Siracide 36
36
Unimbɔti nibul pu wimmeem
1Ti-Dindaan, duulinya kɔkɔ Nimbɔtiu, sɔ̄ ti-saai!
2Yàntī atimbun kɔkɔ nib ń fàŋkì-si#36.2 Dūú ŋmàntī nì Maat 6.9.!
3Dúkutí a-ŋal atimbuncaan pu
ní ŋí ká a-pɔŋkpaaŋŋu.
4A dáaĺ ti-tafal ki dàkā-bi yii a sá circirdaan.
Míǹ mbaantiim tāā kí bīikì bi-pu
kí dàkà-ti yii a sá ukpaan.
5Ti-Dindaan, yàntī ŋí béé-si,
kii timbi tiba nín béè yii
Unimbɔti ubɔ kaa ti bí
ki kútì sii ti-Dindaan pu puee#36.5 Dūú ŋmàntī nì Ditee 32.39..
6Fàtīí dàkà a-tuŋwambiti kii njaminee,
a nín nìn ŋáaǹ maamaaci tuuŋŋi puee.
7Dàkà a-pɔŋkpaaŋŋu kí tīī a-ba tinyool.
8Yàntī a-ŋuul ń pōō kí dū-dì kí yàaǹ,
9kí nàan̄ ti-pulincɔntiibi, kí kúntí ti-nannanliibi.
10Téetí ŋyunti ŋun a yóoǹee,
kí yàntī ŋú bàń malaa.
Niinee binib làá māafì a-tuŋkpaaŋŋi pu.
11Yàntī a-ŋuul din fòol̄ lìblib kii ŋŋmee
ń wà bin kíǹ ki bí dimaŋfalinee.
Nàan̄ bin sàantí a-nibulee.
12Tāā kí mátí ti-nannanliibi bɔtiibi,
bíǹ bin lì yii: «Ubɔ kaa ti bí kii timbee!»
13Fàtīí kpāfì Isirayeel naakɔti kɔkɔ,
14 kí fàtīí gíiǹ bi-tiŋki kí tīī-bi
kii a nín nìn dū-kì tīī-bi ŋkilkaamin puee.
15 Ti-Dindaan, sɔ̄ a-nibul din ŋúb́ a-yindee saai,
sɔ̄ Isirayeel nibul din a dūu ŋá a-jipɔŋkpiliuee saai#36.17 Dūú ŋmàntī nì Ditee 28.10, Yees 63.19, Yeer 14.9. - a-jipɔŋkpiliuee: dūú ŋmàntī nì Disa 4.22..
16 Sɔ̄ a-circir tiŋki saai,
Jeerusaleem tiŋki kin poon a kóòyee saai.
17 Yàntī binib ń gbí Siiyɔn tiŋkin kí nīn nyɔ́ŋkí-si.
Yàntī a-nyooti ń gbí a-diiku.
18 Dàkà yii bi sá a-nibul,
bíǹ bin a náań doooo ŋkilkaaminee.
Yàntī tin kɔkɔ a dī a-bɔnaatiliibi pu ki sòon̄ee ń ŋá.
19 Pà bin kɔkɔ máká a-puee bi-paati.
Niinee bi làá ká yii a-bɔnaatiliibi nìn cáá ibaamɔn.
20 Ti-Dindaan, sii un dàkà a-nibul kulaŋŋaŋfitiiuee,
fōō a-tɔntɔnliibi wimmeem.
Niinee kitiŋ pu nib kɔkɔ làá béé yii
sii di sá ti-Dindaan, jaanjaan Nimbɔtiu.
Á béé kí gàntī tin ŋān̄ee
21 Dipool díǹ fòol̄ tijin kɔkɔ nì ti-bulifi ní.
Ama tijin tiba bí ki ŋān̄ ki jítiǹ tin kíǹ.
22 Dilimbil nyí kí gàntī tipeenan kamaa mɔŋŋu.
Míǹ mbaantiim ní unyil béetí tinyimɔmbɔti.
23 Dipɔɔkpitil daan kɔ̄ntí unil kunimbaau ní,
ama unil un cáá dinyilee tēentí-u tin máaǹ-uee ní.
Á béé kí lēē a-nimpuu
24 Unimpu kíikí kí mɔ̄ǹ uninja un u yaa pée kée,
ama bininjab là bisapɔmbi biba ki jítiǹ bin kíǹee.
25 Uninja yaa kpēē u-nimpuu nyaaŋkuee an mɔ̄ǹ-u ní.
Tin uninja pée nyàab̀ee dee.
26 U-sooŋyi poon kulaŋŋaŋfitiiu nì mmɔn yaa bée,
u-cal gíti bí mmɔnni ki jítiǹ bininjab kɔkɔ.
27 Un cáá unimpuee bīitì tigaajati pu dee.
Unimpu sá ŋŋàl ŋun náań nì uee,
dikaakpal din tíkí-uee.
28 Kusaau kun baa bàkēe, bi fúkuĺ-kù ní.
Uninja yaa kaa cáá unimpuee,
u gbí falaa ní kaa nyí laakin u cée.
29 Baa ŋūǹ kí nīn máká unaayuciin
un tú ki yìiǹ ki póotí ntimuee pu.
Míǹ mbaantiim baa ŋūǹ kí nīn máká
uninja un kaa cáá ŋkɔŋkoon,
ki gbíntí ki dɔ̀ laakin kunyeeu yaa mɔ́-uee pu.
Currently Selected:
Siracide 36: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.