Siracide 26
26
Uninja un cáá unimpumɔntee naam
(Kpèè B. 13-18, 7.19, 36.26-30, Alaŋ 18.22, Diny 2.18)
1Uninja un cáá unimpumɔntee bí mmɔnneeee!
Udaan maŋfal wiiŋyi làá bùtī mili pu.
2Unimpu un cáá dipɔbilee
tìì u-cal dipɔɔpindi ní.
U-cal pɔbil làá nīn pée sɔ̀m̀ ní
u-maŋfal wiiŋyi kɔkɔ poon.
3Uninja un cáá unimpumɔntee ká diyimɔɔl ní.
Udaan fōō tiŋan tin ní ti-Dindaan tìì bin fàŋkí-uee ní.
4Udaan yaa sá usoodaanaaa, ugaajaaa,
u pée bí dipɔɔpindin ní.
Ŋyunti kamaayee an pée mɔ̄ǹ-u ní.
Nín̄ nyí nì a-ba nì binimpoobi
5Tiwan tita di máfí m-pɔbil,
ama kunanaatiiu kúǹ fàantí-mi ní.
Tíǹ di sá binib nín máafí tinyimɔmbɔti kitiŋin puee,
nì binib nín kōontí kí múkúǹ dicilpu puee,
nì binib nín tūntí bi-jutiibi abɔgaan puee.
Tíǹ gbanti kɔkɔ pɔ̄ɔ̄ ki jítiǹ ŋkúm pu.
6Ama tiba kaa cáá dipɔɔbiildi ki gbí falaa
ki bàn̄ unimpu un ŋáań u-juti ipoompoonee.
U yìiǹ an kɔkɔ pu ní ki cāab̀ asambii#26.6 Dūú ŋmàntī nì Yaku 3.2-10..
7Unimpukpiti sá kii inaa in baa kpàl̄ tiŋanee ní.
Kí kpòotī-uee sá kii á cúú unoomee ní.
8Unimpu un yaa nyù ndaam tikpilee
gífí diŋuul ŋkpitim pu ní.
Waa ŋūǹ ki bāal̀ u-cooi pu.
9Kinimpulaakpaai nín kpèé bininjab puee
di yàntī bí béé-u#26.9 Dūú ŋmàntī nì Alaŋ 6.25..
U nín kpèé ki kábití puee di yàntī á béé-u.
10A-bisal yaa kaa ŋūǹ kí cúú u-bee,
á mɔ̀tīí cīití-u tiŋan.
Yaa sá fám u yaa pée ká mpaan fiiiyee,
u ká nnaakpal dee kí nyā.
11Nín̄ nyí nì a-ba u nín kpèé bininjab
an kaa ti cáá-u icoo puee,
ní u yaa mɔ́ntì-si, án taa ŋá-si bitii.
12Kii usaŋkinli un nnyinnyoo cááyee
nín wàantí u-nyɔkɔ kí nyɔ̀ nnyim
min u yaa péé ki kée puee,
u bɔ́ntì kí kàl̄ dikaakpal kamaa taapu
ki cí kí dū u-ba kí tīī unipeepeekaa un làá dāan̄ee.
Unimpumɔnti pampakaku
(Kpèè B. 1-4, Alaŋ 31.10-31, 14.1)
13Unimpu nyaaŋku di tìì u-cal mmɔn,
ní u-yábitam di yàntī u-cal cáá ŋgbampɔn.
14Unimpu un kaa sòoǹ tikpilee
sá ti-Dindaan wampɔkaati ní.
Un di fōō didàkamɔntiilee kaa cáá juti.
15Unimpu un sīntì u-ba taapuee
nyaaŋku kaa cáá juti.
Tiba nì tiba kaa bàn̄ un di ŋūǹ ki ŋúb̀ u-bee#26.15 Dūú ŋmàntī nì 1 Tiim 2.9-10..
16Unimpunyaan un di bɔ́ntí u-diikuee
bí kii ŋwìiń nín nyēeń pu ki jɔ́ḿee ní.
17Kii fitila un tɔ́kɔ́ circir tɔ́kɔŋkaati#26.17 circir tɔ́kɔŋkaati: kpèè Disa 25.31-39, 1 Maar 1.21, dūú ŋmàntī nì Slaŋ 5.15. puee nín ŋmíntí puee,
míǹ ní nnimbiin ŋun ŋān̄ee bí tiwunnyaandi pu.
18Kii sindaariya jaantalkub bin tɔ́kɔ́
animbil kúti tílkaati puee nín bí miŋyee,
míǹ ní ataa ŋin ŋān̄ee tɔ́kɔ́ atagbin ŋin pɔ̄ɔ̄yee pu#26.18 B. 20-21: dūú ŋmàntī nì Ilan 128.3..
Tiwan tita tin bɔti páb̀ unilee
28Tiwan tili di bí ki páb̀ m-pɔbil,
ama kutataatiiu kúǹ gbítí m-ŋuul ní.
Tíǹ di sá ubaatandaan un kpántì unandaanee,
nì binyiliibi bin bi dūu fá ki kpèé fámee,
nì unil un fá deedee saŋŋu ki kíǹ ki ŋáań ikpitee.
Ti-Dindaan làá yàntī kitàataajiki nín kpɔ̀-u.
Ikpiti in unyampu kaa ŋūǹ kí lóotée
29An pɔ̄ɔ̄ uwannyafil ń taa mùul̀ kí ŋá ikpiti,
ní ki pɔ̄ɔ̄ unyampu mun ń taa kɔ́ ikpitin.
Currently Selected:
Siracide 26: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.