Siracide 17
17
Tin binib máaǹ kí ŋá kí tīī Unimbɔtee
1Ti-Dindaan dū ntam ní ki máń unil,
ní ki làá yàntī ú fàtīí gítí ntamin#17.1 Dūú ŋmàntī nì 40.11, 41.10. - Diny 3.19, Uciŋ 3.20-21..
2U tīī binib iwiin in nyɔkɔm nì ŋyunti ŋun
bi làá dūú kàl̄ kitiŋ puee.
U tīī-bi mpɔn kitiŋ wanti kɔkɔ pu.
3U náań-bi ki nántiǹ úǹ u-ba#17.3 B. 2a: dūú ŋmàntī nì Diny 6.3, Ilan 90.10. - B. 2b-3. Diny 1.26, Iciin 9.2-3.,
ní ki gbéeǹ-bi mpɔn kii úǹ u-bee.
4U yāntì tin kɔkɔ u náańee fàŋkí-bi.
Niinee bi ŋūǹ kí nīn cáá ipeel nì inoon pu mpɔn.
6U tīī-bi ibɔsoon nì dilimbil nì animbil nì atafal,
nì dipɔbil bí nīn cáa dàkafī.
7U gbéeǹ-bi dinyil nì nlandɔkɔ,
ní ki dàkā-bi bí béé kí gàntī tiŋan nì tikpitil#17.7 Kpèè Diny 2.17, Ditee 30.15..
8U yāntì bi fàŋkí-u bi-pɔbiliŋ poon,
kí dàkà-bi u-tuuŋŋi nín sá akpaan puee.
10Bi làá dāá gāā ilan
kí nyɔ̄ŋkì u-circir yindi,
kí māafì u-tuuŋŋi nín sá akpaan puee.
Dipoondi nì mara
11Kí kūtèe, ti-Dindaan tīī-bi dinyil,
ní ki tīī-bi dimaŋfal marau.
12U nì bi pūtì ki pōoǹ tɔb kí nīn cá jaanjaan,
ní u dū marab ki dàkā-bi.
13Bi-nimbil ká u-nyooti kpaanti,
ní bi-tafal gbìl̄ u-neen nyooti.
14U tùkū-bi yii: «Ní nīn nyíǹ ni-ba
kí taa ŋá tin kaa sá deedeeyee.»
Ní ki tīī-bi marab bin làá tūtuǹ báà ŋma
bí nīn bí dicilpuee#17.14 Kpèè Akoo 19.18..
Tiba kaa bí Unimbɔti kaa nyí
15Ti-Dindaan wāĺ tin kɔkɔ binib ŋáańee.
Tiba kaa bí ki bál̀ u-nimbiin waa wāĺ.
17Ti-Dindaan lēē ubɔti ki tīī dinibul kamaa,
ama Isirayeel nibul díǹ sá u-jandi ní#17.17 B. 17: kpèè Disa 19.5..
19Tin kɔkɔ binib ŋáańee dɔ̄ u-nimbiin kii ŋwìińee ní,
u-nimbikpeeŋu pée cɔ́ bi-bimbim pu ní.
20Tin kɔkɔ bin ŋáań an kaa ŋān̄ee kaa bál̀ u-cee,
bi-yìntitam kɔkɔ pée dɔ̄ u-nimbiin ní#17.20 B. 20: kpèè Ilan 90.8..
22Unil yaa ŋá u-juti tiŋanee, an sá kii
kijalii kin bi cáa nyìitēe ní ki tīī udaan.
Tiŋan gbanti cáá kudapɔɔu kii dinimbibulee ní.
23Ŋwiinee, ti-Dindaan làá dāá pà
unil kamaa u-tuuŋŋi paati.
U làá dū báà ŋma paati kí túń u-yil pu ní.
24Ama bin yaa kpántì bi-bee,
u pūǹ-bi diyimɔɔl bí fàtīí gítiń u-cee,
ní ki tìì bin wunti yɔ̄tèe kunyannyaau.
Ní fàtīí gítiń Unimbɔti cee
25Fàtīí gítiń ti-Dindaan cee kí fá a-kpitii,
a yaa bíi mèé-uee, a bíi bàtī a-yìntitam pu dee.
26Fàtīí gítiń Yilpu Fɔ́ŋŋŋ yɔu cee
kí fá ikpiti,
nín̄ ná tin sá ntimbiil bɔtee nì a-pɔbil kɔkɔ#17.26 Kpèè 2 Tiim 2.19..
27Ŋma di làá nyɔ̄ŋkì ti-Dindaan ditaŋkpiilin?
An sá binib bin dáá bí dimaŋfalinee di jáaḿ-u.
28Unifoo un cáá ŋgbampɔnee
di ŋūǹ kí nyɔ̄ŋkì ti-Dindaan.
U yaa kpíìyee, waa ti bí dee,
ní waa ti ŋūǹ kí jāam̀-u#17.28 B. 27-28. kpèè Yees 38.18, Ilan 88.11-13, 115.17, Baru 2.17-18..
29Ti-Dindaan poon mɔ̄ tikpilku,
ní ki pūǹ bin fàtī u-watil púee kpitii.
30Di sá yii unil kaa ŋūǹ kí nīn cáá tikɔkɔ,
kun puee nisaal kaa bí kí nīn cá jaanjaan.
31Ba di pée gíti bí ki wāĺ ki bàn̄ ŋwìiń?
Ama ŋu jēetí ní ŋu-walifiŋu kaa ti ŋmíntí.
Míǹ mbaantiim ní unil un dàkafī kí ŋá tikpitilee bí.
32Unimbɔti di kpèé iŋmalbijaa in bí kutaa puee,
ama binib kɔkɔ pée sá ntam nì ŋfantam ní#17.32 Dūú ŋmàntī nì Yoob 15.15..
Currently Selected:
Siracide 17: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.