nimbiliŋ.
Un pu ditundi kaa múkúee di kpántí uciŋfiti.
25Mana ní un ŋúb́ inaa ki kù tikpaalee
làá kpántí uciŋfiti?
Kun pée tìì-u mmɔnee di sá
ú nīn ŋúb́ ndɔ ki péetí u-naai.
U cáá-i ki tūǹ ditundi kaa gbèentí
ní ki sòoǹ u-najapɔmbiliŋ baba bɔti.
26Tin pée páb́-uee di sá ú cátí adan,
ní kunyeeuee ú kpíiǹ u-nasalii.
27Míǹ ní an sá ki tīī ŋŋal pu tɔntɔnliibi nì bin kpítí tiwanee.
Bi tūǹ ditundi ŋwiimpu nì kunyeeu ní.
Kpèè, bin di cákà njalimu mun bi cáá nyìitī tiwan puee.
Bi bí ní ki kpántí tiwan daanti kaa gbèentí.
Bi dù bi-pɔbil kɔkɔ kí lēē kun naŋku bi là kí lēēyee,
ní kí dū tinyati kí dóó bi-tundi.
28Míǹ mbaantiim ní an sá ki tīī
ucaa un kā ki kɔ́ĺ dicaataŋkpalee.
U-nimbikpeeŋu pée cɔ́ tikúti tin u làá dūú tɔ̄ ditundee pu ní.
Ŋŋmi tuntuŋku píl̀ u-wunti
ní u bí ki mɔ̀ nì kucaapuu.
Aama un u cáa gbáà tikútee kpáà u-tafaliŋ.
U-nimbiliŋ pée cɔ́ kun ní u bíi mɔ́ɔ̀yee pu ní.
U dù u-pɔbil kɔkɔ kí tīī kí tɔ̄ u-tundi tiŋan pu,
ní ki kpìtī u-geem kí ŋmā kí dɔ́ntí-dì.
29Míǹ ní an sá uyɔɔmaati un kā ki tūǹ u-tundee.
U cáá u-taaŋi ki màntī u-jantiliiki.
U-landɔkɔŋu pée kā u-tundi pu ní,
ní u pɔ̄ɔntí kí ŋmā kí mā tiwan tikpil.
30U dù u-taaŋi kí tāā kuyɔkɔu,
ní kí dū u-ŋalii kí kúntí.
U dù u-pɔbil kɔkɔ kí tīī kí jɔ̀lifì
ní kí kpìtī u-geem ki bɔ́ntí laakin u làá púĺee.
31Binib nee kɔkɔ máká bi-ŋalii pu ní,
ní báà ŋma nyí u-tundi tiŋan.
32An yaa kaa sá bíǹ puee,
baa bàà ŋūǹ kí náań kitiŋ,
kaa bàà ŋūǹ kí nīn kóò ki-ni,
ní kaa bàà ŋūǹ kí còom̀ ki-ni.
Ama bitindaŋkpilib kpafil poonee,
baa bàlifī bi-pu.
33Samaa poonee, baa cáá tinyool paaŋŋu.
Bi kpá ki làá kàl̄ ubɔsoonli jal pu.
Baa kàal̀ ubɔsoonli jal pu,
kaa nyí marab poon tiba.
Baa cūtì sukul kaa ŋūǹ marab.
Baa kútì bin gà alaŋkpanee poon.
34Ama bíǹ di kpèé tin náań ki bí ki cá jaanjaanee,
ní bi-wimmeem di sá bí ŋmā kí tɔ̄ bi-tundi tiŋan.
Ama an kaa sá mbaantiim ki tīī un di dū u-ba ki tīī
ki dàkafī Yilpu Fɔ́ŋŋŋ Nimbɔtiu Marau puee#38.34 Dūú ŋmàntī nì Ilan 1.1-2..
Currently Selected:
Siracide 38: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.