Siracide 30
30
Mbiyaamu dàkal
(Kpèè 7.23, Alaŋ 13.24)
1Unil un néeń u-jipɔɔnee
kaa tàantí-u dinaalabil.
Boonee u-jipɔɔn gbanti di làá dāá sɔ̀ŋkì u-pɔbil#30.1 Dūú ŋmàntī nì 22.6, Eef 6.4..
2Un yaa dàkā u-jipɔɔn tiŋanee
pɔbil làá dāá nīn sɔ̀m̀ u-pu ní.
U yaa láa bí bin u nyée kansikinee,
u dāa kíǹ ki mɔ̀ɔǹ u-pu ní.
3Un yaa dàkā u-jipɔɔn tiŋanee
làá kɔ́ǹ u-nannanliibi ipoompoon,
ní u làá nīn fàal̀ u-bɔɔbi nimbiin#30.3 Dūú ŋmàntī nì Alaŋ 23.24-25..
4Ubaati gbanti yaa kpíìyee,
án làá nīn bí kii waa kpíìyee ní.
Di sá yii u síiǹ unil un náań nì uee u-boon.
5U nín bí dimaŋfalinee,
an nìn mɔ̄ǹ-u ú wāl̀ u-jipɔɔn.
Ŋyunti nín bàn̄ ú kpúee,
an kaa wùn̄-u báà fiii.
6Di sá yii u cáá un làá dāá tɔ̀ u-nannanliibi ipɔntoonee,
nì un làá dāá téeǹ u-bɔɔbi tiŋan tin bi ŋá-uee#30.6 Dūú ŋmàntī nì 1 Bib 2.5-9, Room 12.19..
7Ubaati un di bíiĺ u-jipɔɔnee
làá dāá nyīī u-buuŋyi.
Ŋyunti ŋun kamaa u yaa láa pée fáá mbiilee,
án làá kɔ́ ubaatee ní fíŋfiŋfiŋ.
8Utaamu un baa yāntì u mántì dikpàldee
kpántí utaŋwaati ní,
míǹ ní kibiki kin baa dàkā tiŋanee
dāa kpántí dikpiisi.
9A yaa sɔ̀kɔl̄ a-bikee,
kì làá dāá ŋá tin làá kɔ́ǹ-si atulimee ní.
Si nì kì yaa kpáfí ki gbíiĺee,
kì làá dāá yàntī á sɔ̄.
10A yaa kaa là si nì kì ń kpāfì kí jī falaayee,
si nì kì ń taa kpāfì kí lā.
Yaa sá fám a làá dāá ŋmɔ́ a-ŋambiyaamu.
11Taa tīī-kì dibatɔl ŋyunti ŋun kì dáá pɔ̀ɔǹee.
12Yàntī mbambaan ń bà-kì tiŋan
ŋyunti ŋun kì dáá sá kibikee.
Yaa sá fám, kì làá dāá kpántí dikpiisi
ní kaa ti làá nīn tɔ́-si.
13An puee pɔ́ɔǹ a-ba kí dàkà a-jipɔɔn tiŋan.
Mimmee, u-bimbikpitim kaa dāa kɔ̄ntí-si icoo.
Ŋgbampɔn bɔti
14An sɔ́ á nīn sá usoodaan
ama ki cáá ŋgbampɔn ki pɔ̄ɔ̄,
ki jítiǹ á nīn sá ugaaja kaa cáá ŋgbampɔn.
15An sɔ́ á nīn cáá ŋgbampɔn ki pɔ̄ɔ̄
ki jítiǹ á nīn cáá duulinya sindaariyau kɔkɔ.
Ŋgbampɔn sɔ́ǹ tigaajakpaandi.
16Tigaajati tiba kpá bí dūú ŋmàntī nì ŋgbampɔn,
ní nnaam miba kpá bí dūú ŋmàntī nì dipɔɔpindi.
17Ŋkúm sɔ́ǹ falaa maŋfal,
ní talku ŋuŋfil sɔ́ǹ iween in kaa dóotée#30.17 Dūú ŋmàntī nì 41.2, Yoob 3.20-22, Uciŋ 4.1-3, 2 Kɔra 12.9..
18Tijimmɔntiil tin bi cáań ki yóoǹ
ubunli un nyiŋŋi sáĺee,
bí kii tijin tin bi ŋá ki tɔ́kɔǹ dikaakul puee ní.
19Saraa jinti tin bi ŋáań ki tìì diwaalee kèetī ba?
Di sá yii diwaal kaa jīǹ tijinaaa, kaa gbìl̀ nnunnu mun.
Míǹ ní an sá ki tīī ubunli un
ti-Dindaan yāntì u dɔ̄ ki sàantée.
20U kpèé tijin gbanti cɔ̀ɔɔ ki fátí diniindi
kii ufaal nín kpàl̄ usapɔɔn ki fátí diniindi puee ní.
Jà kunimbaau kí wàatī a-ba
(Kpèè Uciŋ 11.9-10)
21Taa yàntī kunimbaau ń jī a-pu dinyandi,
kí taa yàntī ilandɔkɔkpiti ń jī a-ni mpaan.
22Dipɔɔpindi di yì unil maŋfal,
mmɔn di fɔ̀kɔntí unil maŋfal.
23Yàntī án nīn mɔ̄ǹ-si,
kí tīī a-ba dipɔɔsɔŋkil.
Jà kunimbaau kí wàatī a-ba.
Di sá yii kunimbaau
nāaǹ binib tikpil,
kuaa cáá ipaati.
24Nnimbitaataam nì diŋuul bàtī
unil maŋfal wiiŋyi pu,
ní ilandɔkɔ yàntī unil ń púĺ malaa.
25Unil yaa bí dipɔɔpindinee,
tijin mɔ̄ dijil ní.
U gbìl̀ tijin tin u jīǹee mɔŋŋu ní.
Currently Selected:
Siracide 30: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.