Siracide 20
20
Béé ŋyunti ŋun a máaǹ kí sòoǹ àá kí nīn ŋmée
1Iwoon iba bí kaa kítì.
Iyunti ibee, diŋmiŋŋmil
dàkà yii a sá ulandɔkɔdaan ní.
2Ama an sɔ́ á wòoǹ unil
ki jítiǹ á díkí u-pu diŋuul.
3Unil yaa béè u-yìntitamee,
u nyáń tibɔtin dee.
4Unil un là kí dī mpɔn kí dàkà
yii u cáá mbaamɔnee,
udaan bí kii ufaal un di là
kí dòon̄ nì usapɔɔn mpɔnee ní.
5Biba ŋmí ní kí dàkà yii bi sá biciŋfitiibi#20.5 Kpèè Alaŋ 17.28..
Ama bi ná biba, kun puee bi sòoǹ tikpil.
6Biba ŋmí kun puee
baa nyí tin bi làá kííyee,
ní biba mun ŋmí kí sòoǹ tibɔti
ŋyunti ŋun an máaǹee.
7Uciŋfiti cīití ŋyunti ŋun
an máaǹee ní kí sòoǹ,
ama ulambidaan un lóò iciinee
kaa nyí ŋyunti ŋun sá ú sòoǹee.
8Unil un sòoǹ tikpilee,
binib kaa là u-bɔti.
Míǹ ní un mun kaa là kí sòoǹee,
binib kaa néeń u-bɔti#20.8 B. 6-8: dūú ŋmàntī nì 1.23-24, Alaŋ 29.11..
Tibɔtuuŋkaal
9Ŋyunti ŋubɔee, kuyikpiiu
cāabìń ku-dindaan tiŋan ní,
ní ŋyunti ŋubɔee, diyimɔɔl
ń cáań di-dindaan tikpitil.
10Ŋyunti ŋubɔ a pūǹ tiwanee,
aa làá páatí báà tiba an pu,
ní ŋyunti ŋubɔee á páatí
tin a púee mili pu.
11Ŋyunti ŋubɔee, tinyool tiba
ŋūǹ kí sìntī unil taapu.
Ama biba mun gántí bi-yil
ŋyunti ŋun bi sīntì-bi taapuee.
12Biba ŋūǹ kí dàkafì yii
bi dū animbil fiii ki dá tiwan tikpil,
ama ní kí pà tin u dée miluli pu.
13Uciŋfiti nyí u nín làá sòoǹ fiii pu
binib ń nīn néeń u-bɔtee.
Ama báà ugbaan ń sòoǹ nì kinyɔɔmɔɔi min kamaa,
u ŋáań fám ní.
14Tiwan tin ugbaan pú-see
kaa cāabìń-si ipaati iba.
Di sá yii úǹ làá nīn kā ki cí
yii á téeǹ-u án jītíǹ tin u pú-see pu.
15U pūǹ tiwan fiii
ní ki wòoǹ tikpil,
kii uwannyafil di tátí kinyɔŋinee.
U yaa pīnnì-si tiba díǹ,
u làá fu bàlifì-si ti-pu fool.
An niliuee, baa ŋūǹ kí nīn là u-bɔti.
16Ugbaan lì yii: «Maa cáá bɔɔ,
ubɔ kaa nyí tiŋan tin m ŋáańee.
Bin jīǹ m-jintee sá maanyiŋambi ní.»
17Ama an niliuee, báà ŋma bèel̄-u ní.
Á taa sòoǹ tibɔti tin kaa máaǹee
18An sɔ́ á ŋàtī kí lítí didandi pu
ki jítiǹ á sòoǹ tibɔti kí yìntī.
Míǹ ní binikpitib làá dāá
lítí dicilpu dicilpu.
19Unil un sá dikpacantibilee
bí kii tibɔfan tin bigbaambi sòoǹ ki bùsēe ní.
20Binib kaa fòol̄ ugbaan laŋkpandi.
Di sá yii waa gà u-laŋkpandi
ŋyunti ŋun an máaǹee#20.20 Dūú ŋmàntī nì Alaŋ 26.7..
21Biba bée, bi-sool pu ní baa ŋáań ikpiti.
An nibee ŋūǹ kí gèeǹ bi-landɔkɔjaatiŋu kaa kɔ́kɔĺ-bi tiba.
22Biba mun bée, ubɔ pu ní u wáŋkí,
u nín tɔ́ ugbaan puee pu ní ú wāŋkì.
23Biba mun bée, bi pòontí bi-bɔɔ ipoon
kun puee baa kíikí kí yíí udaan,
ní udaan ń dāá kpántí bi-pulincɔnti fám.
24Nnyimɔn sá kii icoo daaŋkuee ní unil wunti pu.
Binib bin kaa nyí tibee nyɔkɔn ní bi kāntí-ŋu.
25Unaayuu sɔ́ǹ unil un mɔ́ntí kaa gbèentée,
ama bi-liitil làá wāŋkì#20.25 Dūú ŋmàntī nì 5.14, Alaŋ 12.22, Eef 4.5..
26Inyimɔn yàntī unil féeń u-jilmau,
ní u-cooyee pée bí u-pu kaa dóotí.
Iciin paati nì i-tuuŋŋi
27Uciŋfiti pée sòoǹ fiii yéè
ní binib tìì-u disíndi.
Unil un wálifèe bɔti mɔ̄ǹ binikpaambi.
28Ukpaamɔnti cēē tikpaajin tiŋan ní.
Míǹ mbaantiim ní un bɔti fáatiǹ binikpaambee
ŋūǹ kí yàntī bí dū unil yìntitam kí pɔ̄-u.
29Tiwampɔkaal nì dinyɔɔŋeebil jim
yàntī biciŋfitiibi kaa ti wāĺ tiŋan,
ní ki ŋēeb̀ bi-nyɔmmu baa ti ŋūǹ kí wòoǹ unil#20.29 Dūú ŋmàntī nì Ditee 16.19..
30Iciin in bi dūu bál̀ee,
nì tigaajati tin bi dūu gbìn̄ ki síb́ee kèetī ba#20.30 Dūú ŋmàntī nì 41.14, Maat 13.44.?
31Unil un bāal̀ u-gbaandee
sɔ́ǹ un cáá u-ciiŋyi ki bāal̀ee#20.31 Dūú ŋmàntī nì Maat 5.14-16..
Currently Selected:
Siracide 20: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.