Siracide 37
37
Bibɔɔtiibi bí tɔbin
(Kpèè 6.1-17)
1Ubɔɔti kamaa ŋūǹ kí tùkù-si yii:
«Man mun sá a-bɔɔ ní!»
Ama biba ceeyee, bi sá bɔɔbi diyindi fám ní.
2A-bɔɔmɔnti yaa kpántì a-nannanliuee,
an sá kunimbaau kun cáǹ-si ŋkúminee ní!
3Kun téekí-ti ti ŋáań ikpitee nyánní la
ní ki yāntì inyimɔn gbí kitiŋ kɔkɔ pu míǹ?
4Ubɔɔti ubɔ nóó-si nnaam yuntiŋu ní,
ama nnaabu yaa kɔ́-see ní ú kpántí a-nannanliu.
5Ubɔɔti ubɔ kíikí si nì u ń jī falaa ú ká kí jī,
ní dikɔ̀ndi poonee ú sāǹ kí báĺ u-gbampɔɔl boon.
6Á taa súntí a-bɔɔ pu a-pɔbilin,
ní kí téetí u-pu a yaa ká tigaajatee.
Bisaŋkiliibi
7Usaŋkil kamaa làá lì yii úǹ saŋkii di ŋān̄,
ama biba bíǹ sáŋkí binib ki kpàkaǹ njim ní.
8Nín̄ nyí nì a-ba nì bisaŋkiliibi.
Bàlifì a-ba kí béé kun udaan nyàab̀ee.
Di sá yii úǹ u-ba pu ní u sáŋkí-si.
Yaa sá fám u ŋáań míǹ ki nyàab̀
kí fōō tin sá a-yatee ní.
9U ŋūǹ kí lì-si yii: «A tàkā nsammɔnti pu.»
U làá kàkatī u-ba ki yú kudandaŋu
kí kpèè tin làá bàń-see.
10Taa bàlifì isaŋki unil un ŋèeǹ nì see cee,
kí taa māafì bin ná-see tin a là kí ŋée.
11Taa yàntī unimpu ń tīī-si isaŋki u-yɔnti pu,
kí taa bàlifì isaŋki kujaau pu ufaantija cee,
kí taa bàlifì isaŋki tin a làá dēe pu uwannyafil cee,
kí taa bàlifì isaŋki tin a làá nyāfèe pu uwandal cee.
Ubɔ yaa ŋá-si tiŋan ní a là kí jāam̀-uee,
taa cù un cáá nnimbitaataamee cee kí fōō isaŋki,
kí taa bàlifì isaŋki tiniti pu utɔŋfiti cee,
kí taa bàlifì isaŋki ditundi pu uwutijoodaan cee,
kí taa bàlifì isaŋki ditundi dóotam pu
utɔntɔnli un bi pà dibindee cee,
kí taa bàlifì isaŋki dituŋkpaandi pu utɔntɔnli un kaa yáb̀ee cee.
Taa nín̄ cɔ́tí an nibee pu yii bí tīī-si isaŋki.
12Ama nín̄ pée cáà un fàŋkí ti-Dindaanee cee.
A nyí yii u nóó marab,
ní ki dàkafī kii siiyee.
Tin a làá ŋée yaa kaa cōom̀ee, u làá tíkiń-si.
13Nín̄ máká tin a-pɔbil bí-si yii á ŋée pu,
di sá yii díǹ di sá deedee saŋkiliu.
14Iyunti ibee unil landɔkɔjaatiŋu kpáafí-u
ki jítiǹ biciitiliibi biluli bin tɔ́kɔ́ sintil difɔkɔku pu ki cée.
15Ama mpeepeekaamee, bàlifì Yilpu Fɔ́ŋŋŋ Nimbɔtiu
ú kpòotī-si kí tàkan̄ ibaamɔn saŋŋu pu.
Iciin in sá imɔntee nì in kaa sée
16Kí wàatī á kíĺ ditundi kamaayee, see á sòoǹ kí bɔ́ntí.
Kí wàatī á ŋá tin kamaayee, see á dàkafì.
17Unil landɔkɔi kífí u-pɔbilin ní.
18Dì ŋūǹ kí tɔ̄ apan anaa:
tiŋan nì tikpitil, dimaŋfal nì ŋkúm.
Ama kun di lèekī tin sá á ŋée di sá dilimbil#37.18 Kpèè Alaŋ 18.21..
19Binib biba yáb̀ kí dàkà bin kíǹee,
ama ní kaa ŋūǹ kí kèetī bíǹ bi-ba tiba poon.
20Biba mun sá bibɔsoonnyaambi.
Ama ní binib kaa là bi-bɔti
ní bí kpú ŋkùm.
21Di sá yii ti-Dindaan kaa pú-bi diyimɔɔl.
An pu ní baa cáá iciin báà fiii.
22Biba cáá iciin bíǹ bi-ba cee ní.
Kii bíǹ bi-ba nín sòoǹ puee,
bi ŋūǹ kí nīn máká bi-nyil pu.
23Ama uciŋfiti úǹ dàkà u-nibul ní.
Tin bi ŋūǹ kí ká u-nyil poonee,
bi ŋūǹ kí nīn máká an pu.
24Unil un cáá iciinee kāntí dibiindi tikpil ní,
ní bin kɔkɔ kāntí-uee lì yii u bí mmɔnni.
25Bi ŋūǹ kí kàaǹ unifoo maŋfal wiiŋyi,
ama baa ŋūǹ kí kàaǹ Isirayeel nibul yai.
26Binib cáá un cáá iciin u-nibul kansikinee pu dimákal ní.
U-yindi làá nīn bí ní ki cá jaanjaan.
Á jī kí ŋmàntīǹ a-pool
27M-jipɔɔn, á nīn cɔ́ŋkí a-ba
ŋyunti ŋun ní a dáá bí dimaŋfalinee.
Béé tin kaa ŋān̄ee kí yíí kí taa ŋá-tì.
28Di sá yii tikɔkɔ di kaa ŋān̄ ki tīī báà ŋma,
ní tikɔkɔ di kaa kàaliǹ báà ŋma#37.28 Dūú ŋmàntī nì 1 Kɔra 6.12, 10.23..
29A yaa ká tijimmɔntiilee, á jī kí ŋmàntīǹ a-pool,
taa páatíí jēetí tijin pu ki jīǹ ŋmàŋma.
30Di sá yii tijin tikpil dijilee tìì igbaŋween ní,
ní un jīǹ ki lákatí u-ba puee poon làá wà.
31Tijin tikpil dijil yāntì binib tikpil kpíì,
ama un nyí nì u-bee, u-maŋfal fɔ̀kɔntí ní.
Currently Selected:
Siracide 37: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.