Siracide 27
27
1Binib tikpil ŋá ikpiti bi nín là kí ká ipaati tikpilee pu.
Unil un là kí kpántí ugaajee kaa cáá disaasɔl#27.1Dūú ŋmàntī nì 31.5, Alaŋ 28.20..
2Kii dikpakpaal nín kóò ataŋkpee
ali ŋin nákáǹ tɔbee kansikin puee,
míǹ ní ikpiti sākantí uwannyafil nì uwandal kansikin.
3Unil un di kaa fàŋkí ti-Dindaan nì u-pɔbil kɔkɔee,
u-dicaŋku kaa làá sūŋkì ní kí nàan̄.
Tin unil sòoǹee di dàkà dinicil din u sée
4A yaa jáká tiwan kidicaayinee,
tin kaa ŋān̄ee di kīntí.
Míǹ ní unil yaa kíĺ ki bíi sòoǹee
ní a kāntí u-yìntitam.
5Kii bi nín pūul̀ ditansambil
kí nín béé di-nyaaŋkuee,
míǹ ní unil bɔsooŋyi poon
ní bi béetí dinicil din u sée#27.5Dūú ŋmàntī nì 5.13, Maat 12.33-37..
6Disubil di dàkà min ní bi cóoǹ busubu ki ŋáŋkì-buee,
míǹ ní unil bɔsooŋyi di dàkà tin kā u-pɔbilin u dàkafēe#27.6Dūú ŋmàntī nì Maat 7.16..
7Unil yaa kaa láá sòon̄, á taa pàkà-u,
di sá yii isoon poon ní a làá béé dinicil din u sée.
Ipaati in iciin bimbim cááyee
8A yaa nyàab̀ kí ŋá tin bí deedeeyee,
a làá ŋmā kí ŋá míǹ,
a làá dūú pèen̄ kii dibɔkutinyaandee ní#27.8Dūú ŋmàntī nì Room 9.31..
9Inoon in pēēyee
di kpáfí ki kóò dicilpu.
Míǹ mbaantiim ibaamɔn
nì ibaamɔndaan di kpáfí.
10Kii gbikinti nín nyàab̀ upeel ki cúú kí ŋmɔ́ puee,
míǹ ní ikpiti cɔ́ŋkí ki nyàab̀ bikpitiŋaliibi#27.10Dūú ŋmàntī nì Diny 4.7, 1 Peet 5.8..
11Unil un nóó Unimbɔtee sòoǹ iciin bɔti ní,
ama ugbaan úǹ pée kpántí kii uŋmalee ní.
12Á taa nín kàal̀ bigbaambi cee ki yúntí,
ama a ŋūǹ kí kàl̄ biciŋfitiibi cee kí yúntí.
13Bigbaambi sooŋyi gbítí diŋuul ní,
ama ikpiti bɔti di mɔ̄ǹ-bi disoondi ní bi lāā.
14Binib bin néeń ki pùtī múlmulee
nyɔɔbuŋŋi sá ntimbiil ní.
An nibee yaa tin bíi kpákèe,
see á ŋéeb́ a-tafaliŋ.
15Bilambidambi yaa jáàyee, fatiku nyēē ní,
bi yaa bíi sìí tɔbee, an kaa mɔ̄ dipilifil.
Á taa nín̄ bìitī a-juti bɔɔŋŋi pu
16Unil un bìitī abɔɔn puee
bíiĺ dimákal din bi cáá u-puee ní,
u pée gíti kpá kí ká bɔɔ#27.16Dūú ŋmàntī nì 8.17, 19.8-9, 22.22, Alaŋ 11.13, 20.19, 25.9..
17Nín̄ néeń a-bɔɔ kí nīn cáá u-pu dimákal.
Ama a yaa bīitì u-bɔɔŋŋi puee,
á taa nín gíti bìǹ ki nyàab̀ u-bɔɔtiiku.
18Tiŋman, u-bɔɔtiiku wáŋkì a-cee
kii unil nabiki di yaa kpíì kì wáŋkì u-cee puee ní.
19Kii kinɔmbiki yaa ŋmátì ki nyáń a-ŋaan,
kì nín yíkí kí ŋàaǹ puee,
míǹ ní a yaa yāntì a-bɔɔ ŋmátì ki nyáń a-ŋaanee,
aa ti pée kāntí-u.
20Taa ti nyàab̀ yii a làá jà kí cúú-u,
kun puee úǹ pée sáǹ ki kɔ́ ndan.
U sáǹ kii kipeewuŋ nín ŋmátí kí nyā kutaliŋŋun puee ní.
21Bi ŋūǹ kí cáaǹ tiweendi,
ki ŋūǹ kí sìì tɔb kí fàtīí mɔ̄ɔkì.
Ama un yaa bīitì abɔɔn puee
kaa ti cáá dimákal diba.
Mpɔnnyoon
22Un di dàab̀ binibee bíi bɔ́ntí kí ŋá tin kaa ŋān̄ee dee.
A yaa tú-u nsannee, á kàkatī a-ba kí wàatī-u#27.22Dūú ŋmàntī nì Alaŋ 6.13-14..
23U yaa bí a-ceeyee ní u-nyɔkɔ mɔ́ málmal,
ní a yaa sòon̄ tibee ní u pàkà-si.
Ama a-boonee ní ú kpántí isoon,
ní kí dū sisi a-ba nyɔɔbuŋŋi pu
kí kɔ́ǹ-si agìńni.
24Tiwan tikpil bí duulinyan m ná-tì,
cilinjee unil un bí kii mimmee.
Ti-Dindaan mun nimbil kaa là kí wāl̀ an niliu.
25A yaa tɔ́ ditaŋkpal kutaayee,
sisi a-ba yil ní dì làá gítiń kí yā.
A yaa mɔ́ntì ki tīiǹ a-juti kunantaŋŋuee,
bi làá tìin̄ si mun kunantaŋŋu ní.
26A yaa gbìn̄ dibɔbilee,
sisi a-ba di làá lítí poon.
A yaa píĺ kutaliŋŋuee,
sisi a-ba ní ku làá sàl̄#27.26Dūú ŋmàntī nì 12.16, Ilan 7.16-17, Alaŋ 28.10, Uciŋ 10.8..
27Unil yaa ŋá ikpitee,
i làá fàtīí gítiń u-pu ní,
waa làá béé an nín làá dīń pu kí bàń-uee.
28Bilambidambi di néeń
ki bèel̄ binib ki sìí-bi.
Ama ipɔntoon náká ki cí-bi
kii gbikinti nín nākantí pu ki cīití upeel puee ní.
29Kutaliŋŋu làá sàl̄ binib bin fàal̀ bin yú
nì ti-Dindaan deedee naabuŋu puee.
Falaa di làá bà-bi kí wàatī bí nín kpú.
Nín cáá tin a-juti yīntiǹ-see ki pūǹ-u
30Kudɔ̀ŋu nì diŋuul sá tiwan tin kaa ŋān̄ee ní.
Unikpiti nyí tiwan gbanti tiŋan.
Currently Selected:
Siracide 27: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.