Siracide 33
33
1Nnaabu ŋubɔ kpá ki làá bàń unil un fàŋkí ti-Dindaanee,
báà u yaa kɔ́ icɔŋkin, u làá nyā#33.1 Dūú ŋmàntī nì Alaŋ 12.21, 1 Kɔra 10.13..
2Uciŋfiti kaa ŋūǹ kí nīn ná ti-Dindaan Marau,
ama un ŋáań kii u nóó Mara gbanti kaa nóóyee
bí kii meela un dēē tiŋku un pu kubuŋkpaaŋŋu jītée ní.
3Unil un cáá dinyilee
máká Unimbɔti nyɔɔbundi pu.
U tìì u-Marau kudapɔɔu
kii usaraaŋal nyɔɔbundee ní.
Ugbaan nì un bèel̄ binibee bɔti
4A yaa là bí pīlifiǹ-see,
bɔ́ntí tin a là kí sòoǹee.
Kpāfì tin kɔkɔ a nyée kí nīn kíí.
5Ugbaan bimbim nì u nín dàkafì puee
kpántí ŋyunti kamaa ní.
An màntī kii ditɔrɔkutaalee ní.
6Ubɔɔti un di bèel̄ binibee
sá kii utaamu un di sūǹ
ŋyunti ŋun kamaa utanjakal
yaa jɔ́m̀ ki kāl̀ u-puee ní.
Tiwan nín kaa ŋmà puee
7Dibindi poonee, ŋwìiń di ŋmíntí iwiin kɔkɔ.
Kin an ŋá mana ní iwiin iba sá ikpaan ki jítiǹ in kíǹ?
8An sá ti-Dindaan di ŋá-i í taa nín̄ ŋmà,
ní ki lēē iyunti iba í nīn sá jiŋaal wiiŋyi.
9U lēē iba ki yāntì i sá ikpaan ki ŋá-i circir,
ní ki yāntì in kíǹee íǹ sá iwiŋfantanti#33.9 Kpèè Diny 1.14, 2.3, Disa 20.11..
10Inifunaan kɔkɔ nyánní ntamin ní,
titan ní Unimbɔti dūu máń Adam#33.10 Kpèè Diny 2.7, Yoob 10.9, 1 Kɔra 15.47..
11Ama ní ti-Dindaan nì u-ciiŋkpaaŋyi poonee,
u lēē báà ŋma ń nyā u-ba.
U yāntì báà ŋma nóó isan in nyáń i-bee.
12U bīiǹ bi-kansikin biba pu ki yōoǹ-bi yilpu,
ki gāntì bi-ba ki síiǹ u-ba bí nīn nákáǹ-u.
Biba muee, u tɔ́-bi mbusu ki sīntiǹ-bi taapu
ki jìn̄-bi mpaan ŋun pu bi nìn bée#33.12 Dūú ŋmàntī nì Dikà 16.5, 1 Sami 2.6-8, Luuki 1.51-55..
13Kuyɔkɔu kā uyɔɔmaati ŋaan
ní ú dū-ku kí mā kun u lèe.
Míǹ mbaantiim ní binib mun kā bi-náanliu ŋaan
ní úǹ di lèekī tin u lèe kí tīī un sá kamaa#33.13 Dūú ŋmàntī nì Yees 45.9, Yoob 10.8-9..
14Tikpitil nimbiinee, tiŋan di bí,
ní ŋkúm nimbiinee, dimaŋfal mun bí.
Míǹ mbaantiim ní bin yú nì ti-Dindaan deedeeyee caŋinee,
bikpitiŋaliibi mun bí.
15A yaa kpēē Yilpu Fɔ́ŋŋŋ Nimbɔtiu tuuŋŋee,
a làá ká yii tì nóó tili tili ní,
ní ki jáà nì tɔb.
16Mamee, man di lúŋkì boon kí tɔ̄ ditundi,
kii bi yaa kītì fiinyi subiliŋ ki dóò
un pá boon ki lúlifée.
17Ama ti-Dindaan bīiǹ m-boon
m jìn̄ ki cúú bin līntiǹ-mee.
Ma mun ŋúń ki ká asubil ki gbéeǹ m-kabiku
kii bisubikitiliibi bin kíǹee.
18Béémaan yii an kaa sá man baba pu ní m bíi gì,
ama an sá ki tīī bin kɔkɔ nyàab̀ dinyilee ní.
Á tɔ̄ a-ba kí taa nín̄ bí ubɔ pu
19Pīlifìmaan-mi, dinibul yidambi.
Nimbi samaa kpilib, kpòom̄maan ditafal kí pīlifì.
20A-maŋfal wiiŋyi poonee,
á taa yàntī a-jipɔɔn àá a-nimpuu
àá a-nabiki àá a-bɔɔ ń jī a-pu dinyandi.
Taa dū a-gaajawanti kí tīī unil ubɔ fám.
Án làá dāá wà-si ní á fàtīí bàlifì ti-pu.
21A yaa bí dimaŋfalin ki fòotēe,
taa yàntī ubɔ ń nīn cáá a-pu mpɔn.
22An sɔ́ a-biyaamu ń nīn mèé-si tiwan
ki jítiǹ sii ń nīn mèé múǹ.
23Tin kamaa a ŋáańee poonee,
nín̄ cáá ti-pu mpɔn
kí taa yàntī ubɔ ń kpèè kí sìŋkīǹ-si.
24A-winjoolkaai poon,
ŋyunti ŋun a làá kpúee poon
ní á dū tin a làá tīī difakalee kí yàkatī.
Unil nín máaǹ kí ŋúb́ uyumbu puee
25Kun sá ki tīī kimaŋee di sá timool nì ndɔ nì atún,
ama kun sá ki tīī uyumbuee di sá tijin nì ditafadaaldi nì ditundi.
26A yaa yāntì a-yumbuu tūǹ ditundee, a làá ká diŋuŋfil.
A yaa yāntì u kā ki kpàl̄ iŋalee, u làá dāá nyàab̀ kí sāǹ ní.
27Idɔkpalikaa nì ŋŋmii ní bi dùú kpàl̄ unaa ú tìntī u-yil,
ama tigbati nì diwɔ́bil di yàntī utɔntɔŋkpiti ń pɔ̀fin̄.
28Tīī-u ditundi ú tɔ̄, ú taa nín̄ kā ki jòon̄ iŋal fám.
29Di sá yii unil yaa kā fámee
ní u bífí atuŋkpiti diŋál.
30Yàntī ú tɔ̄ ditundi di sá yii kun pu u bée dee.
U yaa kaa pílifiǹ-see á bā-u abaa.
Ama á taa nín ŋá ntoom kí lákatí mara pu,
kí taa ŋá tiba mun an kaa nóó deedee saŋŋu#33.30 Dūú ŋmàntī nì Alaŋ 29.19..
31A yaa cáá utɔntɔnli ubɔbɔee,
dū-u kí ŋá kii u sá sisi a-bee.
Di sá yii a dá-u kudapɔɔu ní.
A yaa cáá utɔntɔnli ubɔbɔee,
dū-u kí kpántí a-nabiki.
Di sá yii u cáá kudapɔɔu a-cee
kii sisi a-bee ní.
32A yaa bíi sàantí-uee, u làá dāá sāǹ kí kátí ní.
33Kin u yaa sáǹ, a làá ŋá mana ní kí nyàab̀-u#33.33 Kpèè Ditee 23.16-17..
Currently Selected:
Siracide 33: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.