Siracide 23
23
1Ti-Dindaan, m-maŋfal Baa nì di-Dindaan#23.1 Dūú ŋmàntī nì Maat 6.9, Yaku 3.9.
taa dū-mi kí líiǹ m-nyɔɔbuŋŋi pɔŋŋu.
Taa pɔ̄ nsan ŋí yàntī ḿ lítí.
2Kpòotī m-landɔkɔi
kí dàkà m-pɔbil iciin saŋŋu.
Niinee maa làá súntí m-yìntitam pu,
àá ikpiti in m ŋá kaa lèe.
3Mimmee m-yìntitam kaa làá bùtī,
ní m-kpitii mun kaa làá dòon̄ kí kpúkuń.
Maa làá lítí m-nannanliibi nimbiin
ní bíǹ kaa nín bēel̀-mi.
4Ti-Dindaan, m-maŋfal Baa nì di-Nimbɔtiu,
taa yàntī ḿ nīn kpèé ki sìŋkīǹ bin kíǹee.
5Kàkatī nnimbitaataam kí wàatī-mi.
6Taa yàntī njinjim nì ŋwuŋgban kɔdeebi ń jī m-pu dinyandi.
Taa dū-mi kí líiǹ ajɔkɔntuun.
Dipùtil
7M-biyaamu, ní bīfìmaan
ni-nyɔɔbuŋŋi ń taa nín̄ kpòotī-ni.
Un di nóó m-dàkatam neeyee,
icoo kpá kí cúú udaan.
8Unikpiti u-ba nyɔɔbuŋŋi di sàtī-u,
ŋíǹ di lúkufí usambiidaan nì ulambidaan#23.8 Dūú ŋmàntī nì Alaŋ 12.13, 18.7..
9Taa yàntī án mántíǹ-si á nīn pùtī,
kí taa nín̄ yíì Circir Nimbɔtiu yindi múlmul#23.9 Dūú ŋmàntī nì Maat 5.33-37, Yaku 5.12..
10Uyumbu un kpiliu kpèé u-tundi nyíki nyikee
kaa lóotí tigbati buŋwati u-wunti pu.
Míǹ ní unil un di pùtī múlmul
ní ki yíì Unimbɔti yindi fám fámee
kpitii kpá kí pítí.
11Unil un pùtī múlmulee
yìntīǹ mara ní
ní u-dicaŋkun yab làá nīn pée fòol̄ ditafadaaldi.
An yaa yīntiǹ-u ní u pūtèe,
u fōō dibɔkpil dee.
U yaa kaa dākafì ní ki pūtèe,
u yīntì mili pu dee.
Udaan yaa pūtì fámee,
baa làá sòoǹ kí pɔ̀-u,
ní nnaabu kaa làá lóó u-dicaŋkun#23.11 Kpèè Akoo 5.4..
12Nsòontam miba bée ki náań nì ŋkúm.
Bí taa pée ká an sòontam pu Jaakɔb naantiibi kansikin!
Di sá yii bin yú nì Unimbɔti deedeeyee
kaa máaǹ kí nīn sòoǹ míǹ,
kaa máaǹ kí dū bi-ba kí cèeǹ an kpitiin.
13Taa yàntī a-nyɔkɔ ń mántíǹ tibɔfan disoondi,
di sá yii an di yàntī unil ń dāá yìntī.
14A yaa kā binikpaambi kansikinee,
á dàkafì a-baa nì a-na pu.
Án nín làá ŋá pu á taa súntí yii a bí bi-nimbiin
a-nyɔkɔ ń ŋmátí-si á sòoǹ tigbaambɔtee.
Niinee a dāa lì yii bi yaa kaa bàà màl̄-si an sɔ́,
ní kí dāá tɔ̄ ŋwiin ŋun bi màl̄-see mbusu.
15Unil un mántiǹ tibɔɔfan disoondee,
baa ti ŋūǹ kí kpòotī udaan u-maŋfal wiiŋyi poon.
Uninja un ŋáań ajɔkɔntuunee
16Anicil ali aba bí ki ŋáań ikpiti ki kútí ikpiti pu,
ní dinicitataatiil bí ki dátí Unimbɔti ŋuul ki tòó di-ba pu.
Mpeepeekaaminee, bin kpɔkɔsib fòol̄ lìblib kii ŋŋmee.
Ŋu yaa kaa tin pée wùn̄ ki kúntì, ŋu kpá kí kpú.
Bi yaa kaa ŋá bi-kpɔkɔsib nín bālifì puee,
an kaa kúù.
Míǹ boonee, uninja un dɔ̀ nì un u yaa pée kée bɔti.
U làá nīn gbíntìi nìkì ki ŋáań míǹ ní
áli u-kpɔkɔsib ń dāá nàan̄-u kii ŋŋmee.
17Ujɔkɔŋfu ceeyee, unimpu kamaa ŋān̄ bí mɔ̀nnì-u ní,
úǹ kaa mɔ̀nnì binimpoobi kí gīī, see u-kúm dal#23.17 B. 16-17: dūú ŋmàntī nì 1 Kɔra 6.18..
18Uninja un mun nyēē u-nimpuu boon,
ní ki lì u-ban yii: «Ŋma di wāĺ-mi?
Dibɔmbɔndi māntìi tú-mi ní agun mun lìkī-mi.
Báà ubɔ kaa wāĺ-mi. Ba pu ní ḿ nīn fàŋkí?
Yilpu fɔ́ŋŋŋ Nimbɔtiu kaa làá téetí m-kpitii pu#23.18 Dūú ŋmàntī nì Yoob 24.15, Dani grek13.20..»
19Tin an niliuee fàŋkée di sá binib ń taa ká-u,
ama u súntì yii ti-Dindaan nimbiliŋ wāĺ
ki jítiǹ ŋwìiń ŋfunyɔm kutukub saalaa pu.
Ti-Dindaan wāĺ tin kɔkɔ binib ŋáańee
ní ki wāĺ kí bà laakin bí dibalin kábuee#23.19 Dūú ŋmàntī nì Alaŋ 15.11..
20Ti-Dindaan nìn nyí tiwan kɔkɔ
ki wāatì ní ki nín náań-tì,
ní ki làá nīn gbíntìi nyí-tì ti-kpátam boon.
21Bi làá dāá cúú an niliuee ŋyunti ŋun
waa pée gíti cɔ́tí yii bi làá cúú-uee ní,
ní bí dáaĺ u-tafal mmɔŋkijaa pu#23.21 Dūú ŋmàntī nì Ditee 22.22..
Unimpu un nyēē u-cal boonee
22Tibɔbaantiil di dɔ̄ ki cí
unimpu un di nyáń u-cal boon,
ki màl̄ u-cal kibiki kin waa yèe
kí jī u-fakalee.
23Mpeekaamee, u yīntiǹ Yilpu Fɔ́ŋŋŋ Nimbɔtiu marau.
Nliliitiimee, u yīntiǹ u-cal.
Ntataatiimee, u ŋá tilaakpaal ki kɔ́ǹ u-ba tijɔkɔndi
ki cáá ubɔ pool ki màl̄ kibiki.
24Bí cáá-u kí cùnnì samaa nimbiin,
ní kí cɔ̄ŋkì kí béé u-biyaamu bɔti.
25U-biyaamu gbanti kaa làá báań inyaan,
ní u-paŋŋi mun kaa làá lòoǹ abil#23.25 Dūú ŋmàntī nì 41.5-7, Oosee 2.5-7, Iciin 3.16..
26Unimpu gbanti cooi pée kpá kí pítí.
U-kúm boonee, binib yaa láa pée téetì u-puee,
bi làá dāá nīn tòó-u mbusu ní.
27Bin làá dāá páań u-boonee làá dāá béé yii
baa ŋūǹ kí dū tiba kí ŋmàntīǹ ti-Dindaan faaŋku,
àá tiba kaa mɔ̄ ki bàn̄ á dū a-ba
kí yā kí nákáǹ ti-Dindaan marab.
Currently Selected:
Siracide 23: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.