Siracide 31
31
Ugaaja gìŋ́ŋi
(Kpèè Luuki 12.15-31)
1Tigaajati nín kaa yàntī ugaaja
gèeǹee puee, see ú dúntí,
ní ilandɔkɔ yàntī ŋgeem gíti kpá-u.
2Ilandɔkɔ in yàntī waa gèeǹee sá kii kuweeŋkpiiuee ní.
I yàntī unil kaa ŋūǹ kí ŋùŋfì ní ki jì ŋgeem.
3Ugaaja gì ki kōontí tigaajati ki kpūkuntí,
u yaa kāl̀ kí ŋùŋfèe, án sá yii u bíi jīǹ mmɔn ní.
4Uwɔfi tūǹ ditundi kaa kpáàa kāntí gba kí jī,
u yaa gbēeǹee, u kɔ́ falaakpaan poon dee.
5Unil un néeń sindaariya tikpilee
kaa lóotí ikpiti diŋál.
Un jòó ki pá animbil boonee,
see animbil ń kīil̀-u.
6Sindaariya yāntì binib tikpil nāaǹ,
ní asaluu gbáń-bi tikpil#31.6 Dūú ŋmàntī nì 8.1, 1 Tiim 6.9-10..
7Di sá yii sindaariya sá kii kutaliŋŋuee
ní ki tīī binib bin nimbiliŋ máǹ u-puee.
Bin kɔkɔ kaa cáá nlandɔkɔee jéetì ku-poon.
8Ugaaja un pu baa kāntí tiba kí lì
ní u-nimbiliŋ kaa máǹ sindaariya puee
bí mmɔnneeee!
9An niliu gbanti bí la tí pàkà-u?
Di sá yii u bíi ŋáań tin nyáń ti-bee u-nibul kansikin.
10Ŋma di kɔ́ icɔŋki gbantin?
Udaan cáá nsan kí nīn dàkà u-ba.
Ŋma ní diyimɔɔl pú-u ú ŋá ikpiti ní waa ŋá?
Ŋma ní nsan dōoǹ ú yìntī ní waa yīntì?
11An nibee gaajawanti làá báań inyaan,
ní samaa làá nīn máafí tiŋan tin bi ŋée.
A yaa bíi jīǹ tijinee...
(Kpèè Alaŋ 23.1-3)
12Bi yaa yíiń-si kucaŋu ní a kāl̀ kí jī tijinee,
á taa nín̄ kā ki wāā kinyɔkɔ ki lì yii:
«Tijimmɔntiil di wīikí yéèee!»
13Téetí yii nnimbifɔkɔn kaa sá tiwammɔntiil.
Tiba kaa sá kuwaŋkpiiu ki bàn̄ dinimbil.
An pu ní díǹ pée sūǹ kaa gbèentí.
14Taa tàntī a-ŋal kí lēē
dinaŋkúndi din ubɔ bíi kpèéyee.
Yaa sá fám ni-liitil ŋalii
làá kpōofì tɔb disambilin.
15Sisi a-ba ń dáań kí béé tin ní a-juti lèe,
ní kí dàkafì kí ŋá tin kamaa a làá ŋée#31.15 Dūú ŋmàntī nì Maat 7.12..
16Jī tijin kii unil un ní bi dàkā didàkamɔntiilee,
taa nín̄ ŋmàfī kí yàntī binib naŋki ń nyā nì si.
17Nín̄ sá unipeekaa kí fíntí a-ŋalii
kí dàkà yii a sá unil un di fōō didàkamɔntiilee.
Taa nín kā ki jīǹ tikɔkɔ
kí kɔ́ǹ bin kíǹee icoo.
18Sii nì binib tikpil yaa kā ki jīǹee,
taa péé kí lēē tijin kí kíń bin kíǹee.
19Unil un ní bi dàkā didàkamɔntiilee,
tijin fiii ní u jīǹ kí díkí.
Mimmee u yaa dōoǹ kí gèeǹee,
u fòotī tiŋan ní.
20Un jīǹ ki ŋmàntīǹ u-poolee gèeǹ mmɔntiim ní.
U fìntī malaa ní ki tɔ́ u-ba.
Unil un sàfī tijinee kaa gèeǹ tiŋan,
ní ki wùliŋkī ní u-poon mútikí.
21Bi yaa páb́-si ní a jíń ki lákatì a-ba puee,
á nyā kí wùliŋkì, án làá ŋá-si fòooo.
22Pīlifiǹ-mi, m-jipɔɔn,
taa kpèè m-bɔti fám.
Fool boonee, a làá dāá
gbìl̄ m-nyɔɔbuŋŋi taapu.
Tin kamaa ní a ŋáańee,
á taa pée lákatí mara pu.
Mimmee a kpá kí būŋkì.
23Unil yaa ŋá diinakpaan ki fōō binibee,
báà ŋma sòoǹ ki pàkà-u ní.
An di dàkà yii udaan lafun sá ulaŋŋaŋfiti.
24Ama unil yaa ŋá diina ki fōō binib
ní ki ŋmāntì tijin ki tīī-bee,
báà ŋma làá nīn sòoǹ u-pu kitiŋin ní.
An di dàkà yii u lafun sá ukummunti.
Ndaam bɔti
(Kpèè Yees 5.22, Ilan 104, Alaŋ 20.1, Uciŋ 10.19)
25Baa nyù ndaam kí dàkà tininjati,
di sá yii mì yāntì binib tikpil bíil̀.
26Ŋŋmi yàntī bí béé
tikúti pɔŋŋu nín sá puee.
Míǹ mbaantiim ní ndaam yàntī bí béé
bilambidambi bin bíi jáàyee
nín sá anicil ŋiŋyee.
27Binib ceeyee, ndaam sá kii dimaŋfalee ní
ŋyunti ŋun bi yaa nyùn̄-mì ki ŋmāntèe.
Ndaam yaa kpá, binib ŋūǹ kí nīn báaa?
Di sá yii Unimbɔti náań-mì
unil ń nīn nyù ki fàal̀ ní.
28Unil yaa nyùn̄ ndaam ki ŋmāntì
nì ŋyunti ŋun an máaǹee,
mì tìì-u dipɔɔsɔŋkil nì dipɔɔpindi ní.
29Ama unil yaa nyùn̄ ndaam ki lákatì u-ba puee,
mì tìì-u ntuntun, ki nyàatī-u
ní ki yàntī u còom̄ ki kpìntī.
30Ugbaan yaa gbí ndaamee,
an lùkutī u-ŋuul ní ki kɔ̄ntí-u agìńni.
U-pɔŋŋu bàtī ní an yàntī bí gbá-u aŋaŋkul#31.30 B. 29-30: dūú ŋmàntī nì Alaŋ 23.29-35..
31Bi yaa yíiń-ni diina
ní ndaam bí binib nyùee,
á taa wòoǹ a-juti ŋyunti ŋun an nyāatì-uee.
Taa sòoǹ-u tibɔti tin làá wà-uee,
kí taa bàlifì-u dipɔndi din u cáá-see.
Currently Selected:
Siracide 31: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.