Siracide 24
24
DIDÀKAL BƆTI DIJANTATAATIIL
Iciin nyɔŋkii
1Iciin bí ki nyɔ́ŋkí i-ba,
i bí i-nibul kansikin ki dàkà i-ba.
2I wāaǹ kinyɔkɔ ki sòon̄ Yilpu Fɔ́ŋŋŋ Nimbɔtiu samaau poon,
ki bí ki gà i-bindi u-pɔŋŋu nimbiin.
3I bí ki lì yii: «M nyáń Yilpu Fɔ́ŋŋŋ Nimbɔtiu nyɔkɔn,
ní ki bīiǹ kitiŋ kɔkɔ pu kii dipɔ̀ńdee.
4M-kɔŋkooŋŋu nìn bíń yilpu fɔ́ŋŋŋ,
ní m-beejal nìn tɔ́kɔ́ ditagbancancaal pu.
5M-baba ní m cōom̀ ki māntìi tú kutagbɔŋu kɔkɔ,
ní ki cōom̀ ki sīntì doooo tiŋku taapu taapu.
6M jíń dibeel tiŋku nyiŋgbanti
nì kitiŋ kɔkɔ pu,
ki jíń dibeel anibul nì atimbun kɔkɔ pu.
7Bi-kɔ ceeyee, m nyàab̄ laakin ní m làá kàl̄ee,
m nyàab̄ ditinjandi din pu ní m làá nīn kóòyee.
8Niinee ní duulinya kɔkɔ náanliu tīī-mi mara,
úǹ un náań-mee dàkā-mi laakin m làá nīn kóòyee.
U tùkū-mi yii: <Nín̄ kóò Jaakɔb naantiibi kansikin,
fōō a-fakal Isirayeel tiŋkin.>
9Kí wàatī duulinya ń nīn bée,
kí wàatī tiwan kɔkɔ ń kíĺee,
u nìn náań-mi ní m làá nīn bí,
m làá nīn bí kí nīn cá jaanjaan.
10M nìn bí circir kɔŋkooŋŋun
ní ki nìn tūǹ u-tundi u-nimbiin.
Míǹ ní m dāa kāl̀ Siiyɔn jool pu.
11Úǹ di kāaǹ-mi kitinneeŋkaai poon,
ní ki yāntì m jíń dibeel Jeerusaleem tiŋki pu.
12M báaǹ inyaan dinibul din cáá tinyoolee kansikin,
ti-Dindaan tiŋki di kíǹ ki sá m-fakal.
13Niin ní m wíiǹ kii Leebanɔn tiŋkin subu bun bi yíì seediree,
kii siipreesi subu bun yú Eermɔn jool yilpuee.
14M wíiǹ kii ibafi in yú Eeni-Geedii buŋŋu caŋinee,
kii looriyee subiyaamu mun bí Jeeriikoo tiŋkinee,
kii ɔliifi sunyaambu bun sí kitiŋ kin tèen̄ee puee,
kii plataani subuee.
15M nìn yāntì m-sɔnsɔfiŋu gbītì kii
kiinamɔn nì talaalub bin kíǹeeyee,
kii miiri un sá talaalumɔmmɔntee,
kii galbanum nì ooniikisi nì siitakiti talaalubee,
àá kii talaalutuukaa nyiim nín yíkí circir kɔŋkooŋŋun puee.
16M tāntì m-paŋŋi kii teereebinti subuee,
m-paŋŋi ŋin di cáá kunyaaŋŋu nì tinyoolee.
17M tɔ́ mpambiyaamu nnyaammu kii fiinyi subuee,
ní m-pumpukum lòon̄ tinyool nì tigaajati subiliŋ.
19«Dāam̄maan m-cee, nimbi bin fáatì m-bɔtee,
ní dāan̄ kí ŋmɔ́ m-subiliŋ ŋin m tīī-nee kí díkí.
20Di sá yii kí nīn dàkafī m-puee mɔ̄ ki jítiǹ tisiil,
ní kí nīn cáá-mee mɔ̄ ki jítiǹ disigbandi.
21Bin di yaa ŋmɔ́-mee, ŋkùm làá gíti cúú-bi,
ní bin yaa nyùn̄-mee, nnyinnyoo làá gíti cúú-bi.
22Un di yaa pílifíǹ-mee, icoo kaa làá cúú-u,
ní bin tūǹ ditundi nì mee kpá ki làá yìntī.»
Iciin nì Unimbɔti marau
23Tin bí nee kɔkɔ kā Yilpu Fɔ́ŋŋŋ Nimbɔtiu
poondi gbɔŋkun ní.
An sá Mara un ní Mooyiisi nìn tīī-ti tí nīn nóóyee.
U nìn tīī án nīn sá Jaakɔb naantiibi fakal ní.
25Mara gbanti di yàntī ní Iciin ń gbí kii Piisɔn mɔɔlee,
àá kii Tiigiri mɔɔl nín gbéè pu kuseeu yuntiŋuee.
26Úǹ di yàntī ní dinyil ń gbí kii Eefiraati mɔɔkpaandee,
àá kii Jɔɔdan buŋŋu ŋyunti ŋun bi cēē tikpaajinee.
27Úǹ di kpáatí didàkal ki sìtī an kɔkɔ pu kii Niil mɔɔnyimee,
àá kii Giiwɔn buŋŋu ŋyunti ŋun bi kìtī fiinyi subiliŋee.
28Unipeekaa kaa láá ŋúń ki béè-i,
míǹ ní unijoolkaa mun kpá kí gbìl̄ i-taapu.
29Di sá yii Iciin landɔkɔi wāā ki jítiǹ tiŋkukpaan,
ní i-saŋkii nyóò ki jítiǹ tiŋkukpaan taapu taapu.
30Mamee, m nìn sá kii dimɔɔl buntaalee ní,
kii kunyiŋfuŋu kun pùub̀ ki kóò bukpaa bubɔnee ní.
31M nìn lī m-ban yii: «M làá yàaǹ m-kpaabiliiki nnyim,
m làá yàaǹ adan ŋin ní m kùn̄ ki cóoǹ tiwanee nnyim.»
Ama ní m-nyinsaŋŋuee dūu kpántì dimɔɔl,
ní m-mɔɔlee mun dūu kpántì tiŋku.
32M làá yàntī m-dàkal ń ŋmíntí kii kutaawuntuŋuee,
ní kí yàntī di-walifiŋu ń ŋmíntí kí bà ndandati.
33M làá tí dū m-dàkal kí yàaǹ kii Unimbɔti bɔnaatiliu bɔtee,
ní kí dū-dì kí tīī anaantitɔntɔkɔ ŋin bí ki dòoń boonee.
34Ni káaa, an kaa sá man baba pu ní m bìǹ,
ama an sá bin kɔkɔ nyàab̀ Iciinee pu.
Currently Selected:
Siracide 24: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.