Siracide 19
19
1Utɔntɔnli un nyù ndaam tikpilee
pée kpá kí kpántí ugaaja.
Unil un ŋèeǹ nì tiwan tin bí fiiiyee
kpántí usoodaan ní fiii fiii ki cá.
2Ndaam nì binimpoobi yàntī binyiliibi gáatí ní.
Un néeń ki cá nnimpulaakpaamu ceeyee
kaa ti yì u-ba.
3An di làá yàntī udaan ń kpú
ní akoosibil ń ŋmɔ́ u-wunti.
Kubɔcaau paati
4Unil un kaa dàkafī ki cá ndanee
di fòol̄ tin bi tùkù-uee ki kíikí dicilpu.
Unil un ŋáań ikpitee
yìntīǹ úǹ u-ba ní.
5Unil un néeń ki ŋáań ikpitee
kù úǹ u-ba bɔti ní.
6Unil un ná dibɔcàfilee sáń ki nyēē tikpitil ŋaan ní.
7Taa dū tin ní a gbìl̄ bi sòon̄ee kí cáá māafì,
an kaa làá bàtī-si tiba.
8Á taa sòoǹ tiba ubɔ pu,
á taa sòoǹ a-bɔɔ puɔɔɔ, a-nannanliu pu.
An yaa kaa sá yii a-ŋmiŋŋmil làá yàntī á yìntēe,
á taa lì tiba.
9Di sá yii udaan ŋūǹ kí gbìl̄ tin a lēe.
Waa làá nīn gíti cáá a-pu dimákal,
ní u yaa ká ŋyuntimɔntee, ú nīn kíǹ ki ná-si.
10A yaa gbìl̄ bi sòon̄ tibɔti tibee,
á dūú ŋá a-taalin kí tin sāā a-kúm dal#19.10 Dūú ŋmàntī nì Alaŋ 11.13..
Á taa fàŋkì yii a-nyɔkɔ làá ŋmátí-si á sòoǹ.
11Bi sòoǹ tibɔti ní an wù ugbaan
kii unimpu di kāl̀ imatiŋween puee.
12Tibɔti yaa kā ugbaan pɔbilinee,
an bí kii mpiin di túuń u-tapandi puee ní.
Cɔ̄ŋkì kí kpèè tin a gbìl̄ bi sòon̄ee
13Bàlifì a-bɔɔ tin bi bí yii u ŋée,
án yaa yíì waa pée ŋá báà tiba.
Báà u yaa pée ŋá-tàaa,
waa làá gíti ŋá-tì dalba.
14Bàlifì a-juti tin bi bí yii u lēe,
án yaa yíì waa pée lī tiba.
Báà u yaa pée lāaa,
waa làá gíti lì-tì dalba.
15Bàlifì a-bɔɔ tin bi bí yii u ŋée,
di sá yii binib sòoǹ ki bíiĺ bi-jutiibi ní.
Taa nín fòol̄ tin kɔkɔ bi sòoǹee ki kíikí.
16Unil ubɔ ŋūǹ kí lì tiba
kaa dākafì kulandɔkɔkpiiu#19.16 Dūú ŋmàntī nì Alaŋ 10.19, Uciŋ 7.21-22..
Ŋma kaa láá pée yīntì
u-bɔsooŋyi poon ki ká?
17Bàlifì a-juti tin bi bí yii u ŋée
kí wàatī kí nín cùú wòoǹ-u,
ní kí yàntī Yilpu Fɔ́ŋŋŋ Nimbɔtiu marau
ń tɔ̄ u-tundi.
Iciin in sá tiŋman yayee nì in kaa sée
20Iciin kɔkɔ di sá á fàŋkì ti-Dindaan,
kí ŋá kí nóó nì u-marab.
22Ama á nīn nyí tin sá ikpitee
kaa dàkà yii a sá uciŋfiti,
kí nīn nóó bikpitiŋaliibi saŋkiiyee
kaa dàkà yii a sá u-nyil.
23Ŋŋáaǹtam miba bée ki sá ntimbiil.
Unil un di kaa cáá iciinee sá ugbaan ní.
24An sɔ́ unil ń taa nín̄ cáá dinyil tikpil
ki fàŋkí ti-Dindaan ki jítiǹ
unil ń nīn cáá dinyil tikpil
kaa tɔ́ u-marab.
25Nciin ŋáaǹtam miba bí
ki cáǹ unil tin kaa bí deedeeyee poon.
Biba kíiĺ bi-jutiibi kí ŋmā kí ká tin bi nyàab̀ee.
26Biba bí ki còom̄
bi-yil tīī kii bi kā dikpoolee,
ama bi-pɔbiliŋ poonee, biibii bɔti di gbí.
27Bi tìntī bi-yiliŋ
ní ki mɔ́ntí yii baa gbìl̀ tiba.
Ama ubɔ yaa kaa bíi kpèé-uee,
ní ú jī a-pu dinyandi.
28Biba kaa cáá mpɔn kí ŋá tikpitil.
Ama diyimɔɔl yaa púee, baa tàantí.
29A pée kāntí ubɔee,
a béetí dinicil din u sée ní.
A pée kpèé u-nimbiinee
a béetí yii u sá ulandɔkɔdaan.
30Unil nín pèentí puee,
nì u nín lāā puee,
nì u nín còom̄ puee
di yàntī ní á béé
dinicil din u sée.
Currently Selected:
Siracide 19: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.