Siracide 22
22
Uwutijoodaan bɔti
1Uwutijoodaan náań nì
ditaŋkpal din táká tibinee ní.
Báà ŋma sáń-u ní binib bèel̄-u.
2Uwutijoodaan náań nì mbincun ní.
Un kamaa yaa gbēē-ŋuee fíntí u-ŋal ní.
Mbiyaamu mun sá pɔɔgaatibee
3An sá icoo ní ki tīī ubaati un cáá
dikpacantibilee.
Kì yaa tin sá kibinimpubikee,
an pée nín púntìi nāaǹ dee#22.3 B. 3: dūú ŋmàntī nì Alaŋ 17.9-11..
4Usapɔɔn un cáá iciinee kāntí cal ní,
ama un bíil̀ee kɔ̄ntí u-baa kunimbaaun ní.
5Unimpu un kaa tɔ́ binibee
kɔ̄ntí u-baa nì u-cal icoo ní.
Bi-liitil kpèé-u fám ní#22.5 Dūú ŋmàntī nì Alaŋ 12.4..
6Á sāŋkì unil ŋyunti ŋun kaa kítèe
bí kii binib nín kā dikpool
ní ubɔ bí ki gà ilanee ní.
Ama mbambaan nì ditafadaaldi
di sá iciin tikɔkɔ poon.
Digbaandi kaa cáá nnyɔkɔ
9Á dàkà ugbaanee sá kii
á ŋáĺ dibool din wīīyee ní,
àá kii á fìntī unil un
di gèen̄ ki kɔ́ ndanee ní.
10Á sòoǹ nì ugbaanee sá kii
á sòoǹ nì un gèeǹee ní.
A pée sòoǹ kí dóóyee ní
ú bàlifì-si yii: «Ba kpá ní?»
11Sɔ̄ unil un kpíìyee pu,
di sá yii udaan gíti kpá kí wāl̀ ŋwalifi.
Sɔ̄ ugbaan mun pu,
di sá yii u lóò dinyil.
Taa sɔ̄ unil un kpíìyee pu tikpil,
kun puee úǹ ká diŋuŋfil ní.
Ama ugbaan úŋ̀wuee
u-bɔti gbí isaa ki jítiǹ ŋkúm.
12Bi kàal̀ unil un kpíìyee kpool iwiin iluli ní,
án yaa kíǹ kii ugbaan àá unil un kpèé Unimbɔti fámee,
bi kàal̀ udaan kpool u-maŋfal wiiŋyi kɔkɔ poon ní.
13Taa sòoǹ nì ugbaan kunyɔɔbumpaau,
kí taa còom̀ nì un lóò iciinee#22.13 Dūú ŋmàntī nì Alaŋ 26.4-13..
Á nīn nyíǹ a-ba nì u kí taa kɔ́ tibɔtin,
kí taa gbēē-u mun kí kɔ́ǹ a-ba tijɔkɔndin.
A yaa là kí nīn cáá ŋgbansɔŋfee, á nīn gɔ́ntí-u.
Mimmee u-gbaandi kaa làá kɔ́ǹ-si agìńni.
14Ba di gíti nyìm̀ kii tikúbɔn?
An yaa kaa sá ugbaan, an gíti sá ba?
15An sá sɔkɔmii unil ń túń dibul àá ŋyaam kutuku
àá dikújabil ki jítiǹ á nīn kā ugbaan cee u ŋáań u-gbaandi#22.15 B. 14-15: dūú ŋmàntī nì Alaŋ 27.3..
16Bi yaa páaǹ idɔ kudii yilpu
ní ki bóob́ an pɔ̄ɔ̄ tiŋanee,
báà kitiŋ ń cìŋkì min kamaa pu,
idɔ gbanti kpá kí kpàtī.
Míǹ mbaantiim ní unil yaa dākafì tiŋan
ki lēē u-pɔbil poon kí ŋá tibee,
báà u yaa ká agìń, waa yɔ̀tī tiwun#22.16 Dūú ŋmàntī nì Maat 7.24-25..
17Unil yaa dākafì tiŋan pu
ní ki lēē u-pɔbil poon kí ŋá tibee,
an bí kii kudii kun bi póoń ki ŋmàn̄ee ní.
18Itaŋkpabiiti in pá digundi yilpuee
kaa ŋūǹ kí yūĺ kubuŋu nimbiin.
Míǹ mbaantiim ní ugbaan un pɔbil bíil̀
u-gbaanlandɔkɔi puee
kaa làá ŋmā kí yūĺ tin pée fàantí-uee nimbiin.
Yūĺ deedee nì a-bɔɔbi
19Bi yaa fáá unil nimbilee, nnyinnyim di nyēē.
Ama bi yaa fáá unil pɔbilee, tin kā udaan nee di nyēē.
20Un yaa tɔ́ nnɔmbiyaamu ditaŋkpalee jì-mu ní.
Un yaa sìí u-bɔɔyee bíiĺ kubɔɔtiiu ní.
21A yaa fúutì kitàataajiki kujitooun a-bɔɔ puee,
dimákal dáá bí, u ŋūǹ kí fàtīí gítiń.
22Sii nì a-bɔɔ yaa kpákáǹ tɔbee,
taa fàŋkì, ni dāa ŋūǹ kí fàtīí mɔ̄ɔkì.
Ama a yaa sīī-u, àá ki kpēē-u fám,
àá ki bīitì u-bɔɔŋŋi pu àá ki nyáń u-boonee,
á béé yii a-bɔɔ gbanti làá sāǹ-si dee.
23A-juti yaa sá usoodaanee,
á yàntī ú nīn máká a-pu.
Niinee, u yaa láa kpántì ugaajee,
a dāa jīǹ u-pu.
U yaa kɔ́ dinimbinaamandinee, nín̄ yú nì u deedee.
Niinee, u yaa láa fōō difakalee,
a mun làá dāá ká a-laŋki.
24Nnyim tuntuŋku nì nnyiim
di dàkà laakin ŋŋmi bée.
Míǹ ní a yaa tin bíi gbìl̀ asiibil puee,
á béé yii fatiku làá yàaǹ dee#22.24 Dūú ŋmàntī nì 28.11, Alaŋ 22.3..
25Icoo kpá kí cúú-mi ḿ mɔ̄tì m-bɔɔ pu.
U yaa nyàab̀-mi, maa làá fàtī m-boon kí tīī-u.
26Ama agìń aba yaa tin bāań-mi u-puee,
bin kɔkɔ làá gbìl̄-tèe làá nīn kíǹ
ki nyíǹ bi-ba nì u ní.
Ŋwimmeem
27M kāntí la uciitil ú nīn cí m-nyɔkɔ,
kí pìin̄ m-nyunculiŋ nì saafii!
Niinee m-nyɔɔbuŋŋi kaa dāa yàntī ḿ lítí,
ní m-limbil mun kaa dāa yàntī ḿ wāŋkì!
Currently Selected:
Siracide 22: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.