Siracide 32
32
Nín̄ nyí nì a-ba diinab poon
1Bi yaa lēē-si á nīn sá ukpil diina ubɔ poonee,
taa nín̄ dàkà a-ba.
Nín̄ bí bin bi yíińee cee,
kí nīn ŋáań kii bi nín ŋáań puee.
Kpèè bíǹ laŋki ní boonee á cùú kàl̄#32.1 Dūú ŋmàntī nì Maat 23.6..
2A yaa túń tin sá á tɔ̄ee ki dóòyee,
ní á gítí kí cùú kàl̄ a-paaŋŋu.
Án nīn mɔ̄ǹ-si bi nín jíń bi-pɔbil sɔ̄ŋkèe pu,
ní kí fōō kibeefuulii kin sá
dibɔ́ntil dimɔntiil paatee.
3A yaa sá un cíkitèe, sòoǹ,
di sá yii sii di máaǹ kí sòoǹ.
Ama á sòoǹ tin ní a nyée baba pu,
kí taa fōō agbiil paaŋŋu.
4Binib yaa bíi pílifí agbiil nì ilanee,
á taa nín̄ bí ki sòoǹ an kaa kúntí.
An kaa sá ŋyunti gbanti ní a làá dàkà a-ciiŋyi.
5Bi yaa bíi jīǹ diina ní agbiil bée,
an bí kii ditaŋkpanyaandi din
di bí sindaariya bɔmbiki puee ní.
6Bi yaa bíi nyù ndamɔntiim
ní ki pílifí ilammɔntee,
an sá kii ditaŋkpanyaandi din bi yíì
eemeeroodi an fúuń sindaariya fukuŋkaatinee ní.
7A yaa sá kiwaayee, á sòoǹ an yaa bālifì yii á sòoǹee.
Ama á pée sòoǹ mili ja ŋyunti ŋun ní bi yaa bālifì-si tibɔtee#32.7 Dūú ŋmàntī nì Yoob 32.4-7..
8Sòoǹ a-bɔti tí nīn bí kúlkul,
sòoǹ anyɔɔbun fiii ní tibɔti tikpil ń nīn bí poon.
Dàkà yii a sá unil un di gbìl̄ tibɔti,
ama ní kaa là kí sòoǹ-tèe.
9Laakin ní binikpaambi yaa bée,
taa nín̄ dàkà a-ba kii si nì bi ŋmèe.
Laakin binicikitikaabi yaa bée,
á taa nín̄ sòoǹ tikpil.
10Kii utaa nín ŋmóò pu kí nín téeńee,
míǹ ní binib ŋáań un kaa dàkà u-bee tiŋan.
11Kukuluu yaa gbáńee, yīkì kí taa gbíntí boon,
sāǹ kí nīn kùǹ, kí taa nín̄ tú ki yìiǹ.
12A-dumpuee, a ŋūǹ kí gbīil̀, kí ŋá a nín là puee,
ama á taa nín̄ sòoǹ ki gà a-bindi ní kaa nín ŋá ikpiti.
13Tíǹ kɔkɔ puee, á jāam̀ un di náań-see,
un di gbēentí-si u-ŋantee#32.13 Dūú ŋmàntī nì Ditee 8.10, 1 Tiim 4.4..
DIDÀKAL BƆTI DIJANNANAATIIL
Á fàŋkì Unimbɔti
14Unil un fàŋkí ti-Dindaanee fòol̄ u-saŋkii ní,
bin bin nyàab̀-u doooo kutaafaauee kāntí u-ŋanti ní.
15Un di bífí u-Marauee,
udaan làá ká tin u nyàab̀ee.
Ama un di ŋáań kii u nóó Mara ní kaa nóóyee,
Mara gbanti di làá lúkú-u.
16Bin di fàŋkí ti-Dindaanee
béetí tin u lèe ní.
Bi-tunnyaaŋŋi jìl̀ kii ŋwalifee ní.
17Ukpitiŋal kaa kíikí bí wòoǹ-u.
Úǹ pée kāntí inaakpal kí ŋá u nín là puee ní#32.17 Dūú ŋmàntī nì 2 Tiim 4.3..
18Ulandɔkɔdaan kaa súntí kí dàkafì,
ama unikpiti nì ulambidaan bíǹ kaa fàŋkí tiba.
19Taa pée ŋá tiba kaa dākafì ki wāatì,
mimmee aa làá yāliŋkì tin a làá ŋée pu.
20Taa còom̀ nsan ŋun pu aganlaka bée,
án nín làá ŋá pu á taa gbéetí ataŋkpeeyee.
21Taa nín̄ máká nsan ŋun tèen̄ee pu.
22Nín̄ nyí nì a-ba nì sisi a-ba biyaamu gba.
23Nín̄ nyí nì a-ba nì tin kamaa a ŋáańee poon.
An mun ní bi yíì yii a nóó ti-Dindaan marab.
24Un di máká Unimbɔti Marau puee
nóó u-bɔkpaaŋi ní.
Un kamaa yaa dū u-mákal ki tɔ́ ti-Dindaan puee,
tikpitil tiba pée kpá kí bàń-u#32.24 B. 23-24: dūú ŋmàntī nì Ditee 4.9, Ilan 22.5-6, Alaŋ 16.17, 19.16, 1 Tiim 4.16..
Currently Selected:
Siracide 32: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.