Siracide 39
39
1U bífí dooooyee kpilib ciiŋyi,
ní u-nimbikɔntiwanti di sá ú nīn dàkafī
Unimbɔti bɔnaatiliibi bɔti pu.
2U kpáafí tin bi máafí binib bin nìn nyáń diyindee.
U gbìl̄ ki cíl̀ alaŋkpan taapu kɔkɔ nyíki nyiki#39.2 Dūú ŋmàntī nì Alaŋ 1.5-6, Ilan 78.1-2..
3U nyàab̀ kí béé alaŋkpan bɔti taapu,
ní ki yòontí ŋyunti kí béé ipɔɔn taapu.
4U tūǹ atuun binikpaambi cee,
ní bi kāntí-u bibɔtiibi kansikin.
U còom̄ ki cá ntincamun,
di sá yii u nyí tin ŋān̄ee nì tin kaa ŋān̄ee binib cee.
5Kutaafaau pɔ̀lpɔlee, u pɔ̄ɔntí
ki cá ti-Dindaan un náań-uee cee.
U mèé Yilpu Fɔ́ŋŋŋ Nimbɔtiu nimbiin.
U wàantí u-nyɔkɔ ki mèé-u
ní ki gbàam̄ u-kpitii pu#39.5 Dūú ŋmàntī nì Iciin 16.28..
6Ti-Dindaan un di sá Ukpaanee yaa lèe,
u làá yàntī dinyil fam ń gbí-u.
Niinee ní ú dū iciin nyɔɔbuŋŋi kí yàaǹ.
U-wimmeem poonee, u làá jāam̀ ti-Dindaan.
7U làá nīn cáá dinyil nì ŋyam ibɔsoon poon,
ní kí nīn dàkafī Unimbɔti bɔbalkaati pu.
8U làá yàntī tin u bífèe ń ŋmíntí kii ŋwalifee,
ní án nīn mɔ̄ǹ-u mara un di sá dipoondi
din bí ti-Dindaan nì u-nibul kansikinee pu.
9Binib tikpil làá pàkà-u u-nyil pu,
ní ki kpá kí súntí u-pu.
Baabadalee bi làá nīn pée téetí u-pu,
ní u-yindi ń nīn bí ki cá abin abin#39.9 Dūú ŋmàntī nì Dani 12.3..
10Atimbun nib làá dāá sòoǹ u-ciiŋyi pu,
ní bí dāá nyɔ̄ŋkì-u dikpafikpaandi poon.
11U yaa yúntì kitiŋ puee,
u làá nyā diyindi kí jītíǹ
binib kutukub pu.
U yaa tí kpíìyaaa,
an mɔ̄ǹ-u ní.
Tin kɔkɔ Unimbɔti ŋáańee ŋān̄ ní
12M yaa bíi dàkafēe, ilandɔkɔ tikpil dòoń-mi ní,
ní m náań nì uŋmal un ŋá dikuŋkundee.
An pu ní m gíti là kí sòoǹ.
13M-jipɔmbi bin yú nì unimbɔti deedeeyee,
wíim̀maan kii nsupumpukum min yú dibuŋgbándee.
14Nín̄ sɔ́fìmaan kii talaalutuukaayee.
Púkuḿmaan kii liisi supumpukumee,
kí gbìtī ni-sɔnsɔŋfiŋu.
Tí gāāmaan nlan dicilpu,
kí jāam̀maan ti-Dindaan
tin kɔkɔ u ŋée pu.
15Lìmaan yii: «Unimbɔti sá ukpaan!»
Gāāmaan ilan kí bɔ̀ɔ̀ tibati kí tīī-u tinyool.
Anyɔɔbun ŋin ni làá dūú gāā ilan ki nyɔ̄ŋkì-uee sɔ̀.
16Ti-Dindaan tuuŋŋi kɔkɔ ŋān̄ ní,
ní tin kɔkɔ u yaa tīī mara yii án ŋée,
tì ŋáań ŋyunti ŋun ní an sá tí ŋée ní.
17An kaa cáá bí bàlifì yii:
«Ba pu ní an bí yéè? Ba pu ní an sá yéè?»
Di sá yii tibɔti kɔkɔ taapu làá dāá nyā
kí páań mpaampiin pu ti-yuntiŋu.
Ti-Dindaan pée sòon̄ ní nnyim sāā ki yúl̀
ki dūu kpántì kubɔɔu.
U sòon̄ dinyɔɔbundi dibaba
ní an kpántì anyimbɔbil#39.17 Dūú ŋmàntī nì Diny 1.6-9, Disa 14.21-24, Joos 3.14-16..
18U tìì mara ní tikɔkɔ ń ŋá kii u nín là puee.
Ubɔ kpá kí kpákáǹ difiil din u tììyee#39.18 Dūú ŋmàntī nì 43.26, Ilan 33.9..
19Binifoobi kɔkɔ tuuŋŋi dɔ̄ u-nimbiin ní mpaampiin pu,
tiba kaa bí ki bál̀ waa wāĺ.
20U wāĺ tin jítèe nì tin bí ki dòońee kɔkɔ,
tiba kaa bí ki sá maamaaci u-cee.
21An kaa cáá bí bàlifì yii:
«Ba pu ní an bí yéè? Ba pu ní an sá yéè?»
Di sá yii Unimbɔti nyí kun pu u náań tiwan kɔkɔee#39.21Dūú ŋmàntī nì Alaŋ 16.4, Uciŋ 3.11..
22U-biindi sá kii mbun ŋun gbí ki páaǹee,
a lì kii nnyiŋgbeen ŋun di sɔ̀ŋkī kitiŋee ní#39.22 Dūú ŋmàntī nì 24.25-27, Ilan 65.10..
23Míǹ mbaantiim ní atimbun ŋin kíǹee paati
tin bi làá fōōyee di sá u-ŋuul,
kii u nín nìn yāntì nnyim kpántì ŋyaam puee#39.23 Dūú ŋmàntī nì Diny 13.10, 19.23-26..
24U-saŋyi tèen̄ ki tīī bin yú nì u deedeeyee,
ama ní ki cáá aganlaka tikpil ki tīī binikpitib#39.24 Dūú ŋmàntī nì Ilan 18.26-27..
25Doooo ŋkilkaaminee,
ti-Dindaan nìn náań tiwammɔntiil
ki tīī binimɔntiibi,
ní ki náań tin kaa ŋān̄ee
ki tīī binikpitib.
26Tiwan tin unifoo máaǹ kí nīn cáá
kí nīn bí dimaŋfalinee di sá
nnyim nì ŋŋmi nì tikúti nì ŋyaam
nì ŋyim nì nnaabiim nì tisiil
nì ndamam nì ŋkpam nì tiwampeeŋkaal.
27Tíǹ kɔkɔee sá tiwammɔntiil ní ki tīī
bin yú nì Unimbɔti deedeeyee,
ama ní ki kpántí tin kaa ŋān̄ee ki tīī binikpitib.
28Unimbɔti náań kubuŋu kubɔ
kí dáaĺ bikpitiŋaliibi tafal,
ní u-ŋuukpaandi yàntī ku kpántí nnaabukpaan.
Ibɔsoon yuntiŋuee,
ku dàkà ku-pɔŋŋu
ní kí sɔ̀ŋkì un náań-kuee pɔbil.
29Ti-Dindaan náań ŋŋmi nì ataanyiŋkumbil
nì ŋkùm nì ŋkúm kí dáaĺ bikpitiŋaliibi tafal.
30Ipeecuncuti nyiŋŋi nì inoom nì ikoowaati
nì kitàataajiki kin kù binikpitibee
31fàal̀ kí nīn tɔ́ u-marab.
Kitiŋ pu dooyee, tì pée bɔ́ntì ki cí kí ŋá tin u lèe.
Ŋyunti yaa bàn̄ee, tì kpá kí yíí kaa làá ŋá tin u lēe#39.31 B. 28-31: dūú ŋmàntī nì Iciin 5.20..
32M nìn pée nyí tin bí nee kɔkɔ doooo ŋkilkaamin.
An pu ní m dākafì ti-pu, ní ki dū-tì ki ŋmàn̄ ki bíl̀.
33Ti-Dindaan tuuŋŋi kɔkɔ ŋān̄ ní.
U tìì tin kpée ŋyunti ŋun máaǹee.
34Ubɔ ń taa lì yii:
«Tin bí nee kaa ŋān̄ ki bàn̄ tin kíǹee.»
Di sá yii tiwan kamaa ŋān̄ ti-yuntiŋu ní#39.34 Dūú ŋmàntī nì Diny 1.31..
35An puee kɔŋkɔnnee,
nì ni-pɔbil kɔkɔee,
ní kpàtī ni-neeŋyi kí gāāmaan ilan
kí jāam̀ ti-Dindaan.
Currently Selected:
Siracide 39: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.