Siracide 18
18
Ti-Dindaan di sá ukpaan
1Ti-Dindaan un bí kí nīn cá jaanjaanee
di náań tikɔkɔ kaa kíǹ tiba.
2Ti-Dindaan baba ní bi làá yíiń deedeedaan.
4Waa tīī ubɔ mpɔn udaan ń bāakì tin u làá ŋée.
Tiŋman, ŋma di ŋūǹ kí béé u-maamaaci tuuŋŋi?
5Ŋma di ŋūǹ kí ŋmàntī u-pɔŋkpaaŋŋu?
Ŋma di ŋūǹ kí māafì u-ŋanti tin u ŋáańee?
6Taa ŋūǹ kí bàtī tiba an pu,
kaa ti ŋūǹ kí kūtì tiba an pu.
Unil kaa ŋūǹ kí béé
ti-Dindaan maamaaci tuuŋŋi taapu#18.6 B. 4-6: dūú ŋmàntī Yees 40.12-14, Ilan 40.6..
7Unil yaa dākafì yii u dóòyee,
ŋyunti gbantee, u nín kíĺ dee.
U yaa tí dūu gbēeǹee,
waa ti nyí laakin u bée#18.7 Dūú ŋmàntī nì Ilan 139.17-18..
Unil sá ba?
8Unil sá ba ní? Ba ní u kèetī ní?
Tiŋan nì tikpitil tin u ŋáańee taapu sá yii ba ní#18.8 Dūú ŋmàntī nì Ilan 8.5, 144.3-4, Yoob 7.1-10.?
9Unil yaa tin bàn̄ abin dilaataalee,
mimmee u yúntì tikpilku dee#18.9 Dūú ŋmàntī nì Ilan 90.10..
10Kí dūú ŋmàntī nì iyunti in làá nīn bí kí nīn cá talkuee,
abin gbanti sá kii nnyim nín jòotī dibaba
tiŋku nyimin puee ní,
àá dibul nín dɔ̄ puee poon kibiliiyee ní.
11An pu ní ti-Dindaan jīǹ kimɔtii binib pu,
ní ki cáá u-laŋŋaŋfitiiku ki sìtī bi-pu.
12U wāĺ ní ki nyí bi nín làá kúntí nì falaa puee,
an pu ní u cáá bi-kpitii ki pūǹ-bi kaa gbèentí.
13Unil sūǹ u-nabiki baba saai ní,
ama ti-Dindaan úǹ sūǹ unil kamaa saai ní.
U kpòotī unil kamaa, ki dátí u-tafal, ki dàkà-u
ní ki fàtīi gīintiń un wáŋkèe u-cee,
kii upikpaal nín gīintiń u-piii in wáŋkèe puee#18.13 Kpèè Eesee 34.11-16, Ilan 145.9, Maat 18.12-14, Luuki 15.3-7..
14U sūǹ binib bin di kíikí bi dàkà-bee saai,
nì bin pɔ̄ɔntí kí nīn tɔ́ tin u sòon̄ ki síiǹee.
Unil nín máaǹ kí nīn pūǹ puee
15M-jipɔɔn, a yaa ŋá unil tiŋanee, á taa wòoǹ-u.
A yaa pú unil tiwanee, á taa sòoǹ-u tibɔti án wà-u.
16Dimalindi kaa sɔ̀ŋkī kutuntuŋuaaa?
Míǹ ní dinyɔɔbummɔɔl jítiǹ tiwampɔkaal.
17Tiŋman, dinyɔɔbummɔɔl sɔ́ǹ tiwampɔkaal timɔntiil.
Un sá ulaŋŋaŋfitee pūǹ ní ki cáá dinyɔɔbummɔɔl.
18Ugbaan kaa nyí bi nín wòoǹ unil iciin poon puee.
Nnimbitaataam daan wampɔkaati
yàntī unil ń sɔ̄ nnyinnyim ní.
Uciŋfiti nín nyí nì u-ba puee
19Kí wàatī á sòoǹee, á bàlifì kí béé tiŋan.
Cáaǹ a-ba kí nín būŋkì.
20Cɔ̄ŋkì a-ba kí wàatī Unimbɔti ń nín sòoǹ a-bɔti,
ní an yaa láa bàn̄ á sòoǹ a-nyɔkɔpu yayee,
á ká a-kpitii pɔ̄tam#18.20 Dūú ŋmàntī nì Maat 7.5, Gala 6.4..
21Taa nín̄ kā ki cí kí būŋkì
kí wàatī kí nín béé a-yìntitam.
A yaa pée ŋá ikpitee,
á dàkà yii an wù-si.
22A yaa pōoǹ ipoonee,
á ŋá kii a nín pōoǹ puee ŋyunti ŋun a síiǹee.
Taa nín̄ cí a-kúm dal kí nín pà a-pɔndi.
23Kí wàatī á pòon̄ ipoonee, á dàkafì tiŋan.
Taa nín̄ bí kii unil un cɔ́ŋkí ti-Dindaanee#18.23Alaŋ 20.25, Uciŋ 5.3..
24Téetí yii u ŋūǹ kí gíí a-pu diŋuul a-winjoolkaai dal,
ní u ŋūǹ kí dāá fàtī u-boon kí tīī-si kí dáaĺ a-tafal.
25A yaa bí digbilinee, á dàkafì ŋkùm yuntiŋu pu.
A yaa kpántì ugaajee, dàkafì yii a ŋūǹ
kí dāá kpántí usoodaan nì unandaan.
26Kí yòon̄ kutaafaau kí dāá jóotí-kùee,
tikɔkɔ ŋūǹ kí kpántí.
Di sá yii ti-Dindaan tūǹ u-tundi malaa malaa ní.
27Tin kamaa poonee, uciŋfiti úǹ nyí nì u-ba ní.
Ikpiti yaa túuǹ-uee, waa jēetí i-poon.
28Unil un kamaa cáá dinyilee béetí iciin ní.
Udaan pàkà un ká-iee ní.
29Binib bin sòoǹ tibɔti nì dinyilee
dàkà yii bíǹ bi-ba sá biciŋfitiibi.
Kii utaa nín nì ki yàantí puee,
míǹ ní bi sòoǹ tibɔti nì alaŋkpan ŋin cáá taapuee.
Unil ń ŋmā kí cúú u-ba
30Taa yàntī a-kpɔkɔsib ń nīn kpòotī-si,
kí taa pɔ̄ a-nimbitaataam mpaan.
31A yaa ŋá ki nóó nì a-kpɔkɔsibee,
a-nannanliibi làá dāá lā-si.
32Taa nín̄ bí ki jīǹ mmɔn ki fàal̀,
yaa sá fám, a làá dāá fōō an paati.
33Taa nín̄ pìntí animbil
ki jīǹ jiŋaakpaambi
ŋyunti ŋun aa cáá tiba kuloounee,
yaa sá fám a làá dāá kpántí usoodaan.
Currently Selected:
Siracide 18: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.