Siracide 25
25
Tiwammɔntiil tita nì tiwaŋkpitil tita
1Tiwan tita di bí ní ki baasii fáatì m-pɔbil tikpil,
ki ŋān̄ ti-Dindaan nì binib cee.
Tíǹ di sá yii nnabiyaamu ń nīn gbìliǹ tɔb tiŋan,
kubɔɔtiiu ń nīn bí binib bin kóò ki pìl̄ee kansikin,
nnyim ń taa nín̄ jītí unimpu nì u-cal kansikin.
2Anicil ata di bí m-nimbil kaa là kí wāl̀,
ní bi-bimbim kɔ̄ntí-mi diŋuul tikpilku.
An nibee di sá ufalaadaan un cáá dilambilee,
ugaaja un di mɔ́ntí inyimɔnee,
nì utikpil un lóò dinyil ki ŋáań tilaakpaalee.
Ipaati in ní titikpiti tììyee
3A yaa kaa kpáafì tiba ki síiǹ a-pɔntin,
mana ní a làá dāá ká tiba a-tikpitin?
4Bin yikpiti píil̀ee di ŋūǹ kí sòoǹ tibɔti ti-pú,
ní bitikpilib di baasii ŋūǹ kí tīī isaŋkimɔnti.
Ba gíti ŋān̄ kii míǹ!
5Bitikpilib cee ní iciin bí,
ní ilandɔkɔ nì isaŋki bí binikpaambi cee.
6Bitikpilib beefuuliiki di sá dinyil din bi cááyee,
ní bi-nyooti sá bi nín fàŋkí ti-Dindaanee.
Nnaam min jítiǹ min kíǹee kɔkɔee
7Tiwan tiwa di bí ní man dàkafī yii tì tìì nnaam,
ní m ŋūǹ kí tùkù-ni kun sá kusaalaatiiuee.
Un bí mmɔnnee di sá un pɔbil sɔ̀m̀ u-biyaamu puee,
nì un kāl̀ kitiŋ pu ki yúntì ki ká u-nannanliibi lítitamee.
8Un bí mmɔnnee di sá un nimpuu cáá dinyilee#25.8 Dūú ŋmàntī nì Alaŋ 26.1-4.,
nì un limbil kaa yāntì u yīntèe,
nì un kaa tūǹ ditundi ki tìì un u kpíǹee.
9Un bí mmɔnnee di sá un di ká nlandɔkɔmɔntee,
nì un di sòoǹ ní binib pílifíǹ-uee.
10Un di ká Iciinee lafun sá ukpaan,
ama ubɔ kaa jítiǹ un di fàŋkí ti-Dindaanee#25.10 Dūú ŋmàntī nì 10.24, Uciŋ 12.13..
11Kí fàŋkì ti-Dindaan di jítiǹ tikɔkɔ.
Ŋma ní bi ŋūǹ kí dū un fàŋkí ti-Dindaanee kí ŋmàntīǹ#25.11 Dūú ŋmàntī nì Alaŋ 1.7, Siira 1.14, 40.26-27.?
Unimpukpiti bɔti
(Kpèè 9.1-9)
13Tiweendi tiba kaa bí ki bàn̄ dipɔbilin yati,
ní ntoom miba kaa bí ki bàn̄ unimpu toom.
14Nnaabu ŋubɔ kaa bí ki bàn̄ kináŋ nín cāabìń ŋuŋyee.
Ipɔntoon iba kaa bí ki bàn̄ unannanli pɔntooŋyi.
15Tilool tiba kaa bí ki bàn̄ ukoobu yati,
ní diŋuul diba mun kaa bí ki bàn̄ unimpu yal.
16An sɔ́ man nì gbikinti àá kukoobiliŋŋu ń nīn kóò
ki jítiǹ man nì unimpukpiti ń nīn kóò#25.16 Dūú ŋmàntī nì Alaŋ 21.9,19, 25.24, 27.15..
17Unimpu toom yàntī u-nimbiin ń cúú kpántí mbamin.
Ŋyunti gbantee, u-nimbiin dūú bɔ̀ntī
ní u kíǹ ki náań nì digbiŋgbil.
18U-cal cáà u-kɔŋkɔnnaatɔb cee ki jīǹ,
ní ki bí ki yáliŋkí, min kamaa waa bàà là mimmee.
19Digìńdi diba kaa bí bí dūú ŋmàntīǹ din unimpu tììyee.
An nimpuuee ń fōō binikpitib tafadaaldi.
20Kii ujaŋkpil yaa bíi dàb̀ kigbantaŋ
kin cáá dibulee an bí puee,
míǹ ní an sá ki tīī uninja un bí soooo
ní ki cáá unimpu un sòoǹ tikpilee.
21Taa yàntī unimpu nyaaŋku ń dáaĺ-si,
kí taa nín̄ néeń-u u-píjati pu.
22Unimpu yaa kpèé uninjee,
an cāabìń diŋuul nì iwoon nì icoo ní.
23Unimpukpiti tuuŋŋi di sá diwuŋyɔtil
nì nnimbiin dibiildi nì dipɔɔbiildi.
Unimpu un kaa tìì u-cal dipɔɔsɔŋkilee tuuŋŋi di sá
iŋal in kaa ti cáá mpɔnee nì atabiŋyil ŋin kpíìyee.
24Unimpu di sá ikpiti nyeel,
úǹ pu ní ti-kɔkɔ kíǹ ki kúù#25.24 Dūú ŋmàntī nì Diny 3.3,6, 1 Tiim 2.14..
25Á taa yàntī nnyim min kā a-lɔŋkunee ń lùntì kí fá,
kí taa yàntī unimpu un cáá ntoomee ń nīn tɔ́ u-ba ki sòoǹ.
26U yaa kaa làá kíí kí ŋá a nín lī puee,
á jà-u ní yàkatī tɔbin#25.26 Dūú ŋmàntī nì Ditee 24.1, Maat 19.3-9..
Currently Selected:
Siracide 25: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.