Siracide 29
29
Á pìnnì unil tiwanee kaa sá tikpitil
1Un pīnnì u-nabiki tiwanee ŋá-u tiniti ní.
Un tútúǹ u-nabikee nóó Unimbɔti marab ní#29.1 Dūú ŋmàntī nì Disa 22.25, Akoo 25.35-38..
2Pìnnì a-nabiki tin u nyàab̀ee.
Si muee, bi yaa pīnnì-si tiwanee,
á téeǹ ŋyunti ŋun ní a síiǹ yii a làá téeǹee#29.2 Dūú ŋmàntī nì Ilan 37.21,26, 112.5..
3A yaa sòon̄ yii a làá ŋá puee,
ŋá min ní binib làá nīn máká a-puee.
Mimmee, ŋyunti ŋun kamaa a yaa láa nyàab̀ tibee,
a làá ká kudɔŋu.
4Binib tikpil dàkafī yii tiwampinnikaal sá tiwampiikaal ní
ní ki yàntī agìń kóò bin pīnnì-bi an wantee.
5Kí wàatī ú pìnnì u-juti cee animbilee,
u sɔ̀kɔl̄-u ní ki sòoǹ nì u kinyɔɔmɔɔi u-gaajati pu.
Ama ŋyunti yaa bàn̄ ú téeǹee,
ní u cáa nákà.
U sòoǹ ní ki yáliŋkí ŋma,
ní ki cáa tūntí tibɔti tin jítì jítì u-puee pu.
6Báà u yaa làá pà animbil ŋin bi pīnnì-uee,
un pīnnì-uee yaa ká dijandee,
mimmee u ká diyimɔɔl dee.
Yaa sá fám, bi fúkúl̀ u-gaajati,
ní ki gíti ká unannanli ki kútì kaa ŋá tiba.
Mbusu nì asiibil ní bi làá dūú téeǹ-u.
An nín bàà sá ú tīī-u tinyoolee, ní u kíǹ ki kpèé-u fám.
7An pu ní binib tikpil yíití kaa pìntí binib tiwan.
An kaa sá yii bidambi ŋáań ntoom,
ama bidambi fàŋkí yii bí taa fūkul̀-bi fám ní.
Á pɔ̄ bisoodambee cáá ipaati ní
8Ama á nīn cáá kimɔtii biwɔfib pu.
Taa yàntī bí cīití tikpil
kí wàatī ní á nín pɔ̄-bi tiba.
9Kí nīn tɔ́ Unimbɔti marauee,
á tūtuǹ bisoodambi.
An páb́-bi ní, an puee
á taa yàntī bí gítí iŋaŋkulim#29.9 Dūú ŋmàntī nì Ditee 15.7-11..
10Kíí kí fá animbil kinabiki àá ubɔɔti pu.
Míǹ sɔ́ǹ á yàntī ŋí dòon̄ ditaŋkpal diba taapu kí dāmintì.
11Dū a-gaajati kí ŋá kii Yilpu Fɔ́ŋŋŋ Nimbɔtiu
nín tīī-si mara á ŋá puee.
Niinee tì làá kèetī-si kí jītíǹ sindaariya#29.11 B. 10-11: dūú ŋmàntī nì Maat 6.20, Yaku 5.3..
12Tiŋan tin a làá ŋá biwɔfibee
ń nīn sá-si tigaajawan á dūú kpāafì.
Fool boonee, tíǹ di làá dāá fīī-si dinimbinaamandin#29.12 Dūú ŋmàntī nì Toob 4.9, 12.8..
13Tì làá dāá jáǹ a-nannanliu kí tīī-si,
kí jītíǹ digbampɔɔl din pɔ̄ɔ̄yee,
àá kikpaŋ kin nyìm̀ee.
Bin yūlifí bi-jutiibi boonee
(Kpèè 8.13, Alaŋ 6.1-5)
14Unimɔnti kíikí kí yūĺ u-juti boon kí pà u-pɔndi,
ama un di kaa cáá icooyee làá fá-u.
15Unil yaa yúl̀ a-boon a jíń dipɔndee,
á taa súntí tiŋan tin u ŋá-see pu.
Di sá yii sii puee waa mɔ́tì u-ba pu.
16Ukpitiŋal di bíiĺ un yúl̀ u-boon ki pàn̄ u-pɔndee gaajawanti.
17Unil un kaa nyí tiŋanee
fàtī u-boon kí tīī un fīī-uee ní.
18Kí yūĺ unil boon yii a làá pà u-pɔndee
nāaǹ bibulcinnib tikpil.
An cīŋkì-bi kii tiŋku nyiŋgbantee.
An yāntì bipɔɔbi yíkì bi-timmu,
ki tú ki yìiǹ ki póotí nnicantimu.
19Ukpitiŋal un an júkufí ú yūĺ u-juti boon kí pà u-pɔndee
nyàab̀ kí ká ipaati poon ní,
ní bi làá sòoǹ kí kpɔ̀ u-bɔti.
20Tūtuǹ a-juti kí nóó nì a-pɔŋŋu nyɔkɔm,
ama á nīn nyí nì a-ba kí taa lítí.
Unil máaǹ kí nīn bí u-ba pu ní
21Kí nīn bí dimaŋfalinee,
tin unil máaǹ kí nīn cááyee
di sá nnyim nì tijin nì tiwampeeŋkaal,
nì kudii kí nīn kóò.
22An sɔ́ á nīn bí falaa poon ki kóò sii a-ba diiŋŋin
ki jítiǹ á nīn jīǹ tijimmɔntiil ubɔ dumpu.
23A yaa cáá tiwan fiiiyaaa,
a yaa cáá tikpilaaa,
án nīn mɔ̄ǹ-si tin a cááyee pu.
Mimmee ubɔ kaa ti yíì-si uniyaŋyan#29.23 Dūú ŋmàntī nì Luuki 3.14, Fiil 4.11, Eebru 13.5..
24Tiba kaa gbí inimɔɔn ki bàn̄ á nīn yìiǹ ki póotí acin.
Aa ŋūǹ kí wàan̄ kinyɔkɔ ní kaa nín sòon̄,
kun puee a sá unicaan.
25A làá yàkatī tijikaal nì tinyɔkaal kí tīī binib,
ama báà ubɔ kaa làá jāam̀-si yii si nì ditundi.
Kí kūtèe, a làá gbìl̄ bi bí ki sòoǹ-si kpeefam bɔti.
26«Unicaanee, dāá síiń tijin!
A yaa cáá tiba, á tīī-mi ḿ jī.
27Unicaan, nyā kí pɔ̄ unikpaan ubɔ mpaan!
M-nabiki kiba làá dāan̄,
an puee m nyàab̀ kudii kun poon a bée.»
28A yaa sá ulandɔkɔdaanee,
tiba kaa wù ki bàn̄ bí yíiń-si unicaan
àá a-pɔnliu ń sìì-si.
Currently Selected:
Siracide 29: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.